Ẹsịn Joseph ke Ufọk N̄kpọkọbi

JOSEPH edi isua 17 kpọt ke ini ẹdade ẹka Egypt. Do ẹnyam enye ẹnọ owo ẹkotde Potʹi·phar. Potʹi·phar anam utom ọnọ Edidem Egypt ẹkotde Pharʹaoh.

Joseph anam utom ọkpọsọn̄ ọnọ Potʹi·phar etufọk esie. Ntre ke Joseph okponde, Potʹi·phar anam enye ese aban̄a ofụri ufọk esie. Ntak ndien, Joseph odude mi ke ufọk n̄kpọkọbi? Edi ke ntak n̄wan Potʹi·phar.

Joseph ọkọri akabade ata ediye eren, ndien n̄wan Potʹi·phar oyom enye adan̄ ye imọ. Edi Joseph ọfiọk nte ke ifọnke, ndien idinamke oro. Esịt ayat n̄wan Potʹi·phar etieti. Ntre ke ebe esie ọnyọn̄de edi, enye osu nsu ọnọ enye ete: ‘Idiọk Joseph oro ama odomo ndidan̄ ye ami!’ Potʹi·phar onịm n̄wan esie ke akpanikọ, ndien otịm ayat esịt ye Joseph. Ntre anam ẹsịn enye ke ufọk n̄kpọkọbi.

Andise ufọk n̄kpọkọbi ọsọp okụt ete Joseph edi eti owo. Ntre enye onịm enye ke ibuot kpukpru mbon n̄kpọkọbi eken. Ekem, Pharʹaoh ayat esịt ye akama cup ye asan̄ uyo esie, onyụn̄ ọdọn̄ mmọ ke ufọk n̄kpọkọbi. Okoneyo kiet mmọ mbiba ẹdaba ata akpan ndap, edi ifiọkke se ndap mmọ ẹwọrọde. Ke ndan̄ nsiere, Joseph ete: ‘Ẹsian mi ndap mbufo.’ Ndien ke mmọ ẹtịn̄de, Joseph ye un̄wam Abasi, etịn̄ se ndap mmọ ẹwọrọde.

Joseph ọdọhọ akama cup ete: ‘Ke usen ita, ẹyesio fi ke n̄kpọkọbi, ndien afo ẹyefiak edi akama cup Pharʹaoh.’ Ntre Joseph ọdọhọ: ‘Ke afo ọwọrọde, tịn̄ ye Pharʹaoh ban̄a mi, nyụn̄ n̄wam mi n̄wọrọ ke ebiet emi.’ Edi Joseph ọdọhọ asan̄ uyo: ‘Ke usen ita kpọt, Pharʹaoh eyesịbe fi ibuot.’

Ke usen ita, ama otịbe kpa nte Joseph eketịn̄de. Pharʹaoh osịbe ibuot asan̄ uyo efep. Edi ẹsio akama cup ke n̄kpọkọbi ndien afiak ọtọn̄ọ ndinam n̄kpọ edidem. Edi akama cup oro efre kpukpru aban̄a Joseph! Enye itịn̄ke iban̄a enye inọ Pharʹaoh, Joseph akana odu ke n̄kpọkọbi.