Mmọ Ẹma Ẹkụt ke Ẹma Mmimọ Ata Ima

YOMARA ye nditọeka esie irenowo iba emi ẹkerede Marcelo ye Hiver ẹdụn̄ ke ekpri obio kiet ke Guatemala. Yomara ekebem iso ekpep Bible ye Mme Ntiense Jehovah, aka ko, nditọeka esie ẹma ẹtiene ẹkpep. Edi mfịna emi okodude edi ke nditọeka ita oro ẹkedi nnan, mmọ ikonyụn̄ ikemeke ndikot braille m̀mê n̄wed mme nnan. Ntre, akana brọda emi esikpepde mmọ Bible okot itie emi mmọ ẹyomde ndikpep ye mme itie Bible emi ẹdọn̄ọde do ọnọ mmọ.

Mfịna en̄wen ekedi ke ama esisọn̄ mmọ ndidụk mbono esop. To ke ufọk mmọ sịm Ufọkmbono Obio Ubọn̄ emi ekekperede mmọ akan ekedi minit 40, mmọ ikesinyụn̄ ikemeke ndisan̄a ikpọn̄ n̄ka. Edi nditọete ẹma ẹsimen mmọ ẹka kpukpru mbono esop. Ini ẹketọn̄ọde ndinọ mmọ n̄kpọ ẹnam ke mbono esop ufọturua, nditọete ẹma ẹsin̄wam mmọ ẹmụm nte mmọ ẹdinamde n̄kpọ oro ẹdọn̄ ke ibuot.

Ke May 2019, ẹma ẹtọn̄ọ ndinịm mbono esop ke obio mmọ. Mbemiso ini oro, ebe ye n̄wan emi ẹdide mme asiakusụn̄ ofụri ini ẹma ẹwọrọ ẹkedụn̄ ke obio oro. Mmọ ikọdiọn̄ọke ndikot braille m̀mê ndiwewet, edi mmọ ẹma ẹbiere ndikpep nditọeka ita oro ndikot braille nnyụn̄ n̄wewet. Mmọ ẹma ẹka itie ubon n̄wed kiet ẹkeyom mme n̄wed emi ẹtịn̄de n̄kpọ ẹban̄a braille man ẹkpep ẹdiọn̄ọ, ẹnyụn̄ ẹkeme ndikpep mbon efen.

Ke ufan̄ ọfiọn̄ ifan̄, nditọeka ita oro ẹma ẹkeme ndikot braille ata mfọn mfọn; oro ama an̄wam mmọ ẹnen̄ede ẹkpere Jehovah.a Yomara, Marcelo, ye Hiver ẹdidi mme asiakusụn̄ ofụri ini. Marcelo edi asan̄autom unamutom. Usen ibehe emi mûdukwe mmọ ẹnamde n̄kpọ Jehovah. Ifịk mmọ anam nditọete eken ẹtiene ẹnen̄ede ẹsịn idem ẹnam n̄kpọ Jehovah.

Enem nditọeka ita oro nte nditọete ẹmade ẹnyụn̄ ẹn̄wamde mmọ. Yomara ọdọhọ ete: “Toto ke akpa ini emi ikosobode Mme Ntiense Jehovah, mmọ ẹwụt ke ima nnyịn ata ima.” Marcelo adian do ete: “Imenyene nti ufan ke esop nnyịn, inyụn̄ isịne ke otu ikọt Abasi emi ẹdianade kiet ke ofụri ererimbot, ẹnyụn̄ ẹmade idemmọ.” Yomara ye nditọeka esie ẹtetie ẹbet usen emi mmọ ẹdikụtde nte Jehovah anamde isọn̄ emi akabade Paradise.​—Ps. 37:10, 11; Isa. 35:5.