Da Ekpri N̄wed “Se Isịnede ke N̄wed Abasi” Tọn̄ọ Ukwọrọikọ
1. Ewe n̄wed ke inyene ndida n̄kwọrọ ikọ?
1 Didie ke ikeme ndida ekpri n̄wed emi ẹkotde “Se Isịnede ke N̄wed Abasi” ntịm idem nnọ ukwọrọikọ? Sia enye enyenede nsio nsio ibuotikọ ye mme itie Bible emi ẹtịn̄de n̄kpọ ẹban̄a mmọ, emi ekeme ndinam emem nnyịn utom ndida enye ntọn̄ọ ukwọrọikọ.
2. Didie ke ikeme ndida n̄wed emi “Se Isịnede ke N̄wed Abasi” n̄kwọrọ ikọ?
2 Edieke oyomde ndida ọyọhọ mbụme 8 ntọn̄ọ nneme, dọhọ ete: “Enyene mbụme emi afịnade ediwak owo mfịn emi ikọdọhọde idineme ye afo. Enye edi: ‘Ndi Abasi anam nnyịn ibọ ufen?’ [Ke ndusụk itie, esifọn iwụt enyeneufọk mbụme oro.] Afo ekere didie? [Bet ibọrọ.] Bible ọbọrọ mbụme oro.” Ẹsịn nsio nsio itie Bible do; kot nyụn̄ neme kiet m̀mê akande oro. Edieke enye amade se enemede, emekeme ndiwụt enye mbụme 20 emi ẹdude ke n̄wed oro, onyụn̄ ọdọhọ enye emek enye oro mbufo ẹdinemede ama afiak edi. Mîdịghe emekeme ndinọ enye kiet ke otu n̄wed emi isidade ikpep mme owo n̄kpọ, emi enen̄erede etịn̄ n̄kpọ aban̄a se mbufo ẹkenemede.
3. Didie ke n̄wed emi “Se Isịnede ke N̄wed Abasi” edin̄wam nnyịn ikwọrọ ikọ inọ mbon emi mîdịghe Christian?
3 Ọyọhọ mbụme 4 ye ọyọhọ mbụme 13 esịm 17 ẹkeme ndinen̄ede n̄n̄wam nnyịn ke ini ikwọrọde ikọ inọ mbon emi mîdịghe Christian. Ke uwụtn̄kpọ, edieke oyomde ndida ọyọhọ mbụme 17 ntọn̄ọ nneme, emekeme ndidọhọ ete: “Ikọdọhọ idineme n̄kpọ iban̄a se idinamde kpukpru owo ke ubon ẹkop inemesịt. Ediwak n̄wan ye ebe mfịn ẹsiwak nditọhọ nnyụn̄ n̄n̄wana ye kiet eken. Ndi idịghe ntre? [Bet ibọrọ.] Enyene nti ikọ emi ẹnen̄erede ẹn̄wam ediwak ebe ye n̄wan mfịn utọ nte enye emi, ‘Yak n̄wan enen̄ede okpono ebe esie.’ [Ufọn idụhe ndidọhọ ke se etịn̄de emi oto Ephesus 5:33. Edieke enyenede nneme ye n̄wan, emekeme nditetịn̄ se idude ke Ephesus 5:28.] Ndi emekere ke edieke n̄wan ye ebe ẹnamde se ẹtịn̄de emi, ke mmọ ẹyekop inemesịt?”
4. Ke ama ọkọkwọrọ ikọ ọnọ owo emi mîdịghe Christian, nso ke afo ekeme ndinam?
4 Ke ẹma ẹkekụre nneme, nam ndutịm man afiak enyene nneme ye owo oro ini en̄wen. Emekeme nditịn̄ n̄kpọ mban̄a itie Bible en̄wen oro odude ke mbụme oro ama afiak aka. Yom ini oro odotde nam owo oro ọfiọk ke kpukpru se esitịn̄de oro ye enye oto Bible. Se mbufo ẹkenemede ye nte enye adade Bible ayan̄wam fi ọdiọn̄ọ n̄wed emi edifọnde ye enye m̀mê emi enye edimade ndikot.—Se esịne-esịt Utom Obio Ubọn̄ Nnyịn eke December 2013.