Ibuot 34

Ndimek Mme Apostle Esie

N̄KPỌ nte isua kiet ye ubak edi emi tọn̄ọ nte John Andinịm owo baptism akanam ẹdiọn̄ọ Jesus nte Eyenerọn̄ Abasi, Jesus okonyụn̄ ọtọn̄ọ an̄wan̄wa utom ukwọrọikọ esie. Ke ini oro Andrew, Simon Peter, John, ye iso-ọfọn James (eyeneka John), ọkọrọ ye Philip ye Nathanael (emi n̄ko ẹkotde Bartholomew), ẹma ẹkekabade ẹdi mme akpa mbet esie. Nte ini akade, ediwak mmọ eken ẹma ẹdiana ye mmọ ke nditiene Christ.

Idahaemi Jesus eben̄e idem ndimek mme apostle esie. Mmọemi ẹdidi n̄kpet n̄kpet nsan̄a esie ẹmi ẹdinọde san̄asan̄a ukpep. Edi mbemiso emekde mmọ, Jesus ọdọk ke obot onyụn̄ ada ofụri okoneyo oro ọbọn̄ akam, iso-ọfọn eben̄ede eti ibuot ye edidiọn̄ Abasi. Ke eyo esierede, enye okot mme mbet esie onyụn̄ emek owo 12 osio ke otu mmọ. Nte ededi, sia mmọ ẹsụk ẹkade iso ndidi nditọ ukpepn̄kpọ Jesus, ẹsụk ẹtiene ẹkot mmọ mme mbet.

Owo itiokiet oro Jesus emekde mi, ẹmi ẹkesiakde enyịn̄ ke enyọn̄ emi, ẹdi mbon oro ẹkekabarede ẹdi mme akpa mbet esie. Ẹmek Matthew n̄ko, emi Jesus okokotde osio ke itie ubọ tax esie. Owo ition eken ẹmekde ẹdi Judas (emi ẹkotde n̄ko Thaddaeus), Judas Iscariot, Simon Enyene Ifiopesịt, Thomas, ye James eyen Alphaeus. Ẹkot James emi n̄ko James Ekpri, iso-ọfọn ke ntak ekpride ke idaha idem m̀mê ke isua emana akan apostle James.

Etisịm idahaemi mbet 12 ẹmi ẹmedu ye Jesus ke ndusụk ini, ndien enye enen̄ede ọdiọn̄ọ mmọ. Ke akpanikọ, ediwak ke otu mmọ ẹdi iman esie. James ye eyeneka esie John nte an̄wan̄ade ẹdi nditọ eyeneka eka Jesus. Ndien etie nte ke Alphaeus ekedi eyeneka Joseph, kpa ete Jesus eke isọn̄. Ntre eyen Alphaeus, kpa apostle James, eyedi n̄ko eyen eyeneka ete Jesus.

Ke akpanikọ, Jesus inyeneke mfịna ke nditi enyịn̄ mme apostle esie. Edi nte afo emekeme nditi mmọ? Ọfọn, kam ti ete ke owo iba ẹkere Simon, owo iba ẹkere James, ndien owo iba ẹkere Judas, ye nte ke Simon enyene eyeneka, Andrew, ye nte ke James enyene eyeneka, John. Oro edi akpan usụn̄ nditi apostle itiaita. Inan̄ eken ẹsịne ọbọ a-⁠tax oro (Matthew), enyeemi ekenyenede eyịghe ke ukperedem (Thomas), enyeemi ẹkekotde ke idak eto (Nathanael), ye ufan esie, Philip.

Owo duopekiet ke otu mme apostle ẹmi ẹto Galilee, obio emana Jesus. Nathanael oto Cana. Philip, Peter, ye Andrew ẹnen̄ede ẹto Bethsaida, Peter ye Andrew ke ukperedem ẹma ẹwọrọ ẹkedụn̄ ke Capernaum, emi etiede nte ke Matthew okodụn̄ do. James ye John ẹkenam utom ukọ iyak ndien n̄ko anaedi ẹdụn̄ ke m̀mê ebiet ekperede Capernaum. Etie nte Judas Iscariot, emi akatapde Jesus ọnọ ke akpatre, edi n̄kukụre apostle emi otode Judea. Mark 3:​13-19; Luke 6:​12-⁠16.

▪ Mme apostle ewe ẹkeme ndikedi iman Jesus?

▪ Mmanie ẹdi mme apostle Jesus, ndien didie ke afo ekeme nditi enyịn̄ mmọ?

▪ Mme obio ewe ke mme apostle ẹmi ẹketo?