Kûyak Ini Emi Odude ke An̄wautom Atatak
Mme Ntiense Jehovah ẹma ẹda hour 1,945,487,604 ẹkwọrọ ikọ ke isua utom 2014—emi enen̄ede owụt ke nnyịn imebiere ndisịn idem nnam utom Jehovah! (Ps. 110:3; 1 Cor. 15:58) Sia ‘ini emi osụhọde mîniọn̄ke aba,’ ndi imekeme ndida ini oro idude ke an̄wautom ikwọrọ ikọ inọ ediwak owo efen efen?—1 Cor. 7:29.
Oyom inam nsio nsio ukpụhọde mbak ini emi idude ke an̄wautom editatak. Ke uwụtn̄kpọ, edieke ọkwọrọde ikọ ke ufọk ke ufọk edi ke ama akasan̄a hour kiet m̀mê akande oro ukwe mme owo, ndi emekeme nditọn̄ọ ndikwọrọ ikọ ke efak, ke urua, aka mfiakn̄ka ye ntre ntre eken man ekeme ndikụt ediwak owo n̄kwọrọ ikọ nnọ? Imọfiọk ke efakutom ye efakutom idịghe ukem. Edi kpa ye oro, nti ekikere oro ẹnọde mi ẹkeme ndin̄wam fi enen̄ede ada ini oro odude ke an̄wautom ọkwọrọ ikọ mbak udûyak etie nte ke akababiat ini oro.—1 Cor. 9:26.
Utom Ukwọrọikọ Eke Ufọk ke Ufọk: Ke ediwak isua idahaemi, mme asuanetop ẹsiwak nditọn̄ọ ukwọrọikọ eke ufọk ke ufọk ke usenubọk. Edi sia ediwak owo ẹsikade utom ke usenubọk, ndi ikpọfọnke ika ukwọrọikọ eke ufọk ke ufọk uwemeyo m̀mê mbubreyo, ke ini idikụtde ediwak owo ke ufọk? Imekeme ndida usenubọk n̄kwọrọ ikọ ke efak m̀mê ke itie mbụbehe sia emi ekeme ndinen̄ede nnyene ufọn.
Ndikwọrọ Ikọ ke Ebiet Emi Mme Owo Ẹwakde: Esop ẹkpenyene ndinịm okpokoro ye ukpatn̄kpọ emi ẹdọn̄de n̄wed ke mme itie emi ediwak owo ẹsisan̄ade ẹbe ke efakutom mmọ. (Se Utom Obio Ubọn̄ Nnyịn eke July 2013, p. 4-5, ikp. eki. 4-7.) Edieke mme owo mîwakke aba ke itie kiet, Kọmiti Utom Esop ẹkeme ndidọhọ ẹmen okpokoro m̀mê ukpatn̄kpọ oro ẹka itie en̄wen emi mme owo ẹsiwakde.
Mfiakn̄ka ye Ukpepn̄kpọ Bible: Ndi emekeme ndidiomi mfiakn̄ka ye ukpepn̄kpọ Bible ke ini emi afo ọdiọn̄ọde ke udukwe ediwak owo ukwọrọ ikọ unọ ke ufọk ke ufọk, ke efak, ye ntre ntre eken? Ke uwụtn̄kpọ, edieke ẹsikụtde ediwak owo ke utom ukwọrọikọ eke ufọk ke ufọk ke usenubọk Saturday, emekeme ndika ukpepn̄kpọ Bible ke uwemeyo m̀mê ke mbubreyo. Ke ini mfiakn̄ka, ẹkeme ndidian asuanetop iba emi nditọ ukpepn̄kpọ Bible mmọ ẹdụn̄de ẹkpere mbak mmọ ẹdibiat ẹsan̄a anyan̄ isan̄.
Okposụkedi emi isibatde hour ini ekededi oro ikade ukwọrọikọ, nnyịn isinen̄ede ikop inemesịt edieke inen̄erede ida ini oro ikwọrọ ikọ. Edieke enyenede usụn̄ emi akaduakde ndida n̄kwọrọ ikọ edi ke ini akade ukwe ediwak owo, kpụhọde tọn̄ọ ndikwọrọ ikọ ke usụn̄ efen. Ben̄e Jehovah emi edide “Enyene-idọk” ete an̄wam fi ọfiọk se akpanamde mbak ini oro odude ke an̄wautom editatak!—Matt. 9:38.