Ibuot 12

Baptism Jesus

N̄KPỌ nte ọfiọn̄ itiokiet ke John ama ọkọtọn̄ọ ndikwọrọ ikọ, Jesus, oro idahaemi edide isua 30 ke emana, edi ebịne enye ke Jordan. Ke nso ntak? Man edise enye? Nte Jesus enyene udọn̄ n̄kukụre ke nte utom John akade iso? Baba, Jesus ọdọhọ John onịm imọ baptism.

John afan̄a usọp ete: “N̄kam nyom Afo onịm mi baptism, ndien Afo etiene mi?” John ọfiọk ete ke eyen eyeneka eka imọ edi san̄asan̄a Eyen Abasi. Kamse, John ama ọfrọ ke idịbi eka esie ye idatesịt ke ini Mary, ke oyomode Jesus, akakade ndise mmọ! Eka John, Elizabeth, ye unana eyịghe ke ukperedem ama etịn̄ emi ọnọ enye. Ndien anaedi Elizabeth n̄ko ama asian enye ntọt angel oro kaban̄a emana Jesus ye nte mme angel ẹkebiọn̄ọrede mme ekpemerọn̄ ke iso ke okoneyo oro Jesus akamanade.

Mmọdo Jesus idịghe esenowo inọ John. Ndien John ọfiọk ete ke baptism imọ inyeneke n̄kpọ ndinam ye Jesus. Enye enyene mbon oro ẹkabarede esịt ẹkpọn̄ mme idiọkn̄kpọ mmọ, edi Jesus inyeneke idiọkn̄kpọ. Edi, kpa ye mfan̄a John, Jesus ọsọn̄ọ eyịre ete: “Yak edi ntre kemi: koro ntem ke odot nnyịn ndinam kpukpru nti ido.”

Ntak emi odotde Jesus ndina baptism? Sia baptism Jesus mîdịghe idiọn̄ọ edikabade esịk n̄kpọn̄ idiọkn̄kpọ, edi edide ediyak idemesie nnọ ndinam uduak Ete esie. Jesus ekedi anamusọ, edi idahaemi ini emekem ọnọ enye nditọn̄ọ utom oro Jehovah Abasi ọkọdọn̄de enye edi ke isọn̄ ndinam. Nte afo emekere ke John odori enyịn ndikụt esen esen n̄kpọ ekededi nditịbe ke ini onịmde Jesus baptism?

Ọfọn, ke ukperedem John ọtọt ete: “Enyeemi ọkọdọn̄de mi ete nda mmọn̄ nnịm baptism ọdọhọ mi ete, Owo eke edikụtde nte spirit osụhọrede odoro Enye ke idem edi Enyeemi onịmde owo baptism ke edisana spirit.” Ntre John ke odori enyịn ndikụt spirit Abasi nte edidorode owo emi enye onịmde baptism ke idem. Ke ntre, ekeme ndidi enye inen̄ekede idu ke n̄kpaidem ke ini, nte Jesus ọwọrọde ke mmọn̄, John okụt nte “spirit Abasi osụhọrede nte ibiom edidoro Enye ke idem.”

Edi se ikande oro amada itie nte Jesus anade baptism. “Enyọn̄ eberede ọnọ Enye.” Nso ke emi ọwọrọ? Nte an̄wan̄ade ọwọrọ nte ke adan̄aemi enye anade baptism, enye eti uwem emi enye okodude ke heaven mbemiso edide owo. Ntre, Jesus idahaemi emeti ọyọhọ ọyọhọ aban̄a uwem esie nte eyen Jehovah Abasi eke spirit, esịnede kpukpru n̄kpọ oro Abasi eketịn̄de ọnọ enye ke heaven ke ini uwem esie mbemiso amanade nte owo.

Adianade do, ke ini baptism esie, uyo otode heaven ọdọhọ ete: “Emi edi edima Eyen Mi, emi esịt enemde Mi etieti ye Enye.” Uyo anie edi oro? Uyo Jesus? Baba! Enye edi uyo Abasi. Nte an̄wan̄ade, Jesus edi Eyen Abasi, idịghe Abasi ke idemesie, nte ndusụk owo ẹdọhọde.

Nte ededi, Jesus edi eyen Abasi emi edide owo, kpa nte akpa owo oro, Adam, ekedide. Mbet oro Luke, ke ama eketịn̄ aban̄a baptism Jesus, ewet ete: “Jesus ke Idem Esie edi n̄kpọ nte isua edịp-ye-duop ke ini ọtọn̄ọde ndikpep owo n̄kpọ; owo ẹnyụn̄ ẹse ẹte Enye edi eyen Joseph, eyen Heli, . . . eyen David, . . . eyen Abraham, . . . eyen Noah, . . . eyen Adam, eyen Abasi.”

Nte Adam ekedide “eyen Abasi” emi edide owo, ntre ke Jesus edi. Jesus edi akakan owo oro akanam odude uwem, emi edide in̄wan̄în̄wan̄ ke ini ẹdụn̄ọrede uwem Jesus. Nte ededi, ke baptism esie, Jesus omodụk obufa itie ebuana ye Abasi, akabarede n̄ko edi Eyen Abasi eke spirit. Abasi idahaemi omokot enye ndifiak ke heaven, yak idọhọ, ebe ke nditọn̄ọ enye ke usụn̄ oro edinamde enye ayak uwem esie eke owo ọnọ ke nsinsi ke uwa ke ibuot ubonowo oro ẹbiomde ikpe. ⁠Matthew 3:​13-17; Luke 3:​21-38; 1:​34-36, 44; 2:​10-14; John 1:​32-34; Mme Hebrew 10:​5-9.

▪ Ntak emi Jesus mîdịghe esenowo inọ John?

▪ Sia Jesus mînamke idiọkn̄kpọ, ntak emi ẹnịmde enye baptism?

▪ Ke ikerede iban̄a se John ọfiọkde aban̄a Jesus, ntak ekemede ndidi idem ikpaha enye ke ini spirit Abasi edidorode Jesus ke idem-e?