Nso ke Mme Ntiense Jehovah Ẹnịm ke Akpanikọ?

“Nnyịn iyom ndikop se afo onịmde ke akpanikọ, koro n̄kukụre n̄kpọ oro nnyịn ifiọkde iban̄a mme Christian ẹmi edi nte ke ẹtetịn̄ n̄kpọ ẹbiat mmọ ke kpukpru ebiet!” (Utom 28:22, The Living Bible) Mbọn̄ obio ẹmi ke Rome eke akpa isua ikie ẹma ẹnịm eti uwụtn̄kpọ. Mmọ ẹkeyom ndikop nto inua mme Christian ẹmi, utu ke ndikop nto mbon nsụkuyo eke an̄wa kpọt.

Kpasụk ntre, ẹsiwak nditịn̄ ikọ mbiat Mme Ntiense Jehovah, ndien ekpedi ndudue owo ndidori enyịn ndifiọk akpanikọ aban̄ade mmọ nto inua mbon ebiari. Ntre nnyịn imadat esịt ndinam ndusụk akpan n̄kpọ oro nnyịn inịmde ke akpanikọ an̄wan̄a fi.

Bible, Jesus Christ, ye Abasi

Nnyịn imonịm ke akpanikọ ite ke “kpukpru n̄wed, eke ẹdade odudu spirit Abasi ẹwet, ẹnyụn̄ ẹdi se ifọnde.” (2 Timothy 3:16) Ndien okposụkedi ndusụk owo ẹdọhọde ẹte ke nnyịn inen̄ekede idi Christian, emi idịghe akpanikọ ndomo esisịt. Nnyịn imonyịme ofụri ofụri ikọ ntiense oro apostle Peter ọkọnọde aban̄a Jesus Christ ete: “Enyịn̄ baba kiet efen inyụn̄ idụhe eke ẹnọde ke otu owo ke idak ikpaenyọn̄, eke ẹnyenede ndida nnyan̄a nnyịn.”—Utom 4:12.

Nte ededi, sia Jesus ọkọdọhọde ete ke imọ idi “Eyen Abasi” n̄ko nte ke ‘Ete okosio imọ ọdọn̄,’ Mme Ntiense Jehovah ẹnịm ke akpanikọ nte ke Abasi okpon akan Jesus. (John 10:36; 6:57) Jesus ke idemesie ama onyime ete: “Ete omokpon akan Mi.” (John 14:28; 8:28) Ntre nnyịn inịmke nte ke Jesus edi n̄ka ye Ete, nte ukpepn̄kpọ Abasi-Ita-ke-Kiet ọdọhọde. Utu ke oro, nnyịn inịm ite ke Abasi okobot enye n̄ko nte ke enye odu ke idak Esie.—Colossae 1:15; 1 Corinth 11:3.

Ke usem Efịk, enyịn̄ Abasi edi Jehovah. Bible ọdọhọ ete: “Afo, emi enyịn̄ fo edide JEHOVAH, edi ata edikon̄ ke ofụri isọn̄.” (Psalm 83:18, King James Version) Ke nditiene utịn̄ikọ emi, Jesus ọkọsọn̄ọ ayarade enyịn̄ Abasi, ekpepde mme mbet esie ndibọn̄ akam ntem: “Ete nnyịn emi odude ke heaven: yak ikpono enyịn̄ fo.” Ndien enye ke idemesie ama ọbọn̄ akam ọnọ Abasi ete: “Mma nyarade enyịn̄ Fo nnọ mme owo ẹmi okosiode ke ererimbot ọnọ Mi.”—Matthew 6:9; John 17:6.

Mme Ntiense Jehovah ẹnịm ke akpanikọ nte ke mmimọ ikpenyene ndibiet Jesus ke ndiyarade enyịn̄ ye mme uduak Abasi nnọ mmọ efen. Ntem nnyịn imada enyịn̄ oro Mme Ntiense Jehovah ikere sia ikpebede Jesus, kpa “ntiense akpanikọ.” (Ediyarade 1:5; 3:14) Nte odotde, Isaiah 43:10 asian mbon oro ẹdade ke ibuot Abasi ete: “Jehovah ọdọhọ, ete, Mbufo ẹdi ntiense mi, ye owo emi n̄kemekde.”

Obio Ubọn̄ Abasi

Jesus ama ekpep mme mbet esie ndibọn̄ akam nte, “Yak Ubọn̄ Fo edi,” ndien enye ama anam Obio Ubọn̄ oro edi se ikarade ibuotikọ ukpepn̄kpọ esie. (Matthew 6:10; Luke 4:43) Mme Ntiense Jehovah ẹnịm ke akpanikọ ẹte ke Obio Ubọn̄ oro edi ata ukara otode heaven, nte ke enye eyekara ofụri isọn̄, n̄ko nte ke Jesus Christ edi Edidem esie oro ẹmekde emi enyịn mîkwe. Bible ọdọhọ ete, “Ubọn̄ eyedoro enye ke afara. Nkọri ke ubọn̄ esie ye emem idinyeneke utịt.”—Isaiah 9:6, 7, KJ.

Nte ededi, Jesus Christ ididịghe n̄kukụre edidem ke ukara Abasi. Enye eyenyene ediwak mme anditiene enye n̄kara ke heaven. Apostle Paul ama ewet ete, “Edieke imede ime, iyeda ubọn̄ ye Enye.” (2 Timothy 2:12) Bible owụt nte ke ibat mme owo oro ẹnamde ẹset ndida ukara ye Christ ke heaven edi sụk “tọsịn owo ikie ye aba-ye-inan̄, kpa mmọ oro ẹkefakde ẹsio ẹfep ke isọn̄.”—Ediyarade 14:1, 3.

Ke akpanikọ, ana ukara ekededi enyene mme andidu ke idak esie, ndien Mme Ntiense Jehovah ẹnịm ke akpanikọ ẹte ke ediwak billion owo efen, adianade ye mme andikara eke heaven ẹmi ẹyenyene nsinsi uwem. Ke akpatre, isọn̄, ke ẹma ẹkenam akabade edi ediye paradise, eyeyọhọ ye mme andidu ke idak Obio Ubọn̄ Abasi ẹmi ẹdotde, kpukpru mmọ ẹsụkde ibuot ẹnọ ukara Christ ye mme andikara ye enye. Ntem Mme Ntiense Jehovah ẹsọn̄ọ ẹnịm ke akpanikọ ẹte ke owo idisoboke isọn̄ ifep tutu amama n̄ko nte ke un̄wọn̄ọ Bible oro eyesu: “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—Psalm 37:29; 104:5.

Edi Obio Ubọn̄ Abasi edisan̄a didie idi? Ke kpukpru owo ndisụk ibuot unyịme unyịme nnọ ukara Abasi? Utu ke oro, Bible owụt ata mfọn mfọn nte ke Obio Ubọn̄ oro ndidi oyoyom Abasi esịn ubọk nnennen ke mme mbubehe isọn̄. “Abasi enyọn̄ eyenam ubọn̄ eke mîdisoboke ke nsinsi, adaha ada: ndien . . . ubọn̄ emi . . . eyenuak onyụn̄ ama kpukpru mme idụt ẹmi, ndien enye eyeda ke nsinsi.”—Daniel 2:44.

Ini ewe ke Obio Ubọn̄ Abasi edidi? Ọkọn̄ọde ke mme prọfesi Bible oro ẹsude idahaemi, Mme Ntiense Jehovah ẹnịm ke akpanikọ ẹte ke enye ọmọn̄ edi ata usọp usọp. Nnyịn idọhọ ite yak afo odụn̄ọde ndusụk prọfesi oro ẹkebemde iso ẹtịn̄ ẹban̄a mme n̄kpọntịbe eke “ukperedem ini” eke idiọk editịm n̄kpọ emi. Ewet mmọ ke Matthew 24:3-14; Luke 21:7-13, 25-31; ye 2 Timothy 3:1-5.

Sia ‘imade Jehovah Abasi nnyịn ke ofụri esịt, ofụri ukpọn̄, ofụri ekikere, ye ke ofụri odudu nnyịn,’ nnyịn inyeneke ubahade ke idụt, ke orụk ye ke ebuana otuowo. (Mark 12:30, 31) Ediọn̄ọ nnyịn ke kpukpru ebiet ke ntak ima oro ayararede owụt idem ke otu nditọete Christian nnyịn oro ẹkụtde ke ofụri idụt. (John 13:35; 1 John 3:10-12) Ntem nnyịn imọsọn̄ọ imụm san̄asan̄a idaha ikama ke mme mbubehe ukaraidem eke mme idụt ẹmi. Nnyịn in̄wana nditie nte mme mbet Jesus eke akpa isua ikie, ẹmi enye eketịn̄de aban̄a mmọ ete: “Mmọ idịghe eke ererimbot, kpa nte Ami mmendịghe eke ererimbot.” (John 17:16) Nnyịn inịm ite ke ndibahade idem n̄kpọn̄ ererimbot emi ọwọrọ ndifep oburobụt ido oro edide ọsọ n̄kpọ mfịn, esịnede usu nsu, uyịp inọ, use, efịbe, idan̄ ukem uduot, edida iyịp nnam n̄kpọ ke idiọk usụn̄, ukpono ndem, ye mme orụk n̄kpọ ntre eken oro ẹbiomde ikpe ke Bible.— 1 Corinth 6:9-11; Ephesus 5:3-5; Utom 15:28, 29.

Idotenyịn Kaban̄a Ini Iso

Mme Ntiense Jehovah ẹnịm ke akpanikọ ẹte ke uwem oro nnyịn idude idahaemi ke ererimbot emi idịghe ukụre se idude. Nnyịn imonịm ite ke Jehovah ọkọdọn̄ Christ edi isọn̄ ndiduọk iyịp esie nte ufak man mme owo ẹkeme ndinyene edinen idaha ke iso Abasi ẹnyụn̄ ẹbọ nsinsi uwem ke obufa editịm n̄kpọ. Nte apostle Jesus kiet ọkọdọhọde ete: “Ẹma ẹnam ikpe ẹtebe nnyịn kemi ke iyịp Esie.” (Rome 5:9; Matthew 20:28) Mme Ntiense Jehovah ẹwụt ntotụn̄ọ esịtekọm ẹnọ Abasi ye Eyen esie ke enọ ufak emi, oro anamde ẹkeme ndinyene uwem ini iso.

Mme Ntiense Jehovah ẹnyene ọyọhọ mbuọtidem ke uwem ini iso, ọkọn̄ọde ke edinam mme akpan̄kpa ẹset ke idak Obio Ubọn̄ Abasi. Nnyịn imonịm ke akpanikọ, nte Bible ekpepde, ite ke ini owo akpade enye etre ndidu uwem, nte ke “mme uduak esie ẹtak.” (Psalm 146:3, 4; Ezekiel 18:4; Ecclesiastes 9:5) Ih, uwem ini iso eke mme akpan̄kpa ọkọn̄ọ ke Abasi nditi mmọ ke ediset ke n̄kpa.—John 5:28, 29.

Nte ededi, Mme Ntiense Jehovah ẹnịm ke akpanikọ nte ke ediwak owo oro ẹdude uwem idahaemi ẹyebọhọ ke ini Obio Ubọn̄ Abasi edisobode kpukpru ukara oro idahaemi ẹdude ndien, nte Noah ye ubon esie ẹkebọhọde Ukwọ oro, mmọ ẹyekaiso ẹdu uwem ndidara nsinsi uwem ke isọn̄ oro ẹnamde asana. (Matthew 24:36-39; 2 Peter 3:5-7, 13) Edi nnyịn inịm ite ke ubọhọ ọkọn̄ọ ke owo ndinam mme n̄kpọ oro Abasi oyomde, nte Bible ọdọhọde ete: “Ererimbot ke ebebe efep . . . ; edi owo eke anamde se Abasi amade ododu ke nsinsi.”—1 John 2:17; Psalm 37:11; Ediyarade 7:9, 13-15; 21:1-5.

Ke akpanikọ, owo ikemeke ndineme kpukpru n̄kpọ oro mme Mme Ntiense Jehovah ẹnịmde ke akpanikọ mi, edi nnyịn imoyom afo ọbọ mme ntọt efen.

Ibọhọke ẹwụt ke usụn̄ efen, kpukpru itie Bible ẹkotde ẹsịn ẹto Edisana N̄wed Abasi Ibom.

[Se ẹwetde ke ikpọ abisi ke page 4]

Nnyịn imada enyịṅ oro Mme Ntiense Jehovah ikere sia ikpebede Jesus