Nam Se Ekpepde Odụk Mme Owo Esịt
1. Nso ke ukpepn̄kpọ Jesus ekesinam ọnọ mme owo?
1 Ikọ Jesus Christ ama esidụk mme owo esịt. Enyene ini emi esịt ekenen̄erede enem mbet esie ke ntak emi enye akanamde Ikọ Abasi enen̄ede an̄wan̄a mmọ. (Luke 24:32) Sia ọfọnde owo ebiere ke idemesie ndikop uyo Abasi, didie ke ikeme ndinam se ikpepde owo odụk enye esịt man enye anam ukpụhọde ke uwem esie?—Rome 6:17.
2. Didie ke usọ ye mbụfiọk ẹkeme ndin̄wam nnyịn inam ikọ Abasi odụk owo esịt?
2 Da Usọ ye Mbụfiọk Kpep Owo N̄kpọ: Ndinyụn̄ ndọhọ owo nam emi kûnam oko isinamke ediwak owo ẹnam se ẹdọhọde. Ndikot ediwak itie Bible emi owụtde ke se owo enịmde idịghe akpanikọ edikam ananam enye etre ndikpan̄ utọn̄ nnọ nnyịn. Edieke iyomde ikọ Abasi odụk owo esịt, ana ibem iso ifiọk ntak emi enye enịmde se enye enịmde ye se inamde enye anam se enye esinamde. Imekeme ndibụp enye mme mbụme emi ẹdinamde enye etịn̄ se enye ekerede. (N̄ke 20:5) Ini emi ndien ke ididiọn̄ọ itien̄wed Abasi emi edifọnde ye enye. Ntem ana inen̄ede iwụt ke imama enye inyụn̄ inyene ime ye enye. (N̄ke 25:15) Ẹti ke owo ye owo idịghe ukem. Nte owo kiet esịnde ifịk anam n̄kpọ Abasi ọkpụhọde ye nte owo efen esịnde ifịk anam. Nọ mmọ ini man edisana spirit Jehovah anam utom ke esịt mmọ onyụn̄ anam mmọ ẹkpụhọde.—Mark 4:26-29.
3. Nso ke ikeme ndinam man in̄wam mbon oro ikpepde n̄kpọ ẹnyene nti edu?
3 N̄wam Mmọ Ẹnyene Nti Edu: Imekeme ndikot mme itien̄wed Abasi oro aban̄ade eti ido ye ima emi Jehovah enyenede, man an̄wam mmọ ẹnyene nti edu. Imekeme ndikot utọ itie N̄wed Abasi nte Psalm 139:1-4 m̀mê Luke 12:6, 7 inọ mmọ man mmọ ẹkụt ke Abasi ekere aban̄a nnyịn owo kiet kiet. Ke ini owo ọtọn̄ọde ndikụt nte Jehovah ọfọnde ido onyụn̄ amade enye, emi ayanam enye ọdọdiọn̄ ama Jehovah onyụn̄ esịn ukeme anam n̄kpọ esie. (Rome 5:6-8; 1 John 4:19) N̄ko ke ini mmọ ẹdiọn̄ọde ke se mmimọ inamde ebehe Jehovah, mmọ ẹyema ndinam se idinemde enye esịt ye se idinamde mme owo ẹkpono enye.—Ps. 78:40, 41; N̄ke 23:15.
4. Ke ini ikpepde mme owo n̄kpọ, nso ke ikpanam man mmọ ẹbiere ke idemmọ ndinam n̄kpọ Abasi?
4 Jehovah inyịkke-nyịk owo ndomokiet okop uyo esie. Utu ke oro, enye akam owụt mme owo ntak emi ọfọnde ndida item esie ndu uwem. (Isa. 48:17, 18) Nnyịn iwụt ke ikpebe Jehovah ke ini in̄wamde mme owo ẹbiere ke idemmọ se mmọ ẹdinamde. Ke ini mme owo ẹbierede ke idemmọ ndinam n̄kpọ Abasi, mmọ ẹyeka iso ẹnam oro ke ofụri esịt. (Rome 12:2) Emi oyonyụn̄ anam mmọ ẹnen̄ede ẹkpere Jehovah emi ‘esidụn̄ọrede esịt’ owo.—N̄ke 17:3.