Ekebe Mbụme
◼ Ndi ọfọn mme asuanetop ndida Intanet n̄kwọrọ ikọ nnọ mme owo ke idụt en̄wen m̀mê n̄kpep mmọ n̄kpọ?
Ndusụk mme asuanetop ke idụt en̄wen ẹsida Intanet ẹkpep mme owo Bible ke idụt emi ẹkpande utom nnyịn m̀mê ke idụt emi mme asuanetop mîwakke. Ndusụk ini, emi esinyene ufọn. Edi mme asuanetop ndida e-mail m̀mê Intanet nneme nneme ye mme owo emi mmọ mîdiọn̄ọke esisịn mmọ ke mfịna. (Se Utom Obio Ubọn̄ Nnyịn eke July 2007, page 3.) Eyenete eren m̀mê n̄wan ekeme ndikere ke emi ayanam ikwọrọ ikọ inọ mbon oro ẹmade Abasi, edi emi ekeme ndinam mmọ ẹdụk idiọk ndụk m̀mê ẹdian idem ye mbon mfiakedem. (1 Cor. 1:19-25; Col. 2:8) N̄ko, ke mme idụt emi ẹkpande utom nnyịn, ukara ẹsidụn̄ọde kpukpru etop emi ẹnọde mme owo, edide ke fon m̀mê ke Intanet, ndien emi ekeme ndisịn nditọete nnyịn ke idụt oro ke mfịna. Ke ntre, ikpanaha mme asuanetop ẹka Intanet ẹkekwọrọ ikọ ẹnọ mbon emi ẹtode idụt en̄wen.
Edieke ikwọrọde ikọ inọ owo emi otode idụt en̄wen edi idụt nnyịn, ikpanaha ida Intanet ika iso ikpep enye n̄kpọ ke enye ama ọkọnyọn̄, ibọhọke n̄kọk itieutom ẹdọhọ inam ntre. Utu ke oro, ọfọn iwụt enye nte enye ekemede ndika jw.org n̄kekpep nsio nsio n̄kpọ ye nte enye ekemede ndiwet n̄kọk itieutom emi ẹsede ẹban̄a idụt emi enye odude. Imekeme n̄ko ndidọhọ enye esidụk mbono esop ke Ufọkmbono Obio Ubọn̄ emi ekperede enye. Imọfiọk ke Ufọkmbono Obio Ubọn̄ nnyịn idụhe ke ndusụk idụt. Ntem edieke enye oyomde Mme Ntiense Jehovah ke idụt esie ẹsidineme Ikọ Abasi ye enye, imekeme ndiwet n̄kpọ nyọhọ Please Follow Up (S-43) nyak nnọ ewetn̄wed esop nnyịn, ndien enye ayaka jw.org ọkọnọ etop oro aka nnennen itie. N̄kọk itieutom emi ẹsede ẹban̄a idụt emi owo oro odude ẹnen̄ede ẹdiọn̄ọ n̄kpọ ẹban̄a idụt oro ẹnyụn̄ ẹdiọn̄ọ nte ẹdisan̄ade isobo ye enye man ẹka iso ẹkpep enye Bible.—Se Utom Obio Ubọn̄ Nnyịn eke June 2014, page 7, ye eke November 2011, page 4.
Edieke owo emi ikpepde Bible idahaemi ọwọrọde aka idụt en̄wen, mîdịghe edieke inyenede owo ke idụt en̄wen emi isidade Intanet ikpep enye n̄kpọ idahaemi, ẹyak inam se ẹdọhọde ke ẹnyọn̄ emi. Edi kan̄a ke emi, imekeme ndika iso nneme n̄kpọ ke Bible ye enye tutu asuanetop ke idụt oro ọtọn̄ọ ukpepn̄kpọ ye enye. Edieke enye odude ke idụt emi ẹkpande utom nnyịn, ana inen̄ede ikpeme nte isidade leta, fon, ye Intanet ineme n̄kpọ ke Bible ye enye.—Matt. 10:16.