Ibuot 36
Ọkpọsọn̄ Mbuọtidem Akwa Owo Ekọn̄
KE INI Jesus ọnọde Ukwọrọikọ esie oro ke Obot, enye omosịm n̄kpọ nte mbahade iba ke an̄wan̄wa utom ukwọrọikọ esie. Emi ọwọrọ ete ke enye enyene n̄kpọ nte isua kiet ye ọfiọn̄ usụkkiet kpọt ndikụre utom esie ke isọn̄.
Jesus idahaemi omodụk obio Capernaum, kpa obio oro enye odude anam mme utom esie. Mi mbiowo mme Jew ẹda eben̄e ẹbịne enye. Edi akwa owo ekọn̄ mbon Rome emi edide owo Gentile ọdọn̄ mmọ ẹdi, kpa owo isio isio orụk oro mîdịghe owo Jew.
Edima asan̄autom akwa owo ekọn̄ emi ekpere ndikpa ke ntak ọkpọsọn̄ udọn̄ọ, ndien enye oyom Jesus anam udọn̄ọ okụre asan̄autom esie. Mme Jew ẹsọn̄ọ ẹkpe Jesus ubọk ke ibuot akwa owo ekọn̄ oro. Mmọ ẹdọhọ ẹte: “Owo oro odot nte Afo akpanamde n̄kpọ emi ọnọ enye; koro enye amade obio nnyịn, okonyụn̄ ọbọpde synagogue ọnọ nnyịn.”
Ye unana edimen̄e, Jesus asan̄a ye iren oro aka. Nte ededi, ke ini mmọ ẹsan̄ade ẹkpere, akwa owo ekọn̄ oro ọdọn̄ mme ufan ẹkedọhọ enye ẹte: “Ọbọn̄, kûnọ Idem Fo afanikọn̄: koro mmendotke nte Afo okpodụkde ke idak ọkọm mi: mmọdo nnyụn̄ mbatke nte ami ke idemmi ndot ndiwọrọ ntiene Fi.”
Nso ikọ nsụhọdeidem ke edi ntem ye akwa owo ekọn̄ emi emehede ndinọ mbon en̄wen ewụhọ! Edi ekeme ndidi enye n̄ko ekere aban̄a Jesus, ke ọdiọn̄ọde ete ke ido edinam akpan mme Jew ndinyene ebuana otuowo ye mbon oro mîdịghe mme Jew. Peter akakam ọdọhọ ete: “Mbufo ke idem mbufo ẹmefiọk ẹte ibet akpan owo emi edide Jew ndidian idem ndinyụn̄ nsan̄a n̄kpere owo emi otode idụt.”
Iso-ọfọn sia mîyomke Jesus ọbọ ufen ke ntak edibiat ido obio emi, akwa owo ekọn̄ oro ọdọn̄ mme ufan esie ẹben̄e enye ẹte: “Kam tịn̄ ikọ, ndien owo mi eyekop nsọn̄idem. Koro ami ke idemmi ndu ke idak edikara, mmonyụn̄ nnyene mbonekọn̄ ke idak mi; nnyụn̄ ndọhọ owo emi, nte, Ka, ndien enye aka; nnyụn̄ ndọhọ owo efen, nte, Di, ndien enye edi; nnyụn̄ ndọhọ owo mi, nte, Nam emi, ndien enye anam.”
Ọfọn, ke ini Jesus okopde ikọ emi enyene enye ndyọ. Enye ọdọhọ ete, “Ke akpanikọ ke ndọhọ mbufo nte, akananam n̄kwe mbuọtidem eke okponde ntem, kpa ke Israel.” Ke ama akanam udọn̄ọ okụre asan̄autom akwa owo ekọn̄ oro, Jesus ada ifet emi ndineme nte mbon oro mîdịghe mme Jew oro ẹnyenede mbuọtidem ẹkemede ndibọ mme edidiọn̄ oro mme Jew ẹmi ẹnanade mbuọtidem ẹfụmide.
Jesus ọdọhọ ete, “Ediwak owo ẹyeto ke edem usiahautịn ye edem usoputịn, ẹdisụhọde ẹtetie ye Abraham, ye Isaac, ye Jacob, ke Obio Ubọn̄ Heaven: edi ẹyeduọk nditọ Obio Ubọn̄ ke ekịm ke an̄wan̄wa: do ke editua eyet ye edita edet eyedu.”
‘Nditọ obio ubọn̄ oro ẹduọkde an̄wan̄wa ke ekịm’ ẹdi mme Jew eke obụk ẹmi mînyịmeke ndidara ifet edidi mme andikara ye Christ oro ẹkebemde iso ẹnọ mmọ. Abraham, Isaac, ye Jacob ẹda ẹban̄a ndutịm Obio Ubọn̄ Abasi. Ntre Jesus eneme nte ẹdidarade mme Gentile nditie ke okpokoro eke heaven, yak idọhọ, “ke Obio Ubọn̄ Heaven.” Luke 7:1-10; Matthew 8:5-13; Utom 10:28.
▪ Ntak emi mme Jew ẹsịnde eben̄e ke ibuot akwa owo ekọn̄ Gentile?
▪ Nso ikeme ndinam an̄wan̄a ntak emi akwa owo ekọn̄ oro mînọhọ Jesus ikot ndidụk ufọk esie?
▪ Nso ke utịt ikọ Jesus ọwọrọ?