Ibuot 39
Mbon N̄kohodeidem ye Mbon Nsụhọdeidem
KE AMA eketịn̄ aban̄a idaha John Andinịm owo baptism, Jesus ọwọn̄ọde ntịn̄enyịn owụt mbon n̄kohodeidem, mme anana nsọn̄ọnda oro ẹkande enye ẹkụk. Enye ọdọhọ ete: “Emana emi . . . ebiet nditọn̄wọn̄ ẹmi ẹtiede ke an̄waurua ẹkot n̄ka mmọ, ẹte, Imefụri ifiom inọ mbufo, edi mbufo inekke unek: imoyorode eyet, edi mbufo ifụhọke.”
Nso ke ikọ Jesus ọwọrọ? Enye anam an̄wan̄a ete: “John ekedi, idiaha n̄kpọ inyụn̄ in̄wọn̄ke; ndien mmọ ẹte, Enye enyene demon. Eyen Owo emedi, adia n̄kpọ onyụn̄ ọn̄wọn̄; ndien mmọ ẹte, Sese, owo udia ye amammịn, ufan mme publican ye mme idiọkowo.”
Imemke utom ndiyụhọ udọn̄ mme owo oro. N̄kpọ ndomokiet inemke mmọ esịt. John ama odu efam efam uwem n̄kan̄idem nte a-Nazirite, ke ndinam ekekem ye utịn̄ikọ angel oro nte ke “ [enye] idin̄wọn̄ke wine ye ọkpọsọn̄ mmịn.” Edi kpa ye oro mme owo ẹte ke enye enyene demon. Ke n̄kan̄ eken, Jesus odu uwem nte mme owo eken, idụhe efam efam uwem ndomokiet, edi ẹdori enye uyo ẹte anam n̄kpọ ebe ubọk.
Edi ọkpọsọn̄ n̄kpọ didie ntem ndinem mme owo ẹmi esịt! Mmọ ẹtie nte nsan̄a mbre, ẹmi ndusụk mmọ ẹsịnde ndinek unek ke ini nditọn̄wọn̄ eken ẹfụride ifiom m̀mê ẹsịnde ndifụhọ ke ini mmọ eken ẹyororede eyet. Edi, Jesus ọdọhọ ete: “Ubọkutom Eti Ibuot ẹwụt ẹte Eti Ibuot enen.” Ih, uyarade—kpa nti utom—anam ana in̄wan̄în̄wan̄ nte ke ikọ oro ẹdoride John ye Jesus ẹdi nsu.
Jesus akaiso ndisio obio ita nnịm san̄asan̄a nnọ isụn̄i, ẹmi ẹdide Chorazin, Bethsaida, ye Capernaum, oro enye akanamde n̄wakn̄kan utom odudu esie ke esịt. Jesus ọdọhọ ete ke ekpedide ikanam utom odudu ẹmi ke obio Tyre ye Sidon eke mbon Phoenicia, mmọ ẹkpekabade esịt anyanini ke ọfọn̄ikpo ye ntọn̄ukụt. Ke obiomde Capernaum ikpe, emi nte an̄wan̄ade edide obio emi enye okodude ke ini utom ukwọrọikọ esie, Jesus ọdọhọ ete: “N̄kpọ eyefọn ye isọn̄ Sodom ke usen ikpe akan ye afo.”
Ekem Jesus otoro Ete esie eke heaven an̄wan̄wa. Se inụkde enye ndinam emi edi koro Abasi odịpde mbon eti ibuot ye asian mme ọsọn̄urua akpanikọ eke spirit, edi ayararede ndyọ ndyọ n̄kpọ ẹmi ọnọ mme usụhọde owo, yak idọhọ, ẹdide nseknditọ.
Ke akpatre, Jesus ọnọ ikot oro edemerede udọn̄ ete: “Ẹtiene Mi, kpukpru mbufo ẹmi ẹkpade mba ẹnyụn̄ ẹbiomde edidobi mbiomo, ndien Ami nyenọ mbufo nduọkodudu. Ẹmen ọkpọnọ Mi ẹkọn̄ọ ke itọn̄ mbufo, ẹnyụn̄ ẹkpebe Mi; koro mmenyene ifụre ifụre ido nnyụn̄ nsụhọde idem ke esịt; ndien mbufo ẹyekụt nduọkodudu ẹnọ ukpọn̄ mbufo. Koro ọkpọnọ Mi ememem, mbiomo Mi onyụn̄ efefere.”
Didie ke Jesus ọnọ nduọkodudu? Enye anam ntre ke ndisio owo ke ufụn ido edinam ẹmi mme adaiso ido ukpono ẹdade ẹfịk mme owo, emi esịnede, ke uwụtn̄kpọ, mme ukpan ukpan ibet unịm Sabbath. Enye n̄ko omowụt mbon oro ẹdude ke idak ikpọ odudu ukaraidem ye mbon oro ẹkopde mfịghe idiọkn̄kpọ mmọ ke ntak esịt oro obiomde mmọ ikpe, usụn̄ ubọhọ. Enye amayarade ọnọ mme utọ mbon oro ẹkopde ndutụhọ mi nte ẹkemede ndifen mme idiọkn̄kpọ mmọ ye nte mmọ ẹkemede ndinyene eti itie ebuana ye Abasi.
Ima ima ọkpọnọ emi Jesus ọnọde edi kiet oro owo ayakde idem ọnọ Abasi ọyọhọ ọyọhọ, enyenede ukeme ndinam n̄kpọ nnọ ima ima, enyene mbọm Ete nnyịn eke heaven. Ndien mfefere mbiomo oro Jesus ọnọde mbon oro ẹdide ẹtiene enye edi eke edinịm ibet Abasi ke ofụri eyouwem, emi ẹdide mbet Esie oro ẹwetde ke Bible. Ndien ndinịm mmọemi ibiakke owo idem ke baba usụn̄ kiet. Matthew 11:16-30; Luke 1:15; 7:31-35; 1 John 5:3.
▪ Didie ke mbon n̄kohodeidem, mme anana nsọn̄ọnda eke eyo Jesus ẹbiet nditọn̄wọn̄?
▪ Ntak emi otụkde Jesus ke idem nditoro Ete esie eke heaven?
▪ Ke mme usụn̄ ewe ke ẹfịk mme owo, ndien nso nduọkodudu ke Jesus ọnọ?