IBUOTIKỌ IKPAEDEM | UFỌN UWEM EMI-E?
1 N̄kpọ Ẹsikpụhọde
“Ẹfịk nnyịn ke kpukpru usụn̄, edi ufan̄ ifahake nnyịn ibe nde; ekikere etịmede nnyịn, edi usụn̄ ubọhọ inanake ofụri ofụri.”—2 CORINTH 4:8.
Ẹdọhọ ke uwotidem etie nte owo ndida usọbọ emi okponde akan udọn̄ọ esie. Akamba mfịna emi afo enyenede ekeme nditre ke ini emi mûkodorike enyịn—ọkpọkọm mfịna emi ekerede ke imọ idikemeke ndinam n̄kpọ ndomokiet mban̄a. Ekeme ndisọn̄ fi ndinịm, edi emi ekeme nditịbe.—Se ekebe oro, “Mfịna Mmọ Ikedịghe ke Nsinsi.”
Idem ekpededi mfịna emi ikụreke ke ini emi okodoride enyịn, nam se ekemede ke usen ke usen. Jesus ọkọdọhọ ete: “Ẹkûtịmede esịt ẹban̄a n̄kpọn̄, koro n̄kpọn̄ eyenyene editịmede esịt esie. Afanikọn̄ usen ekem ye usen.”—Matthew 6:34.
Edi akpanam nso edieke ọdiọn̄ọde ke mfịna fo idikụreke? Yak idọhọ ke ọdọn̄ọ udọn̄ọ emi mîmaha ndikụre, mîdịghe ndọ fo asuana, mîdịghe owo fo akpa. Emekeme ndikere ke inyeneke se ekemede ndinam.
Ọkpọkọm edi ntre, omosụk ekeme ndinam n̄kpọ. Akpa, kûnen̄ede utịmede esịt sia ufọn idụhe nditie ntịmede esịt mban̄a se mûkemeke ndinyan̄a. (Mme N̄ke 15:15) Ọyọhọ iba, domo ndiyọ mfịna oro utu ke ndidomo ndiwot idem. Ama anam ntre, eyekeme ndiyọ n̄kpọ emi eketiede nte udûkemeke ndiyọ.—Job 2:10.
TI ke ukemeke ndifrọ ikpat kiet ndọk obot, edi emekeme ndidọk enye sụn̄sụn̄ tutu ọdọk ama. Kpa ntre ke edinam ye mme mfịna oro enyenede, ọkpọkọm mmọ ẹkpon adan̄a didie.
SE AKPANAMDE: Tịn̄ mfịna fo nọ ufan m̀mê iman fo. Enye ekeme ndin̄wam fi ọdiọn̄ọ se akpanamde.—Mme N̄ke 11:14.