Ntak Mme Owo Mîkponoke Owo Aba?

NTAK ỌFỌNDE ISIKPONO OWO

Edieke isikponode owo, oro ekeme ndinam mfịna oro okodude afiak osụhọde ubọk.

N̄ke Bible kiet ọdọhọ ete: “Sụn̄sụn̄ ibọrọ osụk ifụtesịt, edi uyat uyat ikọ edemede iyatesịt.” (Mme N̄ke 15:1) Edieke isinamde n̄kpọ m̀mê isitịn̄de ikọ isa isa ye mme owo, oro ekeme nditie nte isịn ikan̄ ke ndak onyụn̄ anam mfịna oro okodude enen̄ede okpon.
Jesus ọkọdọhọ ete: “Oto uyọhọ esịt inua osio etịn̄.” (Matthew 12:34) Se itịn̄de ekeme ndinen̄ede n̄wụt ke nnyịn ikponoke mme owo onyụn̄ owụt nte nnyịn idade mmọ, akpan akpan mbon oro mîtoho edem nnyịn, edide mmọ ẹdi imọ m̀mê ubuene.

Ke ndụn̄ọde oro ẹkenamde ye owo 32,000 ke idụt 28, owo 20,800 ẹkedọhọ ke mme owo ikponoke owo aba ke eyo nnyịn emi ndien ke eke idahaemi ọdiọk akan nte akanam edide.

SE EKEMEDE NDINAM

Kpono kpukpru owo edide ke itieutom m̀mê ke ufọkn̄wed—ekpededi afo umaha se mmọ ẹmade. Yom mme n̄kpọ emi mbufo mbiba ẹdinyịmede, sia oro idiyakke fi okụt ndudue m̀mê ebiere ikpe ọnọ enye.

“Ẹtre ndibiere ikpe nnọ owo mbak owo edibiere ikpe ọnọ mbufo.”—Matthew 7:1.

Nam n̄kpọ ye mme owo nte akpamade mmọ ẹnam ye afo. Edieke esifọnde ido onyụn̄ ekerede aban̄a mme owo, mmọ ẹyenyụn̄ ẹnam ntre n̄ko ye afo.

“Nte mbufo ẹyomde mme owo ẹnam n̄kpọ ye mbufo, ẹnam kpasụk ntre ye mmọ.” —Luke 6:31.

Sifen nọ owo. Edieke owo etịn̄de m̀mê anamde se iyatde fi, diọn̄ọ ke anaedi enyene se inamde enye anam ntre nyụn̄ fen nọ enye.

“Ikike owo iyakke enye ọsọp iyatesịt, onyụn̄ eye enye ndifen ndudue.”—Mme N̄ke 19:11.

Ke esịt Ufọkmbono Obio Ubọn̄ Mme Ntiense Jehovah mbemiso mbono esop ọtọn̄ọde. Mme owo emi ẹtode nsio nsio itie, ikpọ ye n̄kpri, ke ẹkọm kiet eken ke ẹnyụn̄ ẹneme nneme.

SE NNYỊN INAMDE

Nnyịn Mme Ntiense Jehovah imesikpono mme owo ke ebiet emi idụn̄de m̀mê inamde utom, imesinyụn̄ in̄wam mme owo ẹnam ntre n̄ko.

Imesikpep mme owo Bible ke mfọn, edi nnyịn isinyịkke mme owo ẹnịm se nnyịn inịmde m̀mê ẹnam se nnyịn inamde. Utu ke oro, imesidomo ndineme ikọ Abasi nnọ mmọ “ke ifụre ifụre ido ye ntotụn̄ọ ukpono” nte Bible ọdọhọde.—1 Peter 3:15; 2 Timothy 2:24.

Nnyịn isisarike owo, edi imesidara kpukpru mbon oro ẹdide mme mbono esop nnyịn man ẹdikpep Bible, inamke n̄kpọ m̀mê mmọ ẹto m̀mọ̀n̄. Imesinam ofụri se ikekeme ‘ndikpono kpukpru owo’ inyụn̄ idiọn̄ọ ke nnyịn idịghe eka kiet.—1 Peter 2:17.

Imesikpono ukara ke idụt emi idụn̄de. (Rome 13:1) Imesinịm mme ibet ukara inyụn̄ ikpe tax. Kpa ye oro nnyịn mîsisịnke idem ke mbubehe ukara, isikpokpono mme owo inyụn̄ idiọn̄ọ ke mmọ ẹnyene unen ndibiere se mmọ ẹmade ke mbubehe ukara.