Kûnam Ufan Ye Mbon Edem Mbufo Kpọt

Ntak Esisọn̄de

Edieke nnyịn mîmaha ndidian idem ye mbon emi mîdịghe mbon edem nnyịn, emi ikerede ke idịghe nti owo, oro ayanam itetịm isari mmọ. Edieke isinamde ufan ye mbon edem nnyịn kpọt, idikere ke nte nnyịn isinamde n̄kpọ ye nte isidude uwem ọfọn akan eke mbon en̄wen.

Se Bible Etịn̄de

“Ẹtat esịt mbufo.”—2 CORINTH 6:13.

Nso ke emi ekpep nnyịn? “Esịt” ada aban̄a nte isikerede n̄kpọ ye nte esitiede nnyịn ke idem. Edieke isimade ndidian idem ye mbon edem nnyịn kpọt, oro ọwọrọ ke nnyịn itatke esịt ima mbon en̄wen nte Bible ọdọhọde. Man inam se Bible ọdọhọde emi, ana isinam ufan ye mbon en̄wen n̄ko, utu ke ndinam ye mbon edem nnyịn kpọt.

Ntak Ọfọnde Inam Ufan ye Mbon En̄wen N̄ko

Ama adian idem ye owo, do ndien ke edidiọn̄ọ ntak emi mmọ ẹsinamde n̄kpọ m̀mê ẹdude uwem nte mmọ ẹdude. Nte ọdiọn̄ọde mmọ aka, ntre ke afo edima mmọ inyụn̄ ida mmọ nte mbon edem mbufo m̀mê ata owo idem fo. Emi ayanam esikere aban̄a mmọ esinyụn̄ atua mmọ mbọm.

Mma kiet emi ekerede Nazaré ama esisari mbon emi ẹtode obio en̄wen ẹdidụn̄ ke obio mmọ. Enye ọdọhọ ete: “Se ikanamde mi ntre ndisari mmọ ekedi ndisisan̄a n̄kpere mmọ, n̄kọm mmọ, nneme nneme ye mmọ nnyụn̄ nnam utom ye mmọ. Emi ama anam mi n̄kụt ke nditọ mbon idiọkke inyụn̄ itiehe nte ediwak owo ẹkerede. Ama anam ufan ye mbon emi ẹtode nsio nsio ebiet, oyokụt ke mmọ itiehe nte ediwak owo ẹkerede. Oro ayanam fi ama mmọ, utu ke ndikere ke owo ama ototo obio emi m̀mê oko, ke idịghe eti owo.”

Se Akpanamde

Yom usụn̄ neme nneme ye mbon emi mîdịghe mbon edem mbufo. Emekeme

Ndidọhọ ke ikpama ndidiọn̄ọ mmọ.
Ndikot mmọ ufọk.
Nditịm n̄kpan̄ utọn̄ ke ini mmọ ẹtịn̄de n̄kpọ ẹban̄a idemmọ ẹnọ fi man ọdiọn̄ọ se mmọ ẹmade.

Edieke afo ọdiọn̄ọde se iketịbede inọ mmọ, ayan̄wan̄a fi ntak emi mmọ ẹdude uwem nte mmọ ẹdude. Ndien emi ayanam fi esịk ekpere mmọ utu ke ndisari mmọ.

Se Ikan̄wamde Ndusụk Owo Ẹtre Asari: Kandasamy ye Sookammah (Canada)

“Ikodu ke South Africa toto ke edet iba. Ini oro asari ama okpon etieti do. Owo ikayakke mfiaowo ye mbubịt ẹdụn̄ ebiet kiet. Emi ama anam asari etetịm ọsọn̄ ubọk. Ima isua mfiaowo etieti sia mmọ ikadaha nnyịn ke n̄kpọ. Nnyịn ikekereke ke se ikanamde oro ekedi asari; ikekere ke mfiaowo ẹkekam ẹsari nnyịn.

“Se ikan̄wamde nnyịn itre asari emi ekedi ndinam ufan ye mbon emi ẹtode nsio nsio ebiet, esịnede mfiaowo. Ke ima ikọtọn̄ọ ndidian idem ye mfiaowo, ima idikụt ke inyeneke se inen̄erede ikpụhọde nnyịn ye mfiaowo; ke se ifịnade mbubịt owo esifịna mfiaowo n̄ko, se iwọrọde mfiaowo esiwọrọ mbubịt owo n̄ko.

“Ima ikam idọhọ ebe ye n̄wan emi ẹkedide mfiaowo ẹdidụn̄ ye nnyịn. Mmọ ẹma ẹdụn̄ ye nnyịn ẹbịghi, ndien emi ama anam itịm idiọn̄ọ mmọ. Ikebịghike, ima itọn̄ọ ndida mmọ nte ufan ye nditọeka nnyịn; mmọ ẹnyụn̄ ẹda nnyịn ntre n̄ko. Emi ama anam nnyịn isuaha mfiaowo inyụn̄ isarike mmọ aba.”