Ben̄e Idem Ndinam Mme Mbet
1. Nso ke ikpanam man ẹnyan̄a mme owo?
1 Ibatutom 2014 owụt ke ikọt Abasi ẹnen̄ede ẹsịn ifị̇k ẹnam utom Abasi ẹnyụn̄ ẹbiere ndikwọrọ eti mbụk Obio Ubọn̄. (Matt. 24:14) Nnyịn imọkwọrọ ikọ inọ ata ediwak owo idahaemi ikan nte ikesikwọrọde. Imọkwọrọ ke ufọk ke ufọk ye ke ebiet emi mme owo ẹnen̄erede ẹwak, inyụn̄ isinọ mme owo n̄wedikot ye mme tract. Edi man ẹnyan̄a mme owo, ana ikpep mmọ Bible man mmọ ẹkabade ẹdi mbet Jesus.—1 Tim. 2:4.
2. Mme mbụme ewe ẹdinam nnyịn isiben̄e idem nditọn̄ọ ukpepn̄kpọ Bible ye mme owo?
2 Ben̄e Idem Nditọn̄ọ Ukpepn̄kpọ Bible: Edieke owo amade ukwọrọikọ nnyịn, ndi emesidọhọ enye ọnọ fi nọmba fon esie, onyụn̄ etịn̄ ebiet emi enye odụn̄de man ọsọsọp aka ọkọtọn̄ọ ndikpep enye Bible? Ke akpa ini emi ikwọrọde ikọ inọ owo, imesiwụt enye nte isikpepde Bible. Ndi emeti akpatre ini emi akanamde oro? Ndi emeti akpatre ini emi okowụtde owo ke afan̄ magazine fo nte isikpepde owo Bible? Nnyịn imesiwụt mme owo vidio mbiba emi, Ntak Emi Ekpekpepde Bible? ye Ẹsikpep Owo Bible Didie? Ndi afo emesitiene owụt mbon itieutom mbufo, nditọ ufọkn̄wed mbufo, mbọhọidụn̄ mbufo, mbon mbufo, ye mbon eken emi afo ọdiọn̄ọde mme vidio emi? Ke ini adade ukpatn̄kpọ emi ẹdọn̄de n̄wed ọkwọrọ ikọ, ndi emesidọhọ mbon oro ẹdide ẹdimen n̄wed ke imesitie ye mme owo ikpep Bible ke mfọn?
3. Nso ke oyom inam man ikeme ndikpep owo n̄kpọ ọfọn?
3 Jehovah ye Jesus Ẹn̄wam Nnyịn: Jesus ndikọdọhọ “ẹka” ẹkenam mme mbet, owụt ke oyom inen̄ede isịn ifịk ika ibịne mme owo utu ke nditetie mbet mmọ ẹdi ẹbịne nnyịn. Enye ama ọn̄wọn̄ọ ke iyan̄wam nnyịn. (Matt. 28:19, 20) Jehovah ọnọ nnyịn edisana spirit esie ye mme n̄kpọ oro ididade inam utom emi. Enye ekpep nnyịn n̄ko nte idikpepde mme owo akpanikọ. (Zech. 4:6; 2 Cor. 4:7) Imekeme ndiben̄e enye ọnọ nnyịn odudu onyụn̄ an̄wam nnyịn ima ndinam akpan utom emi.—Phil. 2:13.
4. Ntak emi ikpeben̄ede idem ndinam mme mbet?
4 Utom ukwọrọikọ esinam esịt enem nnyịn. Edi isinen̄ede ikop inemesịt ke ini ikpepde owo akpanikọ inyụn̄ in̄wamde enye etiene nnyịn asan̄a ke ‘usụn̄ oro adade esịm uwem.’ (Matt. 7:14; 1 Thess. 2:19, 20) Edieke inen̄erede iben̄e idem ndinam mme mbet, iyanam Jehovah enem esịt sia enye ‘iyomke baba owo kiet atak edi oyom kpukpru owo ẹkabade esịt.’—2 Pet. 3:9.