Da Mme Prọfet Nte Uwụtn̄kpọ—Habakkuk
1. Ntak emi ikemede nditịn̄ ukem se Habakkuk eketịn̄de?
1 Nsọn̄ọn̄kpọ ye ibak oro ẹdude ke ererimbot emi ẹkeme ndinam etie nnyịn nte eketiede Habakkuk, emi okobụpde Jehovah ete: “Ntak emi afo anamde mi n̄kụt se idiọkde, onyụn̄ osụk esede idiọkido?” (Hab. 1:3; 2 Tim. 3:1, 13) Edieke itiede ikere se Habakkuk ekewetde ye eti uwụtn̄kpọ oro enye ekenịmde, emi ayan̄wam nnyịn isọn̄ọ ida inam n̄kpọ Jehovah nte isụk ibetde usen ubiereikpe esie.—2 Pet. 3:7.
2. Nso ke ana inam ndiwụt ke imenyene mbuọtidem mfịn?
2 Nyene Mbuọtidem: Utu ke nditie nseme idem, Habakkuk ama esịn idem anam n̄kpọ Abasi onyụn̄ odu ke ukpeme. (Hab. 2:1) Jehovah ama ọn̄wọn̄ọ ọnọ Habakkuk ete ke ikọ imọ oyosu ke edikem ini, ye nte ke “edinen owo edidu uwem oto ke mbuọtidem esie.” (Hab. 2:2-4) Nso ke emi ekpep nnyịn mme Christian oro idude uwem ke ukperedem ini emi? Ekpep nnyịn nte ke ndinịm ke utịt eyedi ọfọn akan nditie mfịna idem mban̄a ini emi utịt edidide. Mbuọtidem ayanam nnyịn idu ke ukpeme, inyụn̄ isịn idem ikwọrọ ikọ.—Heb. 10:38, 39.
3. Ntak emi anade ika iso inam n̄kpọ Jehovah ye idatesịt?
3 Nam N̄kpọ Jehovah ye Idatesịt: Ke ini Gog isọn̄ Magog adade en̄wan ebịne ikọt Jehovah, iyowụt m̀mê imenen̄ede ibuọt idem ye Jehovah. (Ezek. 38:2, 10-12) Ekọn̄ esinam n̄kpọ ọsọn̄ ke obio, n̄kpọ esinyụn̄ ọsọn̄ ye mbon emi ẹkande ke ekọn̄ oro. Uwem isimemke, udia ekeme ndinana, inyene onyụn̄ ekeme nditak. Idinam n̄kpọ didie edieke mme n̄kpọ emi ẹwọrọde nnyịn? Habakkuk ama ọdiọn̄ọ ke n̄kpọ ọyọsọn̄, ntre, enye ama ebiere ndika iso nnam n̄kpọ Jehovah ye idatesịt. (Hab. 3:16-19) Ndinam n̄kpọ Jehovah ye “idatesịt” ayan̄wam nnyin n̄ko ndiyọ idomo ekededi oro idisobode.—Neh. 8:10; Heb. 12:2.
4. Nso edidiọn̄ ke idinyene ke ini iso, ndien nso ke ikpanam idahaemi?
4 Ẹyeka iso ẹkpep mbon oro ẹbọhọde Armageddon nte ẹkpedude uwem emi Jehovah amade. (Hab. 2:14) Mbon oro ẹdinamde ẹset n̄ko ẹyekpep n̄kpọ ẹban̄a Jehovah. Ẹyak ida ini ekededi oro inyenede idahaemi, ikpep mme owo n̄kpọ iban̄a Jehovah ye mme utịbe utom esie!—Ps. 34:1; 71:17.