Nyene Idotenyịn

“IDOTENYỊN EDI . . . ATA AKPAN N̄KPỌ EDIEKE OWO OYOMDE NDIDI UFAN ABASI.” Se n̄wed emi ẹkotde Hope in the Age of Anxiety etịn̄de edi oro. N̄wed oro ọdọhọ n̄ko ke ‘idotenyịn esinam owo okûkop ndịk, okûkere ke eke imọ okụre, okûnyụn̄ okop ndobo.’

Bible ọdọhọ ke oyom nnyịn inyene idotenyịn, edi enye ọdọhọ nnyịn ikûdori enyịn ke owo. Psalm 146:3 ọdọhọ ete: “Ẹkûbuọt idem ye mbọn̄, ẹkûnyụn̄ ẹbuọt ye eyen owo, emi edinyan̄a mîdụhe enye ke ubọk.” Utu ke ndibuọt idem ye owo, akpana ibuọt idem ye Abasi emi okobotde nnyịn, sia enye enyene odudu ndisu kpukpru se enye ọn̄wọn̄ọde. Nso ke enye ọn̄wọn̄ọ ndinam nnọ nnyịn? Se ndusụk mi.

NDIỌI OWO IDIDỤHE ABA, NDIEN NTI OWO ẸYENYENE EMEM KE NSINSI: Psalm 37:​10, 11 ọdọhọ ete: “Ayak esisịt, idiọkowo ididụhe aba. . . . Edi mbon nsụkidem ẹyeda isọn̄ ẹnyene, ediwak emem oyonyụn̄ adat mmọ esịt.” Ufan̄ikọ 29 ọdọhọ ke ‘ndinen owo ẹyedụn̄ ke isọn̄ ke nsinsi.’

EKỌN̄ IDIDỤHE ABA: “Jehovah . . . amanam ekọn̄ etre tutu esịm utịt isọn̄. Obụn̄ utịgha onyụn̄ okpok eduat n̄ken̄e n̄ken̄e; ọfọp mme chariot ekọn̄ ke ikan̄.”​​—Psalm 46:​8, 9.

UDỌN̄Ọ, UFEN, YE N̄KPA IDIDỤHE ABA: “Ebietidụn̄ Abasi omodu ye owo. . . . Enye ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba.”​​—Ediyarade 21:​3, 4.

UDIA OYODU BARASUENE: “Uwak n̄kpasịp [udia] ẹyedu ke isọn̄; ọyọyọhọ ọduọhọ ke mme enyọn̄ obot.”​​—Psalm 72:16.

ETI UKARA EMI EDIKARADE OFỤRI ISỌN̄​​—UKARA CHRIST: “Ẹnọ [Jesus Christ] ukara ye itie ukpono ye obio ubọn̄, ẹte kpukpru owo ye mme idụt ye usem ẹnam n̄kpọ ẹnọ enye. Ukara esie edi nsinsi ukara emi mîdibehe ifep, obio ubọn̄ esie onyụn̄ edi obio ubọn̄ oro owo mîdisoboke.”​​—Daniel 7:14.

Nso inam inịm ke mme un̄wọn̄ọ emi ẹyesu? Ke ini Jesus okodude ke isọn̄, enye ama owụt ke imọ imodot ndidi Edidem Obio Ubọn̄ Abasi. Enye ama ọkọk mme owo udọn̄ọ, ọnọ mme ubuene udia, onyụn̄ anam mme akpan̄kpa ẹset. Se ikam idide akpan n̄kpọ ikan edi ke enye ama ekpep mme owo nti n̄kpọ emi edinamde mmọ ẹdu uwem ke nsinsi ẹnyụn̄ ẹdu ke emem ye kpukpru owo. Jesus ama etịn̄ n̄ko mme n̄kpọ oro ẹditịbede, emi ẹdiwụtde ke utịt ererimbot emi enen̄ede ekpere.

ỌDIỌKDE-DIỌK AKA NDIFỌFỌN

Jesus ọkọdọhọ ke ekọn̄ ye ndutịme ẹyedu ke mme akpatre usen emi. Idiọn̄ọ “akpatre ini editịm n̄kpọ emi,” oro enye ọkọnọde, esịne ekọn̄ ke nsio nsio idụt, akan̄, ndiọi udọn̄ọ, ye ikpọ unyekisọn̄. (Matthew 24:​3, 7; Luke 21:​10, 11; Ediyarade 6:​3-8) Jesus ama ọdọhọ n̄ko ete: “Ke ntak emi ubiatibet editọtde ima ediwak owo eyebịt.”​​—Matthew 24:12.

Imokụt nsio nsio n̄kpọ emi owụtde ke ima ediwak owo ebịt. Apostle Paul, emi eketienede ewet Bible, ama etịn̄ aban̄a emi. Enye ọkọdọhọ ke 2 Timothy 3:​1-5 ete ke “mme akpatre usen,” ke mme owo ẹyema idemmọ ẹkan mbon en̄wen, ẹma okụk, ẹnyụn̄ ẹma udia-uwem. Mme owo ẹyekohode idem ẹnyụn̄ ẹtie obom obom. Mme owo ke ubon idimaha kiet eken, nditọ ẹyenyụn̄ ẹsọn̄ ibuot ye ete ye eka. Mme owo ẹyenam nte ikpono Abasi ke ini edide mmọ ẹnam mbubehe idemmọ.

Ndiọi n̄kpọ emi ẹtịbede ẹwụt ke ererimbot emi ọmọn̄ esesịm utịt. Emi owụt n̄ko ke ukara Obio Ubọn̄ Abasi enen̄ede ekpere. Kop se Jesus eketịn̄de mi aban̄a mme akpatre usen emi idude mi: “[Ẹyekwọrọ] eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt edidi.”​​—Matthew 24:14.

Eti mbụk emi odụri ndiọi owo utọn̄ onyụn̄ ọnọ nti owo idotenyịn; anam nti owo ẹnịm ke mme edidiọn̄ oro Abasi ọn̄wọn̄ọde ẹyesu ke mîbịghike. Ndi akpama ndifiọk n̄kpọ en̄wen mban̄a mme edidiọn̄ emi? Edieke edide ntre, mbọk se se idude ke edem magazine emi.