Ibuot 2

Ẹkpono Mbemiso Enye Amanade

KE ANGEL Gabriel ama okokụre nditịn̄ ikọ nnọ n̄kaiferi oro, Mary, nte ke enye eyeman eyen erenowo oro edikabarede edi edidem, Mary obụp ete: ‘Didie ke emi ekeme nditịbe, sia mmenyeneke ebuana idan̄ ye erenowo?’

Gabriel anam an̄wan̄a ete, “Edisana spirit eyedoro fi ke idem, odudu Andikon̄ n̄kan eyenyụn̄ ofụk fi; mmọdo se idimanade eyekere Edisana, Eyen Abasi.”

Man an̄wam Mary ndinịm etop esie ke akpanikọ, Gabriel akaiso ete: “Ndien sese, Elizabeth iman fo, enye n̄ko omoyomo eyeneren ke usọn̄ esie, ndien emi edi ọyọhọ ọfiọn̄ itiokiet ye enyeemi ẹkekotde ada. Koro ikọ baba kiet eke otode Abasi idinanake odudu.”

Mary omonyịme ikọ Gabriel. Edi nso idi ibọrọ esie? Mary ofiori ete, “Sese, ofụn-an̄wan Jehovah; akpakam osu ọnọ mi kpa nte uyo fo edide.”

Ibịghike ke Gabriel ama ọkọnyọn̄, Mary otịm idem onyụn̄ aka ndise Elizabeth oro odụn̄de ye ebe esie, Zechariah, ke n̄kan̄ obot Judea. Ọtọn̄ọde ke obio Mary ke Nazareth, emi edi anyanisan̄ emi ekemede ndida usen ita m̀mê inan̄.

Ke Mary osịmde ufọk Zechariah ke ukperedem, enye odụk ufọk onyụn̄ ọnọ ekọm. Kemi, Elizabeth ọyọhọ ye edisana spirit, enye onyụn̄ ọdọhọ Mary ete: “Ọfọfọn ọnọ fi ke otu iban, onyụn̄ ọfọfọn ọnọ mfri idịbi fo. Ke ntak ewe ọwọrọ ntem ọnọ mi, ete eka Ọbọn̄ mi ekpedi edise mi? Koro sese, uyo ekọm fo okododụk mi utọn̄, eyen ọfrọ mi ke idịbi ọnọ idatesịt.”

Ke okopde emi, Mary ọbọrọ ye ọyọhọ esịtekọm ete: “Ukpọn̄ mi ke okpono Jehovah, spirit mi omonyụn̄ adara ke Abasi Andinyan̄a mi. Koro Enye ekesede usụhọde itie ofụn an̄wan Esie. Koro, sese, ọtọn̄ọde kemi kpukpru emana ẹyedọhọ ẹte, Ọfọfọn ọnọ mi. Koro Enyeemi enyenede odudu ama anam ikpọ n̄kpọ ọnọ mi.” Edi kpa ye ofụri mfọn oro ẹfọnde enye, Mary ayak kpukpru itoro aka ebịne Abasi. Enye ọdọhọ ete, “Enyịn̄ Esie onyụn̄ edi Edisana. Mbọm Esie onyụn̄ ana ọnọ kpukpru emana, ọnọ mmọemi ẹbakde Enye.”

Mary akaiso nditoro Abasi ke ikọ ikwọ prọfesi odudu spirit, atan̄ade ete: “Enye akada ubọk Esie ayarade odudu; Enye akasuan mbon ntan̄idem ke ekikere esịt mmọ. Enye ekemen mbọn̄ efep ke ebekpo mmọ, onyụn̄ ofori mmọemi ẹkpride. Enye akada nti n̄kpọ oyụhọ mmọemi biọn̄ ọdọn̄de, okonyụn̄ ọdọn̄ mbon inyene ẹnyọn̄ọ ubọk ubọk. Enye akanyan̄a Israel owo Esie, man Enye eti mbọm Esie, kpa nte Enye eketịn̄de ọnọ mme ete nnyịn mbọm emi Enye atuade Abraham ye nditọ esie ke nsinsi.”

Mary odu ye Elizabeth ke n̄kpọ nte ọfiọn̄ ita, ndien nte eyịghe mîduhe, enye edi akwa un̄wam ke mme ukperedem urua oro Elizabeth asan̄ade ye idịbi. Enen̄ede edi ediye n̄kpọ nte mme anam-akpanikọ iba ẹmi, ẹyomode nditọ ye un̄wam Abasi mi, ẹkemede ndidu ọtọkiet ke idara idara ini emi ke uwem mmọ!

Nte afo ama okụt ukpono oro ẹkenọde Jesus idem mbemiso enye amanade? Elizabeth okot enye “Ọbọn̄ mi,” ndien eyen esie oro mîkamanake kan̄a mi ama ọfrọ ye idatesịt ke akpa ini Mary ekedide. Ke n̄kan̄ eken, mmọ eken ẹkenọ Mary ye eyen esie oro mîmanake kan̄a mi esisịt ukpono, nte nnyịn idikụtde. Luke 1:26-56.

▪ Nso ke Gabriel etịn̄ ndin̄wam Mary ọfiọk nte enye edisan̄ade oyomo idịbi?

▪ Didie ke ẹkekpono Jesus mbemiso enye amanade?

▪ Nso ke Mary etịn̄ ke ikwọ prọfesi ke nditoro Abasi?

▪ Mary odu ye Elizabeth ebịghi adan̄a didie, ndien ntak otịmde odot nte Mary odu ye Elizabeth ke ini emi-e?