Se Ikpadade Mme N̄kpọ Oro Ẹkotde Ẹdọn̄ ke jw.org Inam
1. Ke ẹsiode mme n̄wed nnyịn ẹfep, nso en̄wen ke inyene?
1 Esinem ediwak owo ndikot ikọ akpanikọ oro odude ke jw.org. (Eccl. 12:10) Edi, ndi afo emesikpan̄ utọn̄ okop se ẹkotde ẹdọn̄ ke jw.org, onyụn̄ ada enye an̄wam mbon en̄wen? Mme n̄kpọ emi ẹn̄wam nnyịn ikpan̄ utọn̄ ikop ediwak n̄kpọ oro ẹdude ke ikpehe Intanet nnyịn. Didie ke se ẹkotde ẹdọn̄ do ẹkeme ndin̄wam nnyịn?
2. Didie ke mme n̄kpọ oro ẹkotde ẹdọn̄ ke jw.org ẹkeme ndin̄wam ke ukpepn̄kpọ idem nnyịn ye ke ukpepn̄kpọ ubon?
2 Ọfọn Ndida Nnam Ukpepn̄kpọ Idem Nnyịn ye Ukpepn̄kpọ Ubon: Ẹkot Bible, Enyọn̄-Ukpeme, Ẹdemede! ye mme n̄kpọ eken ẹdọn̄ ke jw.org. Ntre ọkpọfọn ida ini oro ikade isan̄ ye ini oro inamde mme n̄kpọ eken ikpan̄ utọn̄ ikop mmọ. (Eph. 5:15, 16) N̄kpọ en̄wen oro ikemede ndinam ke ini utuakibuot ubon edi ndikama mme n̄wed emi ẹkotde ẹdọn̄ ke jw.org, nnyụn̄ nse nte ẹkotde mmọ. Ndikop se ẹkotde ẹdọn̄ ke jw.org ke ini ikpepde n̄kpọ ke idem nnyịn eyenen̄ede anam ikot n̄wed ọfọn onyun̄ an̄wam nnyịn edieke ikpepde usem en̄wen.
3. Mmanie ke efakutom nnyịn ke ikpanam ẹkop mme n̄kpọ oro ẹkotde ẹdọn̄ ke jw.org?
3 Ọfọn Ndida N̄kwọrọ Ikọ: Mme owo ke efakutom nnyịn oro ẹsikerede ke mmimọ inyeneke ini ndikop ukwọrọikọ, ẹkeme ndima ndikop mme n̄kpọ oro ẹkotde ẹdọn̄ ke jw.org. N̄ko, imekeme ndikụt mbon oro ẹsemde usem en̄wen oro ẹkpemade ndikop mme n̄kpọ emi ke “usem emana” mmọ. (Utom 2:6-8) Ke ndusụk itie, mme owo ẹsikam ẹma ndikpakpan̄ utọn̄ n̄kop se ẹtịn̄de. Ke uwụtn̄kpọ, ikpọ owo mbon Hmong ke China ẹsima ndibụk mbụk nnọ nditọ mmọ, ndien nditọ emi ẹsima ndikpan̄ utọn̄, ẹsinyụn̄ ẹnen̄ede ẹti se mmọ ẹkopde. Ediwak owo ke Africa ẹsima ndikpan̄ utọn̄ n̄kop mbụk nnyụn̄ n̄kpep n̄kpọ.
4. Edieke iyomde ndin̄wam mme owo ke efakutom nnyịn, mme mbụme ewe ke ikpobụp idem nnyịn?
4 Ndi mme owo ke efakutom mbufo ẹkpema ndikop se ẹkotde ẹdọn̄ ke jw.org ke usem mmọ? Ndi imekeme ndinọ n̄kpọ oro ẹkotde ẹdọn̄ ke jw.org ẹsọk owo ke e-mail? Ndi imekeme ndisio n̄wed oro ẹkotde esịn ke jw.org nsịn ke CD nnọ owo, inyụn̄ inọ enye n̄wed oro idian? Edieke osiode ofụri n̄wed, tract, ediye ekpri n̄wed, Enyọn̄-Ukpeme m̀mê Ẹdemede! ke jw.org ọnọ owo ke fon, tablet m̀mê n̄kpọ en̄wen, emekeme ndibat enye nte n̄wed oro enịmde. Ẹdọn̄ mme n̄kpọ emi ke jw.org man isida inam ukpepn̄kpọ idem nnyịn inyụn̄ ida in̄wam mme owo ẹkop Ikọ Abasi.—1 Cor. 3:6.