Ibuot 19

Ndikpep N̄wan a-Samaria N̄kpọ

KE USỤN̄ oro mmọ ẹtode Judea ẹka Galilee, Jesus ye mme mbet esie ẹsan̄a ke n̄kan̄ obio Samaria ẹbe. Ke ẹkpade mba ke ntak isan̄ emi, mmọ ẹbet ke osịmde n̄kpọ nte ufọt uwemeyo man ẹduọk odudu ke mben obube mmọn̄ oro ekperede obio Sychar. Jacob okotịbi obube mmọn̄ emi ediwak isua ikie ẹmi ẹkebede, ndien enye odu tutu osịm mfịn, ekpere obio Nablus eke eyomfịn.

Ke adan̄aemi Jesus ọduọkde odudu mi, mme mbet esie ẹdaha ẹdụk obio ndidep udia. Ke ini n̄wan a-Samaria edide ndikoi mmọn̄, Jesus eben̄e ete: “Nọ Mi mmọn̄ n̄n̄wọn̄.”

Mme Jew ye mbon Samaria ke ofụri ofụri isisan̄ake n̄kpọ ye kiet eken ke ntak ntotụn̄ọ udu. Ntre, ke n̄kpaidem, n̄wan emi obụp ete: “Afo emi edide Jew anam didie eben̄e mi mmọn̄, ke ini ndide n̄wan a-Samaria?”

Jesus ọbọrọ ete, “Edieke afo ọkpọfiọkde . . . owo emi obụpde fi ete, Nọ Mi mmọn̄ n̄n̄wọn̄, afo ekpeben̄e Enye, ndien Enye ọkpọnọ fi odu-uwem mmọn̄.”

N̄wan oro ọbọrọ ete, “Ọbọn̄, unyeneke se adade okoi mmọn̄, obube onyụn̄ otụn̄ọ: ada odu-uwem mmọn̄ oro ndien ke m̀mọ̀n̄? Nte omokpon akan ete nnyịn Jacob, emi ọkọnọde nnyịn obube emi, onyụn̄ ọn̄wọn̄de mmọn̄ do ke idemesie, ye nditọ esie, ye ufene esie?”

Jesus ọbọrọ ete: “Kpukpru owo eke ẹn̄wọn̄de mmọn̄ emi ẹyetọn̄ọ ntak ẹkop nsatitọn̄: edi owo ekededi eke ọn̄wọn̄de mmọn̄ emi Ami ndinọde enye idikopke nsatitọn̄ aba: edi mmọn̄ oro ndinọde enye eyekabade edi idịm mmọn̄ ke esịt esie eke otopde akabade ọwọrọ edi nsinsi uwem.”

N̄wan oro ọbọrọ ete, “Ọbọn̄, nọ mi mmọn̄ oro, man itọn̄ okûsat mi, ami n̄kûnyụn̄ nsan̄a adan̄a usụn̄ emi ndi ke ọtọ emi ndikoi mmọn̄.”

Jesus ọdọhọ enye kemi ete: “Ka kokot uberi, di ken.”

N̄wan oro ọbọrọ ete: “Nnyeneke ebe.”

Jesus ọsọn̄ọ ikọ esie. “Emenen ndidọhọ ete, Nnyeneke ebe: koro ọmọdọdọ ebe ition, ndien owo emi odude ye enye idahaemi idịghe uberi.”

N̄wan emi ọdọhọ ke n̄kpaidem ete, “Ọbọn̄, mmokụt nte Afo edi prọfet.” Ke ayararede udọn̄ n̄kpọ spirit esie owụt, enye etịn̄ ete ke mbon Samaria “ẹkam ẹtuak ibuot ẹnọ Abasi ke obot emi [Gerizim, emi adade ekpere]; ndien mbufo [mme Jew] ẹte, ebiet eke owo ẹkpetuakde ibuot enọ Abasi odu ke Jerusalem.”

Edi, Jesus osio owụt ete ke idịghe itie utuakibuot edi akpan n̄kpọ. Enye ọdọhọ ete, “Ini ke edi, . . . eke ata mme andituak ibuot ẹdituakde ibuot ẹnọ Ete ke spirit ye ke akpanikọ: koro edi mmọ eke ẹtiede ntem ke Ete oyom ete ẹtuak ibuot ẹnọ Imọ. Abasi edi spirit: ndien mme andituak ibuot nnọ Enye ẹnyene ndituak ibuot ke spirit ye ke akpanikọ.”

N̄kpọ emi otụk n̄wan emi ke idem ntotụn̄ọ ntotụn̄ọ. Enye ọdọhọ ete, “Mmọfiọk nte Messiah (emi ekerede Christ) ọmọn̄ ededi: ke ini Enye edide, Enye eyen̄wan̄ade kpukpru n̄kpọ ọnọ nnyịn.”

Jesus ọdọhọ ete, “Ami emi nneneme nneme mi ye afo ndi Enye.” Kere ban̄a oro! N̄wan emi esidide ke ufọt uwemeyo ndikoi mmọn̄, iso-ọfọn man efep edinyene ebuana ye iban obio oro ẹsede enye ke ndek ke ntak ido uwem esie, edi se Jesus owụtde mfọn ke utịbe utịbe usụn̄. Enye etịn̄ in̄wan̄în̄wan̄ ọnọ n̄wan emi se enye mîketịn̄ke an̄wan̄wa inọ owo efen ekededi. Ye nso mme utịp?

Ediwak Mbon Samaria Ẹnịm ke Akpanikọ

Ke ẹtode Sychar ẹnyọn̄ ẹdi ye udia, mme mbet ẹkụt Jesus ke mben obube mmọn̄ Jacob oro ẹkekpọn̄de enye, ye ke ebiet emi enye idahaemi etịn̄de ikọ ye n̄wan a-Samaria oro. Ke ini mme mbet ẹnyọn̄de ẹdi, n̄wan emi ọkpọn̄ aban̄ mmọn̄ esie, onyụn̄ adaha odụk obio.

Ke owụtde ntotụn̄ọ udọn̄ ke mme n̄kpọ oro Jesus eketịn̄de ọnọ enye, enye asian mbio obio oro ete: “Ẹdi ẹdise owo emi ekemende kpukpru se akananam nnamde etịn̄ ọnọ mi.” Ndien, ke usụn̄ edemede udọn̄, enye obụp ete: “Ndi enye edi Christ?” Mbụme oro ọmọyọhọ uduak esie—mbio obio oro ẹka ndikụt ke idemmọ.

Mi kan̄a, mme mbet ẹkpak Jesus ẹte adia udia emi mmimọ ikedepde ke obio. Edi enye ọbọrọ ete: “Mmenyene udia ndidia eke mbufo mîfiọkke.”

Mme mbet ẹbụp kiet eken ẹte, “Nte owo ekededi akada udia ọsọk Enye adia?” Jesus anam an̄wan̄a ete: “Udia Mi edi ndinam uduak Andidọn̄ Mi, nnyụn̄ mma utom Esie. Nte mbufo idọhọke ite, eyesụk ọfiọn̄ inan̄ ndien osịm ini ukpen̄e?” Nte ededi, ke anyande ubọk owụk idọk eke spirit, Jesus ọdọhọ ete: “Ẹmenede enyịn ẹse in̄wan̄ ẹte n̄kpọ adat ke esịt ama, ekem ini ukpen̄e. Kpa ke idahaemi andikpen̄e ukpen̄e ke ọbọ n̄kpọ eyenutom, onyụn̄ atan̄ mbun̄wụm ọnọ nsinsi uwem; man andisuan n̄kpasịp ye andikpen̄e ukpen̄e ẹkpedara ọtọkiet.”

Eyedi Jesus kemi omokụt akwa utịp oro enye ndisobo ye n̄wan a-Samaria emi enyenede—nte ke ediwak owo ke ẹbuọt idem ye enye oto ke ikọ ntiense n̄wan emi. N̄wan emi ke ọnọ mbio obio ikọ ntiense, ọdọhọde ete: “Enye etịn̄ kpukpru se akananam nnamde ọnọ mi.” Ntre, ke ini mbio obio Sychar ẹdide ẹtiene enye ke obube mmọn̄ oro, mmọ ẹkpe enye ubọk ẹte etie kan̄a etịn̄ ekese ikọ ọnọ mmimọ. Jesus onyịme eben̄e emi onyụn̄ odu do usen iba.

Nte mbon Samaria ẹkpan̄de utọn̄ ẹnọ Jesus, ediwak owo efen efen ẹnịm ke akpanikọ. Ndien mmọ ẹdọhọ n̄wan oro ẹte: “Kemi nnyịn imonịm ke akpanikọ, idịghe koro afo eketịn̄de, edi koro nnyịn ima ikokop ke idem nnyịn, inyụn̄ ifiọk ite, Owo emi edi Andinyan̄a ererimbot ke akpanikọ.” Ke akpanikọ, n̄wan a-Samaria emi omonịm eti uwụtn̄kpọ ke nte nnyịn ikpọnọde ikọ ntiense iban̄a Christ ke ndidemede udọn̄ mme owo man mme andikpan̄ utọn̄ ẹkaiso ẹnam ndụn̄ọde!

Ti ete ke ayak ọfiọn̄ inan̄ ndisịm ini ukpen̄e—nte an̄wan̄de emi edi ini ukpen̄e barley emi esidade itie ke ini utọ ke Palestine. Ntre eyedi idahaemi edi November m̀mê December. Emi ọwọrọ nte ke Passover eke 30 C.E. etienede, Jesus ye mme mbet esie ẹma ẹda n̄kpọ nte ọfiọn̄ itiaita m̀mê akande oro ẹnọ ukpep ẹnyụn̄ ẹnịm mme owo baptism ke Judea. Mmọ ẹkpọn̄ idahaemi ẹka obio emana mmọ ke Galilee. Nso ina ibet mmọ do? John 4:​3-43.

▪ Ntak emi n̄wan a-Samaria oro okopde n̄kpaidem ke Jesus nditịn̄ ikọ nnọ enye?

▪ Nso ke Jesus ekpep enye aban̄a odu-uwem mmọn̄ ye ebiet oro ẹkpetuakde ibuot?

▪ Didie ke Jesus ayarade owo emi imọ idide ọnọ enye, ndien ntak emi uyarade emi edide ata n̄kpọ n̄kpaidem-e?

▪ Nso ikọ ntiense ke n̄wan a-Samaria emi ọnọ n̄ko ye nso utịp?

▪ Didie ke udia Jesus enyene ebuana ye ini ukpen̄e?

▪ Didie ke nnyịn ikeme ndibiere uniọn̄ ini utom ukwọrọikọ Jesus ke Judea ke etienede Passover eke 33 C.E.?