Ibuot 20
Udiana Utịben̄kpọ ke Adan̄aemi Odude ke Cana
KE INI Jesus afiakde ọnyọn̄ obio emana esie ke ama okokụre ntatara ubịnikọt ukwọrọikọ ke Judea, enye inyọn̄ke idi ndiduọk odudu. Utu ke oro, enye akam ọtọn̄ọ n̄kpon n̄kan utom ukwọrọikọ ke Galilee, kpa obio oro enye ọkọkọride okpon. Edi mme mbet esie, utu ke ndidu ye enye, ẹfiak ẹnyọn̄ ufọk ẹbịne ubon ye n̄kani ubọkutom mmọ.
Nso etop ke Jesus ọtọn̄ọ ndikwọrọ? Enyeemi: “Ubọn̄ Abasi ke ekpere: mbufo ẹkabade esịt ẹnyụn̄ ẹnịm gospel ke akpanikọ.” Ndien didie ke ẹnam n̄kpọ ẹban̄a oro? Mbon Galilee ẹdara Jesus. Kpukpru owo ẹkpono enye. Nte ededi, emi idịghe akpan akpan ke ntak etop esie, utu ke oro, edi koro ediwak mmọ ẹkedude ke usọrọ Passover oro ke Jerusalem ọfiọn̄ ifan̄ ke mbemiso ẹnyụn̄ ẹkụt n̄wọrọnda idiọn̄ọ oro enye akanamde.
Nte an̄wan̄ade Jesus ọtọn̄ọ akwa utom ukwọrọikọ esie eke Galilee ke Cana. Akpa, afo emekeme nditi, ete ke ọkpọn̄de Judea, enye ama anam mmọn̄ akabade wine ke usọrọ ndọ do. Ke ọyọhọ edinam iba emi, eyen asan̄autom ukara Edidem Herod Antipas ọdọn̄ọ ata etieti. Ke okopde ete ke Jesus oto Judea edi Cana, asan̄autom ukara oro asan̄a ofụri anyan usụn̄ oro oto ke obio emana esie ke Capernaum edi ndiyom Jesus. Ke etiede mfụhọ mfụhọ, eren oro akpak ete: ‘Mbọk sụhọde di iwiwa ke eyen mi mîkpaha kan̄a.’
Jesus ọbọrọ ete: ‘Nyọn̄ okwo. Eyen fo omokop nsọn̄idem!’ Asan̄autom Herod onịm ke akpanikọ onyụn̄ ọtọn̄ọ ndisan̄a anyan isan̄ oro nnyọn̄. Ke akade ke usụn̄ ikọt esie ẹdisobo enye, ẹsan̄ade itọk itọk ẹdisian enye ete ke kpukpru n̄kpọ ọfọn—eyen esie afiak okop nsọn̄idem! Enye obụp ete, ‘Ini ewe ke enye okokop nsọn̄idem?’
Mmọ ẹbọrọ ẹte, ‘N̄kpọn̄ ke n̄kanika 1 uwemeyo.’
Asan̄autom oro eti ete ke emi kpa hour oro Jesus ọkọdọhọde ete, ‘Eyen fo omokop nsọn̄idem!’ Ke oro ebede, eren emi ye ofụri ufọk esie ẹkabade ẹdi mbet Christ.
Cana ke ntem amakabade okụt mfon nte ebiet emi Jesus akanamde utịben̄kpọ utịm ikaba, ọnọde idiọn̄ọ enye ndito Judea ndi. Mmọemi, ke akpanikọ, idịghe n̄kurụre utịben̄kpọ oro enye akanamde tutu osịm ini emi, edi mmọ ẹdi n̄wọrọnda sia mmọ ẹkenịmde enye ndifiak nnyọn̄ ndi Galilee idiọn̄ọ.
Idahaemi Jesus ọnyọn̄ Nazareth. Nso ina ibet enye do? John 4:43-54; Mark 1:14, 15; Luke 4:14, 15.
▪ Ke ini Jesus afiakde ọnyọn̄ Galilee, nso itịbe inọ mme mbet esie, ndien didie ke mme owo ẹdara enye?
▪ Nso utịben̄kpọ ke Jesus anam, ndien didie ke enye otụk mbon oro ẹbuanade?
▪ Didie ke Jesus ke ntem owụt Cana mfọn?