Urụkikọt Okpoho

NTE oro ebiet ata urụkikọt ẹwan̄de ke eto? Idịghe enye. Ẹda okpoho ẹnam urụkikọt oro. Jehovah ọkọdọhọ Moses ete ọkọn̄ enye ke eto oro man mme owo oro ekpekeme ndise enye nnyụn̄ ndu uwem. Edi mmọ eken ke isọn̄ edi ata urụkikọt. Mmọ ẹma ẹdom mme owo ẹnyụn̄ ẹnam mmọ ẹdọn̄ọ. Nte afo ọmọfiọk ntak?

Edi koro nditọ Israel ẹtịn̄ ikọ ẹdian Abasi ye Moses. Mmọ ẹnam ikọ ẹte: ‘Nso inam mbufo ẹsion̄ode nnyịn ke Egypt man idikpa ke wilderness emi? Udia mme mmọn̄ idụhe mi. Nnyịn n̄ko ikemeke ndiyọ ndidia manna emi aba.’

Edi manna edi eti udia. Jehovah ọkọnọ mmọ oto utịbe usụn̄. N̄ko ke utịbe usụn̄, Jehovah ọnọ mmọ mmọn̄. Edi mme owo emi ikọmke Jehovah ke usụn̄ emi enye ekpemede mmọ. Ntre Jehovah ọdọn̄ mme urụkikọt ẹmi ndinọ nditọ Israel ufen. Mme urụkikọt oro ẹdom mmọ ndien ediwak mmọ ẹkpa.

Ke akpatre mmọ ẹdidọhọ Moses ẹte: ‘Nnyịn imanam idiọk koro nnyịn inamde ikọ ye Jehovah ye afo. Kpe Jehovah ubọk emen urụkikọt emi efep.’

Ntre Moses ọbọn̄ akam ọnọ mme owo. Ndien Jehovah ọdọhọ Moses ete anam urụkikọt okpoho emi. Enye ete ọkọn̄ enye ke anyan eto, n̄ko owo ekededi oro ẹdomde ekpese enye. Moses anam ukem se Jehovah ọdọhọde. Ndien mmọ eke ẹdomde ẹse urụkikọt okpoho oro ndien idem afiak ọsọn̄ mmọ.

Odu ukpepn̄kpọ anade nte ikpep ito emi. Kpukpru nnyịn, ke ndusụk usụn̄ ibiet nditọ Israel oro urụkikọt odomde. Nnyịn kpukpru idu ke idaha n̄kpa. Ke esede akanade, eyekụt ete ke mme owo ke ẹkọri ẹsọn̄, ẹdọn̄ọ, ẹnyụn̄ ẹkpa. Emi edi koro akpa erenowo ye n̄wan, Adam ye Eve, ẹma ẹwaha ẹkpọn̄ Jehovah, ndien nnyịn kpukpru idi nditọ mmọ. Edi Jehovah anam usụn̄ odu man ikeme ndidu uwem nsinsi.

Jehovah ama ọdọn̄ eyen esie Jesus Christ edi mi ke isọn̄. Ema ekọn̄ Jesus ke eto, koro ediwak owo ekekere ete enye edi idiọk owo. Edi Jehovah ọkọnọ Jesus ndinyan̄a nnyịn. Edieke nnyịn isede enye, edieke nnyịn itienede enye, do nnyịn imekeme ndinyene nsinsi uwem. Edi nnyịn iyekpep ikan oro iban̄a emi.