Idiọk Edidem Akara Egypt

IRENOWO emi ke ẹnyịk mme owo ẹnam utom. Sese owo oro amiade kiet ke otu mme anam utom oro ke ikpa! Mme anam utom oro ẹto ubon Jacob, ndien ẹkot mmọ nditọ Israel. Ndien mme andinyịk mmọ ẹnam utom ẹdi mbon Egypt. Nditọ Israel ẹkabade ifụn mbon Egypt. Emi akasan̄a didie otịbe?

Ke ata ediwak isua, akwa ubon Jacob ẹkedụn̄ ke emem ke Egypt. Joseph emi ekedide ata akpan owo ke Egypt, adianade Pharʹaoh edidem ama ekpeme mmọ. Edi ekem, Joseph ama akpa. Ndien obufa Pharʹaoh oro mikamaha mbon Israel akakabade edidem Egypt.

Ntre idiọk Pharʹaoh emi anam mbon Israel ifụn. Ndien enye anam mme owo oro ẹdiọkde ẹnyụn̄ ẹbakde ibak ẹse mmọ. Mmọ ẹnyịk mbon Israel ẹnam utom ọkpọsọn̄, ẹbọp ikpọ obio ẹnọ Pharʹaoh. Edi kpa ye oro, mbon Israel ẹkaiso ẹtọt ke ibat. Ibịghike, mbon Egypt ẹtọn̄ọ ndifehe ndịk nte nditọ Israel ẹyetịm ẹwak ẹnyụn̄ ẹkop odudu ẹkan.

Nte ọmọfiọk se Pharʹaoh akanamde? Enye ama ọdọhọ iban oro ẹn̄wamde iban uman Israel ete: ‘Ana mbufo ẹwot kpukpru eyeneren oro ẹmande.’ Edi mmọ ẹkedi nti iban, ndien mmọ ikowotke nditọ oro.

Ntre Pharʹaoh ọnọ ofụri ikọt esie ewuhọ emi: ‘Ẹtan̄ kpukpru nsek nditọ iren Israel ẹwot. Yak nsek nditọ iban kpọt ẹdu uwem.’ Nte oro ikedịghe enyene ndịk ewuhọ ndinọ? Yak ise nte ẹkenyan̄ade kiet ke otu nditọ iren oro.