Mme Asan̄autom Uyọhọ-Ini Ẹda Iso ke Utom Ukwọrọikọ
Ekeme ndidi akpa owo ke otu Mme Ntiense Jehovah emi akawahade etiene fi ekedi asan̄autom asiakusụn̄ uyọhọ-ini m̀mê isụn̄utom. Sia Mme Ntiense Jehovah mîsibọhọ okụk ke utom mmọ, ekeme ndidi afo ama eyịk nte mme owo ẹmi ẹkpekemede ndinam utom ukwọrọikọ ofụri ini.
Kpukpru Mme Ntiense Jehovah ẹmi ẹyakde idem ẹnọ ẹnyụn̄ ẹnade baptism ẹdi mme asan̄autom, edi ata ediwak mmọ ẹnyene ubon m̀mê mme mbiomo eken ẹmi ẹkpande mmọ ndisịn se ikande hour ifan̄ ke urua ke utom ukwọrọikọ mmọ. Nte ededi, ediwak tọsịn Mme Ntiense ke ofụri ererimbot ẹmesụhọde idaha udu uwem mmọ man mmọ ẹkpekeme ndida utom ubak-ini nse mban̄a usụhọde ubiatokụk mmọ ndien ekem ẹyak hour 1,000 m̀mê akande oro ke isua kiet ẹsịn ke utom ukwọrọikọ.
Edi akpanikọ, mme asan̄autom asiakusụn̄ uyọhọ-ini inyeneke ediwak okụk ndibiat nnọ idemmọ, edi ye mmọ, emi edi usụn̄ ndibemiso nyom Obio Ubọn̄ Abasi. Ndien mmọ ẹsibọ ediwak edidiọn̄. Ndikam n̄keme nditịn̄ ikọ nnọ mbon en̄wen mban̄a Ikọ Abasi ke hour 90 m̀mê akande oro ke ọfiọn̄ kiet edi eti ifiọkutom ke idemesie. Asan̄autom uyọhọ-ini esifori usọ esie ke utom ukwọrọikọ onyụn̄ enyene ini n̄ko nditiene udọn̄ ẹwụtde mfọn mfọn. Emi esida mme utịp ẹnọde ata nsịnudọn̄ ẹdi. Mmọ ẹsinyene se mmọ ẹyomde ke n̄kan̄ obụkidem, ndien mmọ ẹsidara ata etieti ke se mmọ ẹnyenede.—Matthew 6:33.
Ke February 1943, Watch Tower Society ama ọtọn̄ọ Watchtower Bible School of Gilead. Uduak ekedi ndinọ mme enyene ifiọk asan̄autom asiakusụn̄ uyọhọ-ini ukpep ndinam utom nte isụn̄utom ke isenidụt. Ukpepn̄kpọ ọfiọn̄ ition oro esịne ọkpọsọn̄ ukpep Bible, mbụk Bible, esop Jehovah, ye mme ibuotikọ ẹnyenede ebuana ke nditịm idem nnọ utom ke an̄wautom esenidụt.
N̄ka esikpe okụk isan̄ ọnọ utom isụn̄utom onyụn̄ ọnọ nti udia ye uke-uke itieidụn̄ ke mme ufọkidụn̄ isụn̄utom. Enye n̄ko esinọ isụn̄utom kiet kiet ekpri okụk ekpatọfọn̄ kaban̄a mme ọkpọ ọkpọ ubiatokụk. Mme isụn̄utom ẹsinam udeme mmọ ke ndise mban̄a ufọk oro ebe ke ndika urua n̄kedep n̄kpọ, nditem udia, ndinyụn̄ nnam ufọk asana. Ye eti edise mban̄a emi, mme isụn̄utom ẹsikeme ndibiat ke nsụhọde n̄kaha hour 140 ke ọfiọn̄ kiet n̄kwọrọ ikọ ke ufọk ke ufọk nnyụn̄ nnịm mme ukpepn̄kpọ Bible ye mbon oro ẹnyenede udọn̄.
Ẹsinọ ediwak isụn̄utom ẹmi ẹka ẹkenam utom ke ebiet oro oyomde usụn̄ ke ediwak tọsịn itiat ọkpọn̄ ufọk ye ubon mmọ. Mmọ ẹkenyene ndinam ukpụhọde ke isio isio idaha udu uwem ye ido edinam, ke obufa ido udia n̄kpọ, ke isio isio idaha eyo, ye ke edisem usem efen. Mmọ ẹnam utom emi ke ntak mmọ ẹmade mme owo ẹnyụn̄ ẹnyenede ọkpọsọn̄ udọn̄ ndin̄wam mmọ ẹkpep n̄kpọ ẹban̄a Obio Ubọn̄ Abasi.
Ọtọn̄ọde ke 1943 tutu osịm 1990, Watchtower Bible School of Gilead ama onịm otu ukpepn̄kpọ 89 onyụn̄ osio se iwakde ibe isụn̄utom 6,000 ọdọn̄ utom. Ke idak ndausụn̄ N̄ka, mmọemi ẹmeda iso ke editat ifiọk Bible ke ofụri Africa, Central ye South America, Idụt Edem Usiahautịn, ye South Pacific, ndien mmọ ẹmenam ekese utom ke Europe.
Edide Mme Ntiense Jehovah ẹnam utom ukwọrọikọ uyọhọ-ini nte mme asiakusụn̄ m̀mê nte mme isụn̄utom m̀mê ke ubak-ini, mmọ ẹnam utom emi ye unana udori ke n̄kan̄ okụk. Mmọ ke ẹbiat ini ye okụk mmọ, ẹnyụn̄ ẹnọ idemmọ nde, ndin̄wam mbon en̄wen ẹnyene ifiọk emi adade osịm nsinsi uwem.—John 17:3.
• Didie ke ndusụk Mme Ntiense Jehovah ẹsikeme ndiyak ọyọhọ ini mmọ nsịn ke utom ukwọrọikọ, ndien ntak emi mmọ ẹnamde emi-e?
• Didie ke ẹnọ mme asan̄autom ukpep ke utom isụn̄utom?
• Didie ke ẹn̄wam mme isụn̄utom ke utom isenidụt mmọ?
[Mme ndise ke page 22]
Ubọk ufien: Ubet ukpepn̄kpọ Ufọkn̄wed Gilead, Brooklyn, N.Y., U.S.A.
Ubọk nnasia: Isụn̄utom ke ekpep Ikọ Abasi ke Papua New Guinea
[Mme ndise ke page 23]
Mme asan̄autom asiakusụn̄ ye mme isụn̄utom ke ẹkwọrọ Ikọ Abasi ke nsio nsio idụt
Brazil
Dominican Republic
Spain
Sierra Leone, Africa