Amaniba Emi Ẹkedide Isio

NDITỌ iren iba emi ẹtịm ẹdi isio, nte idịghe? Nte afo ọmọfiọk enyịn̄ mmọ? Otop utop oro edi Eʹsau, ndien eyen oro ekpemede erọn̄, edi Jacob.

Eʹsau ye Jacob ẹkedi amaniba nditọ Isaac ye Re·bekʹah. Ete oro Isaac ama ama Eʹsau etieti, koro enye ekedi eti ata utop, ndien eyenam ufọk enyene unam ndita. Edi Re·bekʹah akama Jacob akan koro enye ekedi sụn̄sụn̄ eyen emem.

Abraham ete ete ke okosụk odu uwem, ndien nnyịn imekeme ndikere nte Jacob akamade ndikop enye etịn̄de aban̄a Jehovah. Abraham ama akpa ke ọsọn̄de isua 175, ke amaniba oro ẹkedide isua 15 ke emana.

Ke Eʹsau ama okosịm isua 40, enye ama ọdọ iban iba oto isọn̄ Caʹnaan. Emi akanam Isaac ye Re·bekʹah ẹfuhọ etieti, koro iban emi ikokponoke Jehovah.

Ekem, usen kiet, n̄kpọ ama otịbe oro akanamde Eʹsau ayat esịt etieti ye eyeneka esie Jacob. Ini ama edi ọnọ Isaac ndinọ n̄kpon n̄kan eyen esie eridiọn̄. Sia Eʹsau ọkọsọn̄ọde Jacob, Eʹsau ekekere ndibọ eridiọn̄ oro. Edi Eʹsau ama ebemiso anyam unen edibọ eridiọn̄ oro ọnọ Jacob. N̄ko ke ini nditọ iren iba oro ẹkemanade, Abasi ama ọdọhọ ete Jacob edibọ eridiọn̄ oro. Ndien emi edi se ikotịbede. Isaac ama ọnọ eyen esie Jacob eridiọn̄ oro.

Ke ukperedem, ke ini Eʹsau ọfiọkde aban̄a emi, esịt ama ayat enye aban̄a Jacob. Esịt ama ayat enye tutu enye ọdọhọ ete iyewot Jacob. Ke Re·bekʹah okopde, esịt ama otịmede enye etieti. Ntre enye ọkọdọhọ Isaac ebe esie ete: ‘Eyetịm ọdiọk edieke Jacob n̄ko ọdọde kiet ke otu nditọ iban Caʹnaan emi.’

Ke oro, Isaac ama okot eyen esie Jacob ete: ‘Kudọ eyen an̄wan otode Caʹnaan. Utu ke oro, ka ufọk ete uka Be·thuʹel ke Haʹran. Dọ kiet ke otu nditọ iban eyen esie Laban.’

Jacob ama okop uyo ete esie, ndien ke usop ọkọtọn̄ọ anyan isan̄ ndika ọtọ oro iman esie ẹkedụn̄de ke Haʹran.