Paul ke Rome

SESE mme n̄kpọkọbi ke ubọk Paul, n̄ko sese owo ekọn̄ Rome ekpemede enye. Paul edi owo n̄kpọkọbi ke Rome. Enye ke ebet tutu Caesar mbon Rome ebiere se edinamde ye enye. Ke enye edide owo n̄kpọkọbi, ẹyak mme owo ẹkese enye.

Usen ita ke Paul osịmde Rome, enye ọdọn̄ ẹkot ndusụk ọwọrọiso mme Jew edise enye. Oto do, ediwak mme Jew ke Rome ẹdi. Paul ọkwọrọ ọnọ mmọ aban̄a Jesus ye obio ubọn̄ Abasi. Ndusụk ẹnịm ke akpanikọ ẹkabade mme Christian, edi mmọ eken inịmke.

Paul n̄ko ọkwọrọ ikọ ọnọ nsio nsio mbon ekọn̄ oro ẹnamde utom ndikpeme enye. Ke isua iba oro ẹnịmde enye mi nte owo n̄kpọkọbi Paul ọkwọrọ ikọ ọnọ kpukpru owo enye ekemede. Oto do, idem ufọk Caesar ẹkop eti mbụk Obio ubọn̄, ndien ndusụk mmọ ẹkabade mme Christian.

Edi anie owo edi esenowo emi ke okpokoro ewetde n̄kpọ? Nte ekpekere owo enye edide? Ih, edi Timothy. Timothy n̄ko ama odu ke n̄kpọkọbi ke ndikwọrọ mban̄a Obio ubọn̄, edi enye afiak enyene ifụre. Ndien enye edi mi ndin̄wam Paul. Nte ọmọfiọk se Timothy ewetde? Yak ise.

Nte emeti mme obio Phi·lipʹpi ye Ephʹe·sus ke Mbụk 110? Paul akan̄wam ẹtọn̄ọ mme esop Christian ke mme obio oro. Idahaemi, ke enye odude ke n̄kpọkọbi, Paul ẹwet mme n̄wed ọnọ mme Christian emi. Mme n̄wed oro ẹdu ke Bible, ndien ẹkot mmọ N̄wed Mbon Ephʹe·sụs ye N̄wed Mbon Phi·lipʹpi. Paul ke asian Timothy ke emi se ekpewetde ọnọ mme Christian ufan mmọ ke Phi·lipʹpi.

Mbon Phi·lipʹpi ẹfọn ido ẹkaha ye Paul. Mmọ ẹma ẹnọ enọ ẹsọk enye mi ke n̄kpọkọbi, ntre, Paul ke ọkọm mmọ aban̄a oro. E·paph·ro·diʹtus edi owo akadade enọ oro edi. Edi enye ama ọdọn̄ọ etieti ekpere ndikpa. Ke emi idem ọsọn̄ enye ndien enye eben̄e idem ndinyọn̄. Enye eyemen leta emi otode Paul ye Timothy ke ini enye afiakde ọnyọn̄ Phi·lipʹpi.

Ke adan̄emi odude ke n̄kpọkọbi, Paul ewet mme leta efen nnyịn inyenede ke Bible. Kiet edi eke mme Christian ke obio Co·losʹsae. Nte ọmọfiọk se ẹkotde enye? N̄wed Mbon Co·losʹsae. Eken edi leta idem owo ẹnọde eti ufan ẹkotde Phi·leʹmon, emi n̄ko odụn̄de ke Co·losʹsae. N̄wed oro aban̄a isụn̄utom Phi·leʹmon, O·nesʹi·mus.

O·nesʹi·mus ama efehe ọkpọn̄ Phi·leʹmon edi Rome. Ke ndusụk usụn̄, O·nesʹi·mus ama ọfiọk aban̄a Paul ndidu ke n̄kpọkọbi mi. Enye ama edi ndise, ndien Paul ama ọkwọrọ ikọ ọnọ O·nesʹi·mus. Iwiwa, O·nesʹi·mus n̄ko akabade Christian. Ke emi, O·nesʹi·mus okop mbọm nte ekefehede. Ntre, nte ọmọfiọk se Paul ewetde ke leta emi ọnọ Phi·leʹmon?

Paul ọdọhọ Phi·leʹmon efen O·nesʹi·mus. Paul ewet, ‘Ami ke mfiak nnọ enye etiene fi,’ ‘Edi ke emi, enye idịghe sụk ofụn fo kpọt. Enye edi n̄ko eti eyenete Christian.’ Ke O·nesʹi·mus afiakde aka Co·losʹsae, enye emen mme leta iba ẹmi, kiet adade ọsọk mbon Co·losʹsae ndien eken, Phi·leʹmon. Nnyịn imekeme ndikere nte esịt enemde Phi·leʹmon ke enye ọfiọkde ete ofụn esie akabade Christian.

Ke Paul ewetde n̄wed ọnọ mbon Phi·lipʹpi ye Phi·leʹmon, enye n̄ko enyene ata nti mbụk. Paul ọdọhọ mbon Phi·lipʹpi ete, ‘Ami ke ndọn̄ Timothy ke ọtọ mbufo. Edi ami n̄ko nyedise mbufo, ibịghike.’ Ndien enye ewet ọnọ Phi·leʹmon: ‘Tịm itie nọ mi ndidu do.’

Ke ẹsanade Paul ẹyak, enye ekese nditọ ete Christian esie iren ye iban ke ediwak ebiet. Edi ekem, ẹfiak emụm Paul nte owo n̄kpọkọbi ke Rome. Isan̄ emi, enye ọfiọk ete ẹmọn̄ ẹwot imo. Ntre enye ewet ọnọ Timothy onyụn̄ ọdọhọ enye ọsọp edi. Paul ọdọhọ, ‘Mma nnam akpanikọ nnọ Abasi, ndien Abasi eyenọ mi utịp.’ Isua ifan̄ ke ẹma ẹkewot Paul, ẹfiak ẹsobo Jerusalem, isan̄ emi ke ubọk mbon Rome.

Edi ekese efen ẹdu ke Bible. Jehovah Abasi anam apostle John ewet mme akpatre n̄wed esie, ẹsịnede n̄wed Eriyarare. N̄wed Bible emi etịn̄ aban̄a ini iso. Yak ikpep ke emi se ini iso akamade.