Moses ye Aaron Ẹkụt Pharaoh

KE INI Moses afiakde osịm Egypt, enye obụk kpukpru utịbe n̄kpọ oro ọnọ Aaron eyeneka esie. Ndien ke ini Moses ye Aaron ẹkewụtde nditọ Israel mme utịbe n̄kpọ emi, mmọ kpukpru ẹnịm nte Jehovah ama odu ye mmọ.

Ekem, Moses ye Aaron ẹma ẹka ndikụt Pharʹaoh. Mmọ ẹma ẹdọhọ enye: ‘Jehovah Abasi Israel ọdọhọ, “Yak ikọt mi ẹka ke usen ita, man ẹkpekpono mi ke wilderness.”’ Edi Pharʹaoh ọbọrọ: ‘Ami nnịmke Jehovah ke akpanikọ. Ndien ndiyakke Israel ẹka.’

Pharʹaoh ama ayat esịt koro mme owo ẹkeyom ini ndikpọn̄ utom n̄kokpono Jehovah. Ntre enye enyịk mmọ ẹnam utom ẹkan. Mbon Israel ẹma ẹduọhọ Moses ke ẹnamde ọdiọk ye mmọ, ndien Moses ọfụhọ. Edi Jehovah ọdọhọ enye okukere. Jehovah ọkọdọhọ: ‘Nnyenam Pharʹaoh ayak ikọt mi ẹnyọn̄.’

Moses ye Aaron ẹfiak ẹka ndikụt Pharʹaoh. Isan̄ emi mmọ ẹnam utịbe n̄kpọ. Aaron ọduọk esan̄ esie ke isọn̄ ndien enye akabade akamba urụkikọt. Edi mbon ifiọk Pharʹaoh ẹnyụn̄ ẹduọk esan̄ mmọ ndien urụkikọt ẹwọrọ. Edi, sese! urụkikọt Aaron ke ata mme urụkikọt mbon ifiọk oro. Kpa ye oro Pharʹaoh iyakke nditọ Israel ẹnyọn̄.

Ntre ini ama edi ọnọ Jehovah nditụnọ Pharʹaoh. Nte ọmọfiọk nte enye akanamde? Ke ndida mme ufen 10, mme ikpọ afanikọn̄ nsọk Egypt.

Ke ediwak ufen oro ẹbede, Pharʹaoh ọdọn̄ ẹkot Moses edi, ete: ‘Tre ufen oro, ndien nyeyak Israel ẹnyọn̄.’ Edi ke ufen oro etrede, Pharʹaoh eyekpụhọde ekikere esie. Enye idiyakke mme owo ẹnyọn̄. Edi, ke akpatre, ke ọyọhọ ufen 10 ebede, Pharʹaoh anam mbon Israel enyọn̄. Nte ọmọfiọk mme ufen 10 oro kiet kiet? Wọn̄ọde edem n̄wed emi ndien yak ikpep iban̄a mmọ.