Ibuot 37
Jesus Emen Mfụhọ Ebeakpa Efep
IBỊGHIKE ke ama akanam udọn̄ọ okụre asan̄autom akwa owo ekọn̄ oro, Jesus ọkpọn̄ aka Nain, kpa obio emi oyomde usụn̄ akan itiat 20 ke edem usụk usoputịn Capernaum. Mme mbet esie ye akwa otuowo ẹtiene enye. Etie nte ekpere ndisịm mbubịteyo ke ini mmọ ẹsan̄ade ẹkpere mbọhọ obio Nain. Mi ke mmọ ẹsobo ye udịm owo ẹmi ẹkade ndibụk owo. Ẹbiom okpo akparawa kiet ẹwọrọ ke obio ẹka ndibụk.
Idaha eka esie enyene mbọm etieti, sia enye edide ebeakpa ndien emi edi n̄kukụre eyen esie. Ke ini ebe esie akakpade, n̄wan emi ama ekeme ndibọ ndọn̄esịt ke akpanikọ oro nte ke imọ imenyene eyen eren. Idotenyịn, mme udọn̄, ye mme uduak esie ẹma ẹkọn̄ọ ke ini iso eyen esie. Edi kemi, owo ndomokiet idụhe oro enye edibọde ndọn̄esịt ito. Mfụhọ esie omokpon nte mbio obio ẹtienede enye ẹka itie ubụkowo.
Ke ini Jesus okụtde n̄wan oro, ọkpọsọn̄ mfụhọ esie otụk Jesus esịt. Ntre ye esịt mbọm eke asan̄ade ye nsọn̄ọnda oro ọnọde uko, Jesus ọdọhọ n̄wan oro ete: “Kûtua.” Edu ye edinam esie ẹdụri ntịn̄enyịn otuowo oro. Ntre ke ini enye asan̄ade ekpere onyụn̄ otụkde ubiom-okpo oro ẹdade ẹmen okpo emi, mme obiom okpo ẹtuak ẹda. Anaedi kpukpru owo ẹyịk ẹban̄a se enye oyomde ndinam.
Edi akpanikọ nte ke mmọ oro ẹtienede Jesus ẹma ẹkụt enye anamde udọn̄ọ okụre ediwak owo ke utịbe utịbe usụn̄. Edi nte an̄wan̄ade, akananam mmọ ikwe enye anamde owo ekededi eset ke n̄kpa. Nte enye ekeme ndinam utọ n̄kpọ oro? Ke etịn̄de ikọ ọnọ okpo oro, Jesus ọdọhọ ete: “Akparawa, ndọhọ fi nte, Daha ke enyọn̄.” Ndien eren oro adaha etetie! Enye ọtọn̄ọ nditịn̄ ikọ, ndien Jesus ayak enye ọnọ eka esie.
Ke ini mme owo oro ẹkụtde ẹte ke akparawa oro ke akpanikọ omodu uwem, mmọ ẹtọn̄ọ ndidọhọ ẹte: “Akwa prọfet amadaha ada ke otu nnyịn.” Mbon eken ẹdọhọ ẹte: “Abasi emedi ndise ikọt Esie.” Iwiwa, etop aban̄ade enyene-ndyọ edinam emi asuana ke ofụri Judea ye ke kpukpru n̄kann̄kụk idụt oro.
John Andinịm owo baptism osụk odu ke ufọk-n̄kpọkọbi, ndien enye oyom ndifiọk mban̄a utịbe utom efen efen oro Jesus ekemede ndinam. Mme mbet John ẹtịn̄ mme utịben̄kpọ ẹmi ẹnọ enye. Nso idi ibọrọ esie? Luke 7:11-18.
▪ Nso itịbe nte Jesus asan̄ade ekpere Nain?
▪ Didie ke se Jesus okụtde otụk enye, ndien nso ke enye anam?
▪ Didie ke mme owo oro ẹnam n̄kpọ ẹban̄a utịben̄kpọ Jesus?