Ibuot 29

Ndinam Nti Utom ke Usen Sabbath

EDI ini utọ eke 31 C.E. Ọfiọn̄ ifan̄ ẹmebe tọn̄ọ nte Jesus eketịn̄ ikọ ọnọ n̄wan oro ke obube mmọn̄ ke Samaria, ke adan̄aemi ẹtode Judea ẹka Galilee.

Idahaemi, ke ama ọkọnọ ukpep ntatara ntatara ke ofụri Galilee, Jesus afiak aka Judea, ke ebiet emi enye ọkwọrọde ikọ ke mme synagogue. Ke ẹmende ẹdomo ye ntịn̄enyịn oro Bible ọnọde utom ukwọrọikọ esie ke Galilee, enye etịn̄ esisịt aban̄a utom Jesus ke Judea isan̄ emi ye ke mme ọfiọn̄ oro enye okodude mi ke akpa Passover oro ama ekebe. Nte an̄wan̄ade, owo ikanamke n̄kpọ nte ọfọnde iban̄a ukwọrọikọ esie ke Judea nte ẹkenamde ke Galilee.

Ibịghike Jesus ọtọn̄ọ isan̄ ndika akwa obio Judea, kpa Jerusalem, ndikabuana ke Passover eke 31 C.E. Mi, ke ekperede Inuaotop Erọn̄, n̄kpọdiọhọ mmọn̄ emi ẹkotde Bethzatha omodu, emi ẹdiwak mbon udọn̄ọ, nnan, ye mbụn̄ọ ẹsidide. Mmọ ẹnịm ke akpanikọ ẹte ke owo ekeme ndikop nsọn̄idem ke ndiduọ ndụk n̄kpọdiọhọ mmọn̄ oro ke ini ẹtịmerede enye.

Edi usen Sabbath, ndien Jesus omokụt eren kiet ke itie n̄kpọdiọhọ mmọn̄ oro, emi ama ọkọdọn̄ọ udọn̄ọ ke isua 38. Ke ọfiọkde aban̄a adan̄a anyanini udọn̄ọ eren emi, Jesus obụp ete: “Nte ọdọn̄ fi ndikop nsọn̄idem?”

Enye ọbọrọ Jesus ete: “Ọbọn̄, nnyeneke owo eke emende mi esịn ke n̄kpọdiọhọ mmọn̄ ke ini ẹtịmerede mmọn̄: edi nte n̄kaka, owo en̄wen ebem mi iso osụhọde.”

Jesus ọdọhọ enye ete: “Daha ke enyọn̄, men mbịri fo, san̄a.” Ndondo oro eren emi okop nsọn̄idem, emen mbịri esie, onyụn̄ ọtọn̄ọ ndisan̄a!

Edi ke ini mme Jew ẹkụtde eren emi, mmọ ẹdọhọ ẹte: “Mfịn edi sabbath; inenke fi ndikama mbịri fo.”

Eren oro ọbọrọ mmọ ete: “Owo emi akanamde mi n̄kop nsọn̄idem ọdọhọ mi ete, Men mbịri fo, san̄a.”

Mmọ ẹbụp ẹte: “Anie edi owo emi ọkọdọhọde fi ete, Men mbịri fo, san̄a?” Jesus ama ọkpọkpọn̄ itie oro ke ntak otuowo, ndien owo emi ẹkekọkde udọn̄ọ mi ikọfiọkke enyịn̄ Jesus. Nte ededi, ke ukperedem, Jesus ye eren emi ẹsobo ke temple, ndien eren emi ọfiọk owo emi ọkọkọkde enye udọn̄ọ.

Ntre eren emi ẹkekọkde udọn̄ọ mi oyom mme Jew nditịn̄ nnọ mmọ nte ke edi Jesus akanam imọ ikop nsọn̄idem. Ke ẹkopde ẹban̄a emi, mme Jew ẹka ẹbịne Jesus. Ke nso ntak? Ndifiọk m̀mê nso ke enye ada ekeme ndinam mme utịben̄kpọ ẹmi? Baba. Edi man ẹkụt ndudue ẹnọ enye koro enye anamde nti n̄kpọ ẹmi ke usen Sabbath. Ndien mmọ ẹtọn̄ọ ndikam n̄kọbọ enye! Luke 4:44; John 5:​1-16.

▪ Ebịghi adan̄a didie tọn̄ọ nte Jesus akaka Judea?

▪ Ntak emi n̄kpọdiọhọ mmọn̄ oro ẹkotde Bethzatha enen̄erede ọwọrọ etop ntre-e?

▪ Nso utịben̄kpọ ke Jesus anam ke n̄kpọdiọhọ mmọn̄ oro, ndien didie ke mme Jew ẹnam n̄kpọ?