Ubon Oro Ẹwọrọ Ẹka Egypt

JOSEPH ikemeke ndidịp aba ntụk esie. Enye ọdọhọ kpukpru ifụn esie ẹkpọn̄ ubet oro. Ke enye odude ikpọn̄ ye nditọ ete esie, Joseph ọtọn̄ọ nditua. Nnyịn imekeme ndikere nte idem akpade nditọ ete esie, koro mmọ idiọn̄ọke ntak enye atuade. Ke akpatre enye ete: ‘Ami ndi Joseph. Nte ete mi ke osụk odu uwem?’

Idem akpa nditọ ete esie tutu mmọ ikemeke nditịn̄ ikọ. Ndịk anam mmọ. Edi Joseph ete: ‘Mbọk ẹsan̄a ẹkpere.’ Ke ini mmọ ẹnamde oro, enye ete: ‘Ami ndi eyenete mbufo Joseph, oro mbufo ẹkenyamde ke Egypt.’

Joseph akaiso nditịn̄ ikọ ye mbọm: ‘Ẹkuduọhọ idem mbufo koro ẹkenyamde mi mi. Ekedi Abasi ke akpan ọkọnọ mi ndi Egypt man nnyan̄a uwem mme owo. Pharʹaoh anam mi andikara ofụri idụt emi. Ntre ẹsọp ẹfiak ẹtiene ete mi ẹkedọhọ enye ntem. Ẹkedọhọ enye edidụn̄ mi.’

Ndien Joseph awan̄a nditọ ete esie onyụn̄ afat mmọ, otịm mmọ inua kpukpru. Ke ini Pharʹaoh okopde ete nditọ ete Joseph ẹdi, enye ọdọhọ Joseph: ‘Yak mmọ ẹda mme ukpatn̄kpọ ẹka ẹkeda ete mmọ ye ufọk mmọ, ẹfiak edi mi. Nyenọ mmọ ata eti isọn̄ ke Egypt.’

Oro ke mmọ ẹkenam. Mi afo emekeme ndikụt Joseph ọkọmde ete esie ke ini enye edide Egypt ye ofụri ubon esie.

Ubon Jacob okpon etieti idahaemi. Mmọ kpukpru ẹkedi owo 70 ke ini ẹsịmde Egypt, ke ẹbatde Jacob ye nditọ esie ye nditọ nditọ esie. Edi iban mmọ n̄ko ẹma ẹdu, ndusụk ye ediwak nditọ ufọk n̄ko. Kpukpru emi ẹkedụn̄ ke Egypt. Ẹkekot mmọ nditọ Israel koro Abasi ama ọkpụhọde enyịn̄ Jacob esịn ke Israel. Nditọ Israel ẹma ẹkabade ẹdi ata akpan idụt ẹnọ Abasi, nte nnyịn idikụtde ke akpatre.