Ndi Omokụt Mme Edu Abasi ke Mme N̄kpọ Oro Enye Obotde?

Ke ini okụtde ediye flawa, ntantaọfiọn̄ ke ikpaenyọn̄, m̀mê mmọn̄ emi otopde ọwọrọ ke enyọn̄ akamba itiat, ndi emesiti ke Abasi okobot kpukpru oro? Imekeme ndikụt mme edu Abasi ke mme n̄kpọ oro enye okobotde. (Ro 1:20) Ke ini itiede ikere iban̄a mme n̄kpọ-obot, imesikụt ke Abasi enyene odudu ye ọniọn̄, ama nnyịn, esinọ nnyịn se iyomde, esinyụn̄ anam se inende kpukpru ini.—Ps 104:24.

Ewe ke otu mme n̄kpọ emi Jehovah okobotde ke esikụt kpukpru usen? Idem ọkpọkọm odụn̄ ke akwa obio, omosụk ekeme ndikụt eto ye inuen. Nditịm nse mme n̄kpọ oro Jehovah okobotde ekeme ndinam esịt okûnen̄ede etịmede nnyịn, anam ikûkere uban̄a mfịna nnyịn ukaha, onyụn̄ anam itetịm inịm ke Jehovah eyese aban̄a nnyịn ke nsinsi nsinsi. (Mt 6:25-32) Edieke enyenede nditọ, nam mmọ ẹfiọk mme edu Jehovah. Nte ifiọkde n̄kpọ iban̄a nsio nsio n̄kpọ oro Abasi okobotde, ntre ke iditetịm ikpere enye.—Ps 8:3, 4.

ẸSE VIDIO ORO MME N̄KPỌ-OBOT ẸWỤT UBỌN̄ ABASI—UN̄WANA YE KỌLỌ, EKEM ẸBỌRỌ MME MBỤME EMI:

• Nso isinam ikeme ndikụt nsio nsio kọlọ?

• Nso isinam ndusụk n̄kpọ ẹkpụhọde kọlọ ẹtiene nte ẹwọn̄ọrede mmọ ẹnịm?

• Nso isinam ikụt nsio nsio kọlọ ke ikpaenyọn̄?

• Ewe ediye kọlọ ke okụt ke n̄kpọ-obot emi odude ekpere ufọk fo?

• Ntak emi ọfọnde ndisida ini nse mme n̄kpọ oro Abasi okobotde?