Ibuot 25

Nditua Owo Akpamfia Mbọm

NTE Jesus ye mme mbet esie inan̄ ẹkade mme obio Galilee, etop asuana ke ofụri obio oro aban̄a mme utịben̄kpọ oro enye anamde. Etop edinam esie osịm obio emi owo oro ọdọn̄ọde akpamfia odude. Luke, abiaibọk oro, etịn̄ aban̄a enye nte “owo emi ọyọhọde ye akpamfia.” Ke ini odude owo ke idem ebịghi, idiọk udọn̄ọ emi sụn̄ sụn̄ esibiomo owo ndo ke nsio ikpehe idem. Ntem owo akpamfia emi odu ke idaha oro enyenede mbọm.

Ke ini Jesus osịmde obio oro, owo akpamfia emi asan̄a ekpere enye. Nte Ibet Abasi edide, owo akpamfia enyene ndinọ ntọt ke ndifiori nte, “Edidehe, edidehe,” man mbon efen ẹkûtịm ẹsan̄a ẹkpere ẹnyụn̄ ẹmen udọn̄ọ emi. Kemi owo akpamfia oro ọduọ ke isọn̄ okụbi iso esie onyụn̄ ekpe Jesus ubọk ete: “Ọbọn̄, ke Afo onyịmede, emekeme ndinam mi nsana.”

Nso mbuọtidem ke owo oro enyene ntem ke idem Jesus! Edi, didie ke udọn̄ọ esie anam enye enyene mbọm ntem! Nso ke Jesus edinam? Nso ke afo akpanam? Ke okopde mbọm, Jesus anyan ubọk esie otụk owo oro, ete: “Mmonyịme, sana.” Ndien ndondo oro akpamfia oro ọkpọn̄ enye.

Nte afo akpama owo oro atuade owo mbọm ntem edi edidem fo? Usụn̄ nte Jesus anamde n̄kpọ ye owo akpamfia emi anam nnyịn inyene mbuọtidem nte ke ini ukara Obio Ubọn̄ Esie, prọfesi Bible emi eyesu: “Enye eyetua eyen unana ye ubuene mbọn, onyụn̄ anyan̄a ukpọn̄ mme ubuene.” Ih, adan̄aoro Jesus eyenam udọn̄ esịt esie ndin̄wam kpukpru mbon ukụt.

Idem mbemiso anamde udọn̄ọ okụre owo akpamfia oro, utom Jesus ama anam akwa nduaidem odu ke otu mme owo. Ke ndisu prọfesi Isaiah, Jesus kemi ọnọ owo oro udọn̄ọ okụrede mi uyo ete: “Kpeme, kûtịn̄ baba ikọ kiet unọ ndomo owo kiet.” Jesus ndien ọnọ enye item ete: “Nyọn̄ kowụt oku idemfo, nyụn̄ wa se Moses eketmede ban̄a edinam fi asana, man edi n̄kpọ ntiense ọnọ owo.”

Edi owo emi enen̄ede okop inemesịt tutu eyedi se enye mîkemeke ndidịp utịben̄kpọ emi. Enye ọwọrọ akasuan mbụk emi ke kpukpru ebiet, nte an̄wan̄ade, edemerede ọkpọsọn̄ nduaidem ye udọn̄ ke otu mme owo oro tutu eyedi se Jesus mîkemeke ndidụk obio an̄wan̄wa aba. Ntem, Jesus odu ke mme ndobo ndobo ebiet oro baba owo kiet mîdụn̄ke, ndien mme owo ẹto ke kpukpru ebiet ẹdi ndikpan̄ utọn̄ nnọ enye do, n̄ko, man ẹnam udọn̄ọ okụre mmọ. Luke 5:​12-16; Mark 1:​40-45; Matthew 8:​2-4; Leviticus 13:45; 14:​10-13; Psalm 72:13; Isaiah 42:1, 2.

▪ Nso utịp ke akpamfia ekeme ndinyene, ndien nso ntọt ke owo akpamfia ekenyene ndinọ?

▪ Didie ke owo akpamfia ekpe Jesus ubọk, ndien nso ke nnyịn ikeme ndikpep nto ibọrọ Jesus?

▪ Didie ke owo oro ẹnamde udọn̄ọ okụre mi okpu ndinam item Jesus, ndien nso idi mme utịp?