Ibuot 42

Jesus Asua Ọnọ Mme Pharisee

JESUS afan̄a ete, edieke edide odudu Satan ke imọ ida ibịn mme demon iduọk, do Satan amabahade ada an̄wana ye idemesie. Enye akaiso etịn̄ ete: “Ẹnam eto ọfọn, ẹnyụn̄ ẹnam mfri esie ọfọn; mîdịghe ntre, ẹnam eto edi mbiara, ẹnyụn̄ ẹnam mfri esie edi mbiara n̄ko: koro ẹda mfri ẹfiọk eto.”

Edi ndisịme ndidọhọ nte ke eti mfri eke edibịn mme demon nduọk edi utịp oro Jesus anamde n̄kpọ Satan. Edieke mfri ọfọnde, eto oro ikemeke ndidi mbiara. Ke n̄kan̄ eken, mbiara mfri eke mme Pharisee oro ke ndida ndisịme edori ikọ ye ukọbọ oro mînyeneke ntak ntiene Jesus owụt nte ke mmọ ke idemmọ ẹmebiara. Jesus ofiori ete: “Mbufo ubon urụkikọt, mbufo ẹmi ẹdiọkde ẹkeme didie nditịn̄ nti n̄kpọ? Koro oto ke uyụhọ esịt ke inua osio etịn̄.”

Sia ikọ nnyịn ẹwụtde se idude nnyịn ke esịt, se nnyịn itịn̄de ke ẹda ẹbiere ikpe ẹnọ nnyịn. Jesus ọdọhọ ete: “Mmonyụn̄ ndọhọ mbufo nte, Ke usen ikpe mme owo ẹyenọ mbụk ẹban̄a kpukpru ikpîkpu ikọ eke mmọ ẹtịn̄de. Koro edito ikọ fo ke ikpe etebe fi, edinyụn̄ oto ikọ fo ke ikpe obiom fi.”

Kpa ye ofụri utom odudu oro Jesus anamde, mme scribe ye mme Pharisee ẹbụp ẹte: “Andikpep, nnyịn iyom ite Afo owụt nnyịn idiọn̄ọ.” Okposụkedi ekemede ndidi mme owo ẹmi ẹtode Jerusalem mi ikadaha enyịn mmọ ikụt mme utịben̄kpọ ẹmi enye akanamde, uyarade ntiense oro ẹkụtde ke enyịn ama odu aban̄a mmọ nte owo mîkemeke ndineni. Ntre Jesus ọdọhọ mme adaiso mme Jew oro ete: “Idiọk emana eke amade efụbe oyom idiọn̄ọ; ndien idinọhọ enye idiọn̄ọ, ibọhọke idiọn̄ọ prọfet Jonah.”

Ke ndinam se ikọ esie ọwọrọde an̄wan̄a, Jesus akaiso ete: “Koro nte Jonah okodude ke idịbi akamba iyak uwemeyo ita ye okoneyo ita, ntre ke Eyen Owo eyedu ke esịt isọn̄ uwemeyo ita ye okoneyo ita.” Ke iyak oro ama ekemen enye emen, Jonah ọkọwọrọ edi nte n̄kpọ eke esetde ke n̄kpa, ntre Jesus ebemiso etịn̄ ete ke imọ iyekpa inyụn̄ iset ididu uwem ke ọyọhọ usen ita. Edi, idem ke ini Jesus esetde ke ukperedem, mme adaiso mme Jew ẹsịn ‘idiọn̄ọ Jonah’ oro.

Ntem ke Jesus ọdọhọ ete ke mbon Nineveh ẹmi ẹkekabarede esịt ke ukwọrọikọ Jonah ẹyeset ke usen ikpe ẹnyụn̄ ẹbiom mme Jew oro ẹsịnde Jesus ikpe. Kpasụk ntre, enye ọnọ ukem uwụtn̄kpọ oro ye ọbọn̄-an̄wan Sheba, emi okotode ke utịt isọn̄ edi ndikop ọniọn̄ Solomon onyụn̄ odude ke n̄kpaidem aban̄a se enye okokụtde onyụn̄ okopde. Jesus ọdọhọ ete: “Ndien sese, Enyeemi okponde akan Solomon odu mi.”

Ekem Jesus ọnọ uwụtn̄kpọ aban̄a owo kiet emi ndedehe spirit ọkọwọrọde enye ke idem. Nte ededi, owo emi idaha nti n̄kpọ isịn iyọhọ ukpọk ebiet oro, ntre spirit itiaba eke ẹdiọkde ẹkan akpa ẹma ẹdidụk enye ke idem. Jesus ọdọhọ ete: “Kpa ntre ke edidi ye idiọk emana emi.” Ẹma ẹnam idụt Israel asana onyụn̄ okụt mme ukpụhọde​—⁠kpa nte ndedehe spirit oro ọkpọn̄de ke ibio ibio ini. Edi idụt emi ndisịn mme prọfet Abasi, adade okosụn̄ọ ke enye ndibiọn̄ọ Christ ke idemesie, amayarade nte ke idaha esie ọdọdiọn̄ ọdiọk akan ntọn̄ọ esie.

Ke adan̄aemi Jesus osụk etịn̄de ikọ, eka esie ye nditọeka esie ẹdisịm ẹnyụn̄ ẹda ẹkpere otuowo. Ntem owo kiet ọdọhọ ete: “Sese, uka ye nditọuka ke ẹda ke an̄wa, ẹyom Fi, ndineme [nneme] ye Afo.”

Jesus obụp ete: “Anie edi eka Mi? Mmanie ẹnyụn̄ ẹdi nditọeka Mi?” Ke anyande mme mbet esie ubọk, enye ọdọhọ ete: “Sese, eka Mi ye nditọeka Mi! Koro owo ekededi eke anamde se Ete Mi emi odude ke heaven amade, enye edi eyeneka Mi eren ye eyeneka Mi an̄wan, ye eka Mi.” Ke usụn̄ emi Jesus owụt ete ke inamke n̄kpọ m̀mê mbọbọ oro adiande imọ ye mme iman imọ ọsọn̄ adan̄a didie, se isụk isọn̄de urua ikan edi itie ebuana imọ ye mme mbet imọ. Matthew 12:​33-50; Mark 3:​31-35; Luke 8:​19-⁠21.

▪ Didie ke mme Pharisee ẹkpu ndinam “eto” ye “mfri” ẹfọn?

▪ Nso idi ‘idiọn̄ọ Jonah,’ ndien didie ke ẹsịn enye ke akpatre?

▪ Didie ke idụt Israel eke akpa isua ikie ẹbiet owo oro ndedehe spirit ọkọwọrọde ke idem?

▪ Didie ke Jesus ọsọn̄ọ etịn̄ aban̄a n̄kpet n̄kpet itie ebuana esie ye mme mbet esie?