Joshua Akabade Edi Etubom

MOSES oyom ndidụk Caʹnaan ye nditọ Israel. Ntre enye eben̄e ete: ‘Jehovah, yak mbe Akpa Jordan emi, n̄kụt eti isọn̄ oro.’ Edi Jehovah ete: ‘Oro ekem! Kufiak udọhọ emi aba!’ Nte ọmọfiọk ntak Jehovah ọkọdọhọde oro?

Oto ke se ikotịbede ke ini Moses akamiade itiat. Ti, enye ye Aaron ikokponoke Jehovah. Mmọ ikasianke mme owo nte ke edi Jehovah okosio mmọn̄ ke itiat. Ke ntak emi, Jehovah ọkọdọhọ ete imọ idiyakke mmọ ẹdụk Caʹnaan.

Ntre ọfiọn̄ ifan̄ ke Aaron ama akakpa, Jehovah ọdọhọ Moses: ‘Da Joshua ndien nnam enye ada ke iso Eleazar oku ye mme owo. Ndien ke iso mmọ kpukpru, sian kpukpru owo ete Joshua edi obufa etubom.’ Moses anam se Jehovah ọdọhọde, nte afo ekemede ndikụt ke ndise emi.

Ekem Jehovah ọdọhọ Joshua: ‘Sọn̄ idem, kudịghe. Afo eyeda nditọ Israel odụk ke isọn̄ Caʹnaan oro ami n̄kọn̄wọn̄ode nnọ mmọ, ndien nyedu ye afo.’

Ekem, Jehovah ọdọhọ Moses ọdọk aka ata enyọn̄ Obot Neʹbo ke isọn̄ Moʹab. Otode do, Moses ese ebe Akpa Jordan onyụn̄ okụt ediye Isọn̄ Caʹnaan. Jehovah ọdọhọ ete: ‘Emi edi isọn̄ oro n̄kọn̄wọn̄ọde ndinọ nditọ Abraham, Isaac ye Jacob. Ami mmayak fi okụt enye, edi ndiyakke fi oduk ke esịt.’

Do ke enyọn̄ Obot Neʹbo, Moses akpa. Enye ekedi isua 120. Enye ke okosụk ọsọn̄ idem, n̄ko enyịn esie ke ẹkesụk ẹfon. Mme owo ẹfuhọ etieti koro Moses akpade. Edi mmọ ẹnem esịt ndinyene Joshua nte obufa etubom.