Ibuot 18
Nte Afo Amanam Akpanikọ ọnọ Obufa Edidem Isọn̄?
1. Ke ini ẹkemende Jesus ẹwụt nte Edidem ke 33 E.N., didie ke otuowo ẹkenam n̄kpọ?
KE Nisan 9 eke 33 E.N., Jesus Christ ama owụt mme Jew idem nte Edidem mmọ, kpa Messiah oro ẹkebemde iso ẹtịn̄ ẹban̄a. Nte enye okotode ke Obot Olive osụhọde aka Jerusalem, ediwak mbet ẹma ẹdara ẹnyụn̄ ẹtoro Abasi ke ntak mme utom odudu ẹmi Jesus akanamde. (Luke 19:37, 38; Zechariah 9:9) Edi nte mmọ ẹyenam akpanikọ ẹnọ Enyeemi mmọ ẹtorode mi nte Edidem? Ikebịghike ẹma ẹsịn edinam akpanikọ mmọ ke udomo.
2. (a) Didie ke ediwak owo mfịn ẹnam n̄kpọ ẹban̄a ntọt oro nte ke Christ edi obufa Edidem isọn̄? (b) Edi mme mbụme ewe ẹdot ẹnen̄ede ẹkere ẹban̄a?
2 Ọtọn̄ọde ke 1914 ẹma ẹmen Jesus Christ oro ẹnọde ubọn̄ emi akarade ifịk ifịk ke heaven ẹwụt ofụri ubonowo nte obufa Edidem isọn̄. Idotenyịn uwem ke idak ukara ke ubọk Christ, ye mme ata usọbọ oro ẹnọde mme mfịna ubonowo, amanam mme owo ẹtode kpukpru idụt ẹdara. Edi nte mmọ ẹyenam akpanikọ? Nso kaban̄a nnyịn owo kiet kiet?
MBỤK EDINAM AKPANIKỌ EKE EDIDEM
3. (a) Ntak emi ẹtịn̄de ẹban̄a Jesus ke idemesie nte “owo akpanikọ” Jehovah? (b) Nso idi edinam akpanikọ?
3 Jesus Christ ọmọnọ akpakịp uyarade nte ke edinam akpanikọ imọ nnọ Jehovah, kpa Andikara Ekondo, isehekede. Ẹtịn̄ nte enende ẹban̄a enye ke N̄wed Abasi nte “owo akpanikọ” Jehovah. (Psalm 16:10, NW; Utom 2:24-27) Ikọ Hebrew oro adade ọnọ “edinam akpanikọ” oro ẹdade mi esịne ekikere ediwụt ima ima mfọnido. Enye idịghe mbịtmbịt n̄kpọ, emi ọkọn̄ọde ke ibet m̀mê unenikpe kpọt, edi ima ye esịtekọm n̄ko ẹnụk enye.—Men Psalm 40:8; John 14:31 domo.
4, 5. (a) Didie ke Jesus okowụt edinam akpanikọ esie ke heaven, ke Satan ama ọkọsọn̄ ibuot? (b) Didie ke ẹkewụt edinam akpanikọ oro n̄ko ke isọn̄?
4 Ke heaven, ke ini Satan ọkọtọn̄ọde ndiyom ukpono oro ekenyenede Abasi kpọt nnọ idemesie ye ke ini mme angel efen ẹkekpọn̄de mme nnennen itie mmọ ke esop Jehovah eke heaven, akpa edibon Eyen Abasi ikekpebeke edu mmọ. Enye ikekereke utọ edinam oro ke esịt esie! Utuakibuot esie ekedi eke n̄waidem tutu, ke ndinam uduak Ete esie, anam-akpanikọ Eyen emi ama ọkpọn̄ ubọn̄ esie eke heaven, akabarede edi owo, onyụn̄ akam ayak idem ọnọ n̄kpa ke eto ndutụhọ. Ke ima, enye ama okụt ete, ke adan̄a nte ọkọkọn̄ọde ke imọ, ke idụhe n̄kpọ ndomokiet oro N̄wed Abasi etịn̄de aban̄a imọ oro mîdiwọrọke isu.—Philippi 2:5-8; Luke 24:44-48.
5 Ke adan̄aemi Jesus okodude ke isọn̄, Satan ama ada akwa mfịghe etiene enye man ọwọn̄ọde enye ọkpọn̄ utom oro Abasi ọkọnọde enye anam—edieke ekemede, man atap enye ndinam n̄kpọ oro akpanamde Abasi ke idemesie esịn Eyen esie. Enye ama akpak Jesus ndinam mme n̄kpọ oro ẹkpekemede ndida n̄kosụn̄ọ ke uwọrọetop ye odudu—edi edide ubak ererimbot emi Satan ekedide andikara. Jesus ama esịn, okotde oto Edisana N̄wed Abasi nte ndausụn̄ esie. (Matthew 4:1-10) Jesus ama enyene mme n̄wọrọnda ukeme ndien enye ama ada mmọ anam n̄kpọ mfọn mfọn, edi kpukpru ini ke n̄kemuyo ye uduak Ete esie. Enye ama esịn idem ọyọhọ ọyọhọ ke ndinam utom oro Abasi ọkọdọn̄de enye edinam. (John 7:16-18; 8:28, 29; 14:10) Nso eti uwụtn̄kpọ edinam akpanikọ!
6. Ke nso usụn̄ ke utịp oro ẹnọde Jesus oyom edinam akpanikọ oto nnyịn?
6 Ke ntak edinam akpanikọ Jesus oro ẹkeyarade ẹwụt, Jehovah ama anam enye eset ke n̄kpa, “[emenerede] Enye onịm ke enyọn̄, onyụn̄ ọnọ Enye enyịn̄ emi okon̄de akan kpukpru enyịn̄; man ke enyịn̄ Jesus kpukpru edọn̄ ẹkpetọn̄ọ . . . kpukpru edeme ẹkpenyụn̄ ẹnyịme ẹte Jesus Christ edi Ọbọn̄, ẹnọ Abasi Ete ubọn̄.” (Philippi 2:9-11) “Enyịn̄ emi okon̄de akan kpukpru enyịn̄” mi ada aban̄a odudu ye ukara ẹmi ẹnọde Jesus man enye ekeme ndiyọhọ uduak Jehovah. ‘Nditọn̄ọ edọn̄’ nnọ enye ọwọrọ ndifiọk itie esie nnyụn̄ nsụk ibuot nnọ ukara esie. Emi esịne ndidi anam-akpanikọ andidu ke idak esie nte Edidem.
IMA AKPANIKỌ ẸNYENEDE ẸNỌ MMỌEMI JEHOVAH EYETDE ARAN
7. Kaban̄a nso n̄kpọ ke ẹdomo edinam akpanikọ mme anditiene Jesus?
7 Akpanikọ oro nte ke enye ama ọkọdọk ke heaven, enyịn owo ikemeke ndikụt Jesus aba ada okosụn̄ọ ke mme udomo udụn̄ọde esịt kaban̄a edinam akpanikọ ọnọ mme anditiene enye. Nte mmọ ẹyeda mme edumbet ẹmi enye ekekpepde mmọ ẹdu uwem? Nte mmọ ẹyeda san̄asan̄a ẹkpọn̄ ererimbot? Nte mmọ ẹyekpono mbon oro edisana spirit ọnọde mme mbiomo edise enyịn? Nte mmọ ẹyenam utom oro enye ọkọnọde mmọ ke ofụri ukpọn̄?
8. Nso ke ima edinam akpanikọ ke ufọt Jonathan ye David akada aban̄a?
8 Ke edikem ini ẹkenyene nditan̄ “mme erọn̄ en̄wen” mbok ke ebuana ye “ekpri otuerọn̄” mme adiakpa Obio Ubọn̄ eke heaven. Nte mmọ ẹnen̄ede ẹwụt esịtekọm ẹban̄a mme ifet oro ẹnọde mmọ ke ebuana ye Christ nte Edidem ẹnyụn̄ ẹwụt ẹnọ kiet eken? Akpanikọ ẹwụt ẹte ke ata ima edem mbiba ọmọkọri ke otu kpukpru mmọemi ẹdide ubak “otuerọn̄ kiet” ke idak Jesus Christ. Ima oro n̄kpọ mîkemeke ndidian̄ade, oro mîkpaha, emi Jonathan, eyen Edidem Saul, akamade David akada aban̄a emi. Ke ama okokụt ọyọhọ utuakibuot oro David akatuakde ọnọ Jehovah ye ibetedem esie ke Abasi ke ndiwot akwa owo oro Goliath, emi ama enen̄erede otụk Jonathan ndien “ukpọn̄ Jonathan eyịre ye ukpọn̄ David, Jonathan onyụn̄ ama enye nte ukpọn̄ esiemmọ.” Ima esie ikosụhọkede ke ini akanade in̄wan̄în̄wan̄ nte ke Jehovah eyemen itie edidem ọnọ David imenke inọ Jonathan. Jonathan ama akam esịn uwem esie ke itiendịk ke ntak David ndien ndien.—1 Samuel 17:45-47; 18:1; 23:16, 17.
9. Didie ke mmọ oro mîkedịghe nditọ Israel oro ẹkedude ke udịmekọn̄ David ẹkewụt ukem edinam akpanikọ oro?
9 Ke ẹsiode Jonathan ẹfep, mbon oro mîkedịghe nditọ Israel ẹma ẹdu oro ẹkediande idemmọ ye David. Mmọ ikedịghe mme an̄wanaekọn̄ ke ukpeokụk edi ẹkedi mbon uko ẹmi ẹkenamde n̄kpọ ke ntak ukpono oro ẹkenyenede ẹnọ David nte enyeoro Jehovah eyetde aran. Mme Cherethite, mme Pelethite, ye n̄kani mme amanaisọn̄ Gath akwa obio Philistine ẹma ẹsịne ke otu mmọemi. Mmọ ke edinam akpanikọ ẹma ẹdiana ye David ke ini eyen esie Absalom ke abian̄a okoyomde ndiyịp esịt nditọ Israel. Kpa ye uwọrọetop ye n̄kari Absalom, nneminua esie ikadaha mmọ ikesịn ke edinam ubia mbia.—2 Samuel 15:6, 10, 18-22.
10. (a) Didie ke ẹwụt n̄kpet n̄kpet itie ebuana ke ufọt Christ, mme nsụhọ oro ẹyetde aran, ye “mme erọn̄ en̄wen” ke Psalm 45? (b) Ke nso usụn̄ifiọk ke ‘nsan̄a nditọiban ẹdụk ke akwa ufọk Edidem’?
10 Ẹkụt inem inem editịn̄ mban̄a efen oro aban̄ade itie ebuana oro odude ke ufọt Christ, nsụhọ oro ẹyetde aran, ye “mme erọn̄ en̄wen” ke Psalm 45. Emi idịghe ikpîkpu inem inem uto edi edi ikọ prọfesi oro aban̄ade Obio Ubọn̄ Messiah—Abasi ke idemesie edide “ebekpo,” oro edi, itiat idakisọn̄ ye ibetedem itie edidem Jesus. (Psalm 45:1-7; Mme Hebrew 1:8, 9) Andiwet psalm etịn̄ aban̄a n̄wanndọ Christ, “adiaha edidem,” oro ẹdade ẹsọk Edidem ke usen ndọ esie. “Nditọiban, mme nsan̄a esie,” ẹsan̄a ye n̄wanndọ emi. Mmọemi ẹdi mmanie? Mmọ ẹdi mbon oro ẹdoride enyịn ndidi mme andidu ke idak Obio Ubọn̄ Abasi ke isọn̄. Mmọ ẹtiene otu “n̄wanndọ” “ke idara ye mbre” tutu akpatre ke otu mmọemi akadiana ye Christ ke heaven. Mmọ ẹtiene mmọ ẹsan̄a “[ẹkedụk] ke akwa ufọk edidem,” idịghe ndidọk n̄kodụk ke heaven, edi ke ndinọ idemmọ ke utom Edidem. Nte afo amakabade edi ubak ke otu mbon isan̄ inemesịt oro?—Psalm 45:13-15.
NSO KE EDINAM AKPANIKỌ OYOM OTO NNYỊN?
11. Mme idaha ewe ẹsịn nnyịn ke udomo kaban̄a editre ndidi “eke ererimbot”?
11 Mme anana-ibat idaha ke uwem ẹwụt orụk owo eke nnyịn idide. Nte nnyịn imenen̄ede inịm Obio Ubọn̄ Messiah Jehovah ke akpanikọ? Nte enye edi ata idem n̄kpọ ọnọ nnyịn? Jesus ọkọdọhọ ete ke mme ata anditiene imọ “idịghe eke ererimbot.” Nte oro edi akpanikọ aban̄a fi?—John 17:15, 16.
12. Idem okposụkedi nnyịn idide mme anana mfọnmma, ke mme n̄kaiso usụn̄ ewe ke nnyịn ikeme ndinọ uyarade edinam akpanikọ?
12 Kaban̄a nnyịn mme anana mfọnmma owo, edinam akpanikọ iyomke mfọnmma. Edi enye oyom ete nnyịn ifep edikokoi mbiat mme ewụhọ Bible, edide mme owo efen ẹkụt nnyịn m̀mê ikwe. Enye eyenụk nnyịn ndidomo ndida mme edumbet Bible nsịn ke edinam ọyọhọ ọyọhọ, utu ke ndise adan̄a nte nnyịn ikemede ndisan̄a n̄kpere mme usụn̄ ererimbot. Enye eyenam nnyịn ikọri ata usua inọ se idiọkde.—Psalm 97:10.
13. Didie ke edinam akpanikọ edikpeme nnyịn ọbiọn̄ọ nneminua mbon nsọn̄ibuot?
13 Edieke nnyịn inen̄erede isua se idiọkde, nnyịn idiyakke udọn̄ atap nnyịn isan̄a ikpere enye. Ndinyene udọn̄ mban̄a uwem mme owo oro ẹsinamde oburobụt ido idan̄ ekeme ndida owo nsịm nditaha. (Mme N̄ke 7:6-23) Ntre, n̄ko, nditaha eke spirit ekeme ndisịm mmọ oro ke ntak udọn̄ ẹdepde ẹnyụn̄ ẹkotde mme n̄wed oro mbon nsọn̄ibuot ẹwetde, kpa mme owo oro ẹkpọn̄de Jehovah ye esop esie ndien ekem ẹdade ikọinua ‘ẹmia’ n̄kani nsan̄a mmọ. (Matthew 24:48-51) Mme N̄ke 11:9 ọtọt ete: “Oburobụt owo [“owo nsọn̄ibuot,” NW] ada inua abiat mbọhọidụn̄ esie.” Edi edinam akpanikọ eyekpeme nnyịn mbak nneminua mmọ edida nnyịn otụn usụn̄.—2 John 8-11.
14. (a) Nso idi kiet ke otu ata akpan usụn̄ oro nnyịn ikemede ndiwụt edinam akpanikọ nnyịn nnọ Christ nte Edidem? (b) Ntak oro utom emi edide akpan n̄kpọ ntre?
14 Kiet ke otu ata akpan usụn̄ oro nnyịn ikemede ndiwụt edinam akpanikọ edi ke ndinam utom oro Jesus ekekpepde mme mbet esie ndinam ke ofụri ukpọn̄. Enye ke idemesie ama onịm uwụtn̄kpọ ke ndisan̄a ke ikpọ obio ke ikpọ obio ye ke obio-in̄wan̄ ke obio-in̄wan̄, ọkwọrọde eti mbụk Obio Ubọn̄ Abasi. (Luke 8:1) Jesus ama ebem iso etịn̄ se mme ata Christian mfịn ẹdinamde ke ini enye ọkọdọhọde ete: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt; ndien adan̄aoro ke utịt eyedi.” (Matthew 24:14) Oto ke edikwọrọ eti mbụk emi ke ẹwụt mme owo ke kpukpru ebiet eneni Obio Ubọn̄ man mmọ ẹkeme ndinam ọkpọkpọ ubiere. Kaban̄a akwa otuowo, ubiere oro edida ikosịm edinịm uwem mbe akwa ukụt. (Ediyarade 7:9, 10) Nte afo ke edinam akpanikọ ke abuana ke usọp usọp utom emi?
15. (a) Nso ke Psalm 145:10-13 ọdọhọ ke mme anam-akpanikọ ikọt Jehovah ẹditịn̄ ẹban̄a? (b) Didie ke oro abuana nnyịn?
15 Ke anyanini ko, David, andiwet psalm, ama ewet ete: “O Jehovah, kpukpru se afo anamde ẹkọm fi: mbon-ima fo ẹnyụn̄ ẹtoro fi. Mmọ ẹbụk ubom ubọn̄ fo, ẹnyụn̄ ẹtịn̄ ẹban̄a odudu fo. Ẹnyụn̄ ẹnam nditọ owo ẹfiọk ese esie, ye ubom uyai ubọk esie. Ubọn̄ fo edi ata nsinsi ubọn̄, afo onyụn̄ akara ke ofụri emana.” (Psalm 145:10-13) Ke ẹwụt itie edidem oro idahaemi ebe ke Obio Ubọn̄ Messiah ke ubọk anam-akpanikọ Jesus Christ, ndien nnyịn iwụt edinam akpanikọ nnyịn nnọ Abasi ye Christ ebe ke nditịn̄ ikọ ifụre ifụre ye ke ifiopesịt mban̄a enye.
16. Didie ke edinam akpanikọ okpotụk adan̄a nte nnyịn ibuanade ke edikwọrọ Obio Ubọn̄ ye ntak emi nnyịn inamde enye?
16 Nso n̄wọrọnda itie ke uwem fo ke afo ọnọ utom edinọ ikọ ntiense Obio Ubọn̄ emi? Nte afo emenen̄ede onịm enye ke iso akan mme n̄kpọ efen oro afo ebịnede? Se afo ke idemfo anamde ekeme ndikpon m̀mê ndikpri n̄kan se mbon efen ẹnamde. Mme idaha owo kiet kiet ẹkpụhọde. Edi kpukpru nnyịn imekeme ndibọ ufọn ke ndibụp idem nnyịn mme utọ mbụme nte mmọemi: ‘Nte ebuana mi owụt sụk ekikere utom, enyọn̄ enyọn̄ enọ? Nte ami nse enye n̄kukụre nte se ẹyomde kaban̄a ubọhọ? Mîdịghe nte ima nnyenede nnọ Jehovah, idem oro nyakde nnọ Edidem Messiah esie, ye ata edikere oro ami n̄kerede mban̄a ekemmọ owo onụk mi ndinọ enye akpa itie man mbọp mme udọn̄ efen ke uwem mi n̄kanade enye?’ Edinam akpanikọ eyenụk nnyịn ndiyom mme usụn̄ ndiwụt nte ke utom emi edi akpan n̄kpọ ọnọ nnyịn nte enye edide ọnọ Edidem nnyịn.
17. Mmanie ke Jesus “editan̄a emem” ọnọ ke ini enye osobode mme idiọkowo?
17 Ibịghike Enyeemi mme mbet esie ẹketorode idara idara nte Edidem nte enye okodụkde Jerusalem ke 33 E.N. eyesobo kpukpru mmọ oro ẹsịnde itie edikara Jehovah nte ẹwụtde ebe ke Edidem Messiah Esie. Edi enye “eyetan̄a emem” ọnọ “akwa otuowo” oro, ẹtode ke kpukpru idụt oro ẹkpebede uwụtn̄kpọ edinam akpanikọ esie. Nte afo eyesịne ke otu mmọ?—Zechariah 9:10; Ephesus 4:20-24.