Ibuot 5
Emana Jesus—Ke M̀mọ̀n̄, n̄ko Ini Ewe?
ANDIKARA Obio Rome, Caesar Augustus, omowụk ete yak kpukpru owo ẹfiak ke obio emana mmọ ẹkesịn enyịn̄ ke n̄wed. Ntre Joseph aka obio emana esie, kpa obio Bethlehem.
Ata ediwak owo ẹdu ke Bethlehem ndisịn enyịn̄, ndien n̄kukụre itie oro Joseph ye Mary ẹkemede ndikụt ndidan̄ edi ke ufọk ufene. Edi mi, ke ebiet ẹsinịmde mme enan̄ ye mme ufene eken, ke Jesus amana. Mary ada ọfọn̄ awan̄ enye onyụn̄ onịm enye ke usịnudia ufene, kpa ebiet oro ẹsisịnde udia ẹnọ mme ufene.
Ke akpanikọ ekedi ke ndausụn̄ Abasi ke Caesar Augustus ọkọnọ ewụhọ usịn enyịn̄ ke n̄wed. Emi amanam Jesus ekeme ndimana ke Bethlehem, kpa obio emi N̄wed Abasi eketịn̄de onịm anyanini ke mbemiso nte edidide obio emana andikara oro ẹken̄wọn̄ọde.
Nso akpan okoneyo edi emi! Ko ke in̄wan̄, ọkpọsọn̄ un̄wana ayama akan otu mme ekpemerọn̄ okụk. Emi edi ubọn̄ Jehovah! Ndien angel Jehovah asian mmọ ete: “Ẹkûfehe ndịk; koro sese, mmada eti mbụk akwa idatesịt, eke edinyenede kpukpru owo, nsọk mbufo; koro Andinyan̄a, emi edide Christ Ọbọn̄, amana ọnọ mbufo mfịn ke obio David. Emi onyụn̄ edi idiọn̄ọ eke ẹnọde mbufo; mbufo ẹyekụt nsekeyen emi ẹwan̄de ke ọfọn̄ nte anade ke ebiet usịnudia ufene.” Ndondo oro ediwak angel efen efen ẹbiọn̄ọde ẹnyụn̄ ẹkwọ ẹte: “Ubọn̄ enyene Abasi ke ata enyọn̄. Emem onyụn̄ odu ke isọn̄ ke otu owo ẹmi Enye enende iso ye mmọ.”
Ke ini mme angel oro ẹdahade, mme ekpemerọn̄ oro ẹdọhọ kiet ye eken ẹte: “Ẹyak nnyịn ika ke Bethlehem ikese n̄kpọ emi okotịbede, emi Jehovah asiande nnyịn.” Mmọ ẹmen isan̄ itọk itọk ẹka ẹnyụn̄ ẹkụt Jesus ke ebiet oro angel ọkọdọhọde mmọ. Ke ini mme ekpemerọn̄ ẹbụkde se angel oro akasiande mmọ, kpukpru mbon oro ẹkopde emi ẹdu ke n̄kpaidem. Mary omụm kpukpru ikọ ẹmi akama onyụn̄ ekere mmọ ke esịt esie.
Ediwak owo mfịn ẹnịm ke akpanikọ ẹte ke Jesus akamana ke December 25. Edi December edi ini edịm ye ini etuep ke Bethlehem. Mme ekpemerọn̄ ikpodụhe ke in̄wan̄ ke okoneyo ye mme ufene mmọ ke utọ ini oro ke isua. N̄ko-n̄ko, etie nte Caesar obio Rome ikpọkọdọhọke mme owo oro ẹma ẹkenyenyene ntụhọ edisọn̄ ibuot ye enye ẹnam isan̄ oro ke ini ọkpọsọn̄ etuep emi ẹkesịn enyịn̄ ke n̄wed. Nte an̄wan̄ade, Jesus akamana ke n̄kpọ nte ntọn̄ọ ndaeyo eke isua oro. Luke 2:1-20; Micah 5:2.
▪ Ntak emi Joseph ye Mary ẹkade Bethlehem?
▪ Nso utịben̄kpọ ida itie ke okoneyo emi Jesus amanade?
▪ Nnyịn isan̄a didie ifiọk ite ke Jesus ikamanake ke December 25?