Ibuot 4

Idọhọ Ebe edi Oyomo Idịbi

MARY asan̄a ye idịbi ọfiọn̄ ita. Afo eyeti ete ke enye ama abiat ntọn̄ọ ini uyomo idịbi esie ke ndika n̄kese Elizabeth, edi kemi enye ọmọnyọn̄ edi Nazareth. Ibịghike kpukpru owo ke obio emana esie ẹyediọn̄ọ ẹban̄a itie esie. Enye, ke akpanikọ, odu ke itie nnanenyịn!

Se inamde n̄kpọ emi ototịm ọdiọk edi nte ke Mary odu ke ediomi ndikabade ndi n̄wan Joseph, anamusọ oro. Ndien enye ọdiọn̄ọ ete ke idak ibet Abasi oro ẹkenọde Israel, ẹnyene nditọn̄ọ n̄wan emi ama okodụk ediomi ndọ ye erenowo, edi okoidekoi enyene ebuana idan̄ ye erenowo efen, ke itiat n̄wot. Didie ke enye ekeme ndinam uyomo-idịbi esie an̄wan̄a Joseph?

Sia Mary ama ọkọkpọn̄ ufọk ke ọfiọn̄ ita, nnyịn imekeme ndinịm ke akpanikọ nte ke Joseph emenyene udọn̄ ndikụt enye. Ke ini mmọ ẹsobode, etie nte Mary ayarade n̄kpọ emi ọnọ enye. Ekeme ndidi enye odomo ofụri ukeme esie ndinam an̄wan̄a nte ke imọ iyomo ito odudu edisana spirit Abasi. Edi, nte afo ekemede ndikere, emi edi ata ọkpọsọn̄ n̄kpọ ọnọ Joseph ndinịm ke akpanikọ.

Joseph ọdiọn̄ọ eti enyịn̄ emi Mary enyenede. Ndien nte an̄wan̄ade, Joseph enen̄ede ama enye. Edi, kpa ye se enye ọdọhọde nte edide ntak, enen̄ede etie nte owo esịn enye idịbi. Kpa ye oro, Joseph iyomke ẹtọn̄ọ enye ke itiat ẹwot m̀mê ndisuene enye an̄wan̄wa. Ntre enye ebiere ndisio enye ndọ ke ndịbe. Ke ini oro, ẹkebat mme andidụk ediomi ndọ nte mme ọdọ ndọ, ndien ama oyom usiondọ man ẹtre ediomi ndọ.

Ke ukperedem, nte Joseph osụk ekerede aban̄a mme n̄kpọ ẹmi, enye odụk idap. Angel Jehovah ọbiọn̄ọde enye ke ndap onyụn̄ ọdọhọ ete: “Kûfehe ndida Mary n̄wan fo nnyọn̄ ufọk: koro idịbi oro enye oyomode oto ke edisana spirit. Ndien enye eyeman eyen eren; afo eyenyụn̄ osio Enye enyịn̄ Jesus, koro edi Enye eyenyan̄a ikọt Esie osio ke mme idiọkn̄kpọ mmọ.”

Ke ini Joseph edemerede ke idap, enye owụt esịtekọm didie ntem! Ye unana ubiatini enye anam kpasụk nte angel oro eketemede. Enye ada Mary esịn ke ufọk esie. An̄wan̄wa edinam emi anam n̄kpọ, ke nditịm ntịn̄, nte usọrọ ndọ, ọnọde idiọn̄ọ nte ke Joseph ye Mary idahaemi ẹmedọ ndọ in̄wan̄în̄wan̄. Edi Joseph inyeneke ebuana idan̄ ye Mary ke adan̄aemi enye oyomode Jesus.

Sese! Idịbi Mary omokpon, edi Joseph anam enye etie ke edem enan̄. M̀mọ̀n̄ ke mmọ ẹka, ndien ntak emi mmọ ẹkade isan̄ ke ini edide Mary ọmọn̄ aman eyen-e? Luke 1:​39-41, 56; Matthew 1:​18-25; Deuteronomy 22:​23, 24.

▪ Nso idi ekikere Joseph ke ini ọdiọn̄ọde aban̄a uyomo-idịbi Mary, ndien ntak-a?

▪ Joseph akpasan̄a didie osio Mary ndọ ke ini mmọ mîdọhọ ndọ?

▪ Nso an̄wan̄wa edinam anam n̄kpọ nte usọrọ ndọ Joseph ye Mary?