Ndi Ererimbot Emi Abiara Ama? Afo Ekere Didie?

KE January 2017, ntaifiọk ẹma ẹtịn̄ n̄kpọ emi akanamde esịt etịmede ediwak owo. Mmọ ẹkedọhọ ke ata akamba afanikọn̄ emi ekemede ndisobo ofụri ererimbot enen̄ede ekpere. Mmọ ẹkeda n̄kpọ emi ẹkotde N̄kanika Usen Nsobo ẹwụt emi. Mmọ ẹma ẹsịk ubọk n̄kanika oro ẹkenịm ke ayakde minit 2 ye sekọn 30 ndimia 12 okoneyo. Mmọ ẹdọhọ ke n̄kanika oro ama amamia 12, ke ererimbot emi eyebe efep. Ke se ibede isua 60 idahaemi, idụhe ini emi ubọk n̄kanika oro ekperede ini nsobo ntem.

Ntaifiọk ẹdọhọ ke ima isịm 2018, ke mmimọ iyafiak ise m̀mê imekpere utịt ererimbot emi ikan nte ikperede idahaemi. Ndi ubọk N̄kanika Usen Nsobo oro edisụk iwowụt ke imenen̄ede ikpere ini emi ata akamba afanikọn̄ edisobode ofụri ererimbot emi? Afo ekere didie? Ndi ererimbot emi abiara ama? Ekeme ndisọn̄ fi ndibọrọ mbụme emi. Ntaifiọk ke idemmọ ẹtịn̄ nsio nsio n̄kpọ ẹban̄a ini iso. Ndien idịghe kpukpru owo ẹnịm ke afanikọn̄ emi edisobode ofụri ererimbot ọmọn̄ etetịbe.

Ediwak owo ẹnịm ke ini iso ọyọfọn. Mmọ ẹdọhọ ke enyene mme n̄kpọ emi anamde mmimọ inịm ke mme owo ẹyedụn̄ ke isọn̄ emi ke nsinsi, ndien ke uwem eyenem etieti ke ini iso. Ndi se mmọ ẹtịn̄de emi edi akpanikọ? Mîdịghe ndi ekere ke ererimbot emi abiara ama?