Didie ke Fon Ekeme Ndibiat Ufan Fo ye Owo?
Owo iba emi ẹdụn̄de ke nsio nsio idụt ẹkeme ndida fon ẹnọ kiet eken etop, ẹkot kiet eken, mîdịghe ẹda Intanet ẹkot man ẹkụt kiet eken iso. Ọwọrọ fon enyene ufọn ọnọ mmọ.
Edi mbon emi ẹsidade fon kpọt ẹneme nneme ye mme ufan mmọ . . .
isisọpke nditua owo mbọm.
ẹsiwak ndikop ndobo inyụn̄ ikopke inemesịt.
ẹsinyụn̄ ẹwak ndikere mban̄a idemmọ kpọt utu ke ndikere mban̄a mbon en̄wen.
SE AKPANADE ỌDIỌN̄Ọ
NDITUA OWO MBỌM
Owo emi esituade owo mbọm esinen̄ede ada ini etie ekere aban̄a mbon en̄wen, edi owo emi odụn̄de-dụn̄ ke Intanet idikemeke ndinam oro sia enye esida ofụri ini esie ọnọ mme owo etop onyụn̄ ọdọn̄ nsio nsio n̄kpọ ke Intanet.
Edieke owo ayakde fon adia enye idem, nte ini akade, ndibọrọ etop ufan esie editie nte ata ọkpọsọn̄ utom. Ke ini owo enyenede ediwak etop ndibọrọ, se idibehede enye edi ndibọrọ etop oro, m̀mê edi akpan n̄kpọ m̀mê idịghe. Ekeme ndinam enye ikwe ke ufan imọ oyom un̄wam.
KERE ISE: Didie ke ekeme ndiwụt ke ‘emekere aban̄a’ owo ke ini adade fon ọnọ enye etop?—1 PETER 3:8.
NDIKOP NDOBO
Ndụn̄ọde oro ẹkenamde owụt ke esịt isinemke ndusụk owo ke mmọ ẹma ẹkese se mme owo ẹdọn̄de ke Intanet. Ẹdọhọ ke n̄kpọ kiet emi ẹsinamde edi ntre edi ke esitie nte ke mmọ ẹkebiat ini ẹnam n̄kpọ emi mînyeneke ufọn.
N̄ko, nditie nse ndiye n̄kpọ emi mme owo ẹkedọn̄de ke Intanet ekeme ndinam ndusụk owo ẹtọn̄ọ ẹkere m̀mê eke mmimọ edidi nso usen. Oro ekeme ndinam owo ekere ke kpukpru owo ke ẹdia uwem, sụk imọ kpọt ke uwa ata.
KERE ISE: Nso ke akpanam man udûmen idemfo udomo ye mbon en̄wen ke ini esede se mmọ ẹdọn̄de ke Intanet?—GALATIA 6:4.
NDIKERE MBAN̄A IDEM
Titia kiet ọkọdọhọ ke ndusụk nditọ ufọkn̄wed imọ ẹsikere ẹban̄a idemmọ kpọt, ẹsinyụn̄ ẹyom mme ufan emi ẹdinamde n̄kpọ inọ mmọ kpọt. Utọ owo oro isikereke se enye n̄ko ekemede ndinam nnọ mbon en̄wen. Edieke owo mîkpemeke, enye ekeme ndida ufan esie nte masịn emi edide ini enye amade emen anam n̄kpọ, mîmaha esịk enịm n̄kan̄ kiet.
KERE ISE: Ndi mme n̄kpọ emi afo esidọn̄de ke Intanet owụt ke odomo idem ye mme owo m̀mê ke amada idemfo ke n̄kpọ akaha?—GALATIA 5:26.
SE AKPANAMDE
FIAK SE INI ESIDADE EFỊK FON
Edieke mûyakke fon adia fi idem, eyenyene ini esikot onyụn̄ eneme nneme ye ufan fo, ndien emi ayanam mbufo ẹnen̄ede ẹkpere kiet eken.
SE BIBLE ỌDỌHỌDE: ‘Ima isiyomke ufọn idemesie.’—1 CORINTH 13:4, 5.
Mek mme n̄kpọ emi oyomde ndinam, mîdịghe wet okwo ke idak emi.
Nyesiyom usụn̄ nneme nneme ye owo iso ye iso utu ke ndinọ enye etop kpukpru ini
Mfịkke fon ke ini nnemede nneme ye owo
Nsio urua ke ini emi nsidade nse se mme owo ẹdọn̄de ke Intanet
Nsinen̄ede n̄kpan̄ utọn̄ ke ini owo etịn̄de ikọ ọnọ mi
N̄kot mîdịghe n̄ka n̄kese ufan mi emi enyenede mfịna