SE ITỊBEDE KE ERERIMBOT

United States

N̄kpọ emi ntaifiọk ẹsiode ẹdi emi mme bodisi ẹsidade ẹbịne moto

Enyene n̄kpọ emi ntaifiọk ẹsiode ẹdi emi mme bodisi ẹdade ẹbịne moto. Ẹsisịn n̄kpọ emi ke iso moto mme bodisi, ndien enyene n̄kpọ emi ẹdifịkde ke esịt moto emi ndien enye osio n̄kpọ emi etiede nte itiatikan̄ odudu odudu akadian ke moto emi mmọ ẹbịnede. N̄kpọ oro ama adadiana ke moto oro mmọ ẹbịnede, mmọ ẹkeme ndida kọmputa ndiọn̄ọ ebiet emi moto oro odude ẹnyụn̄ ẹwat sụn̄sụn̄ ẹkemụm enye.

India

Ndụn̄ọde oro ẹnamde owụt ke ẹsiwot n̄wan kiet kpukpru hour ke ntak utọk n̄kpọ ndọ. Okposụkedi emi ukara ẹkpande owo ndinọ m̀mê ndibọ n̄kpọ ndọ, ke 2012 ẹma ẹwot iban ẹbe 8,200 ke ntak emi ebe m̀mê ubon mmọ ẹkerede ke n̄kpọ ndọ emi n̄wan esie ọkọnọde ikemke.

Switzerland

Enyene akadan̄abasi emi odude ke Switzerland emi ekemede ndife ọfiọn̄ itiokiet ye ubak ituakke ida. Ekpri n̄kpọ emi ntaifiọk ẹkediande ke idem akadan̄abasi ita emi ẹketode Switzerland ẹka Africa akanam mmọ ẹdiọn̄ọ ke inuen emi ẹkefe ẹbịghi ntem. Mbemiso ini emi, ẹkesikere ke unam mmọn̄ kpọt ẹkeme ndinam isan̄ mbịghi ntem ituakke ida.

EDEM USIAHAUTỊN AFRICA

Ibat nsụn̄ikan̄ emi mme inọ ẹsibọde ye okụk oro ẹsikpede man ẹfiak ẹyak ẹnọ mme andinyene

Ọtọn̄ọde ke April 2005 esịm December 2012, mme inọ ẹma ẹbọ nsụn̄ikan̄ 179 ke mme esụk edem usiahautịn Africa. World Bank ẹdọhọ ke ẹkekpe n̄kpọ nte miliọn dollar 413 nte ufak man ẹfiak ẹyak nsụn̄ikan̄ emi ẹnọ mme andinyene.