Didie ke Fon Ekeme Ndibiat Ekikere Fo?

Edi, esisọsọn̄ mbon emi ẹyakde fon adia mmọ idem . . .

• ndida ini n̄kot n̄wed.

• nditịn̄ enyịn nnam n̄kpọ kiet nsio.

• ndinyụn̄ ntie ikpọn̄, ikopke ndobo.

SE AKPANADE ỌDIỌN̄Ọ

NDIKOT N̄WED

Mbon emi ẹyakde fon adia mmọ idem isinyeneke ime itie ikot ofụri se ẹwetde, ẹsinyụn̄ ẹtotop enyịn ẹse n̄kpọ ifan̄ ẹbe.

Idiọkke nditop enyịn nse se ẹwetde ke ini oyomde n̄kpọ usọp usọp, edi edieke oyomde se okotde an̄wan̄a fi, ana enen̄ede ada ini okot.

KERE ISE: Ndi emesikot n̄wed ebịghi? Didie ke ndida ini n̄kot n̄wed ekeme ndin̄wam fi enen̄ede ọfiọk se okotde?—MME N̄KE 18:15.

NDITỊN̄ ENYỊN

Ndusụk owo ẹdọhọ ke fon esin̄wam mmimọ inam n̄kpọ iba ukem ini, ke uwụtn̄kpọ, ke ikpep n̄kpọ ke inọ ufan mmimọ etop. Edi ti ke owo isikamake n̄kpọ ubọk iba idọk enyọn̄. Ntre ọsọsọn̄ ndinam n̄kpọ iba ukem ini.

Kpa ye esisọn̄de ndusụk owo nditịn̄ enyịn n̄kpep n̄kpọ, ndinam oro esinam se ikpepde enen̄ede an̄wan̄a nnyịn. N̄kaiferi emi ekerede Grace ọdọhọ ke ama etịn̄ enyịn okot n̄wed ke udunen̄ekede unam ndudue, ke idinyụn̄ inen̄ekede ikak fi. Enye ọdọhọ ke ọfọn nditịn̄ enyịn nnam n̄kpọ kiet nsio.

KERE ISE: Ndi ndisinam n̄kpọ iba ukem ini esinam se ikotde okûn̄wan̄a nnyịn onyụn̄ esinam ọsọn̄ nnyịn nditi se ikpepde?—MME N̄KE 17:24.

NDITIE IKPỌN̄

Ndusụk owo isimaha ndidu ikpọn̄. Ntre ke ini mmọ ẹdude ikpọn̄, mmọ ẹsifịk fon man ẹdikop ndobo. Mma kiet emi ekerede Olivia ọdọhọ ete: “Edieke ntiede minit 15 mfịkke fon nnyụn̄ nsehe TV, mmesikop ndobo.”

Edi owo ekeme ndida ini emi enye etiede ikpọn̄ enen̄ede ekere n̄kpọ, ndien emi esinam owo okûsọp ufre se enye ekpepde.

KERE ISE: Ndi emesida ini emi odude ikpọn̄ etie ekere n̄kpọ?—1 TIMOTHY 4:15.

SE AKPANAMDE

FIAK KERE SE ESIDADE FON ANAM

Didie ke fon ekeme ndin̄wam fi enen̄ede ekpep n̄kpọ? Edi didie ke enye ekeme ndinam okûsịn esịt ke se ekpepde?