Ibuot 51

Uwotowo ke Usọrọ Usen Emana

KE AMA ọkọnọ mme apostle esie item, Jesus ọdọn̄ mmọ ẹsan̄a iba iba ẹka ke efakutom oro. Eyedi nditọeka oro, Peter ye Andrew, ẹsan̄a kiet, ukem nte edide ye James ye John, Philip ye Bartholomew, Thomas ye Matthew, James ye Thaddaeus, ndien Simon ye Judas Iscariot. Udịm mme ­ọkwọrọikọ itiokiet ẹmi ẹkwọrọ eti mbụk Obio Ubọn̄ ẹnyụn̄ ẹnam mme utịbe utịbe ukọk udọn̄ọ ke kpukpru ebiet oro mmọ ẹkade.

Kemi kan̄a, John Andinịm owo baptism osụk odu ke ufọk-n̄kpọkọbi. Enye omodu do ke n̄kpọ nte isua iba idahaemi. Afo emekeme nditi ete ke John ama ọkwọrọ an̄wan̄wa ete ke inenke Herod Antipas ndida Herodias, n̄wan eyenete esie Philip, ndọ. Sia Herod Antipas ọkọdọhọde ke itiene Ibet Moses, John ama enen̄erede ayarade ndọ efụbe emi. Ntre Herod ama anam ẹsịn John ke ufọk-n̄kpọkọbi, ndusụk oto ke nsọk oro Herodias esịnde.

Herod Antipas ọmọfiọk ete ke John edi edinen owo onyụn̄ esikam akpakpan̄ utọn̄ ọnọ enye ye inemesịt. Ntre, ekikere otịmede enye aban̄a se enye akpanamde John. Herodias, ke n̄kan̄ eken, asasua John onyụn̄ akaiso oyom usụn̄ nte ẹkpewotde enye. Ke akpatre, ifet oro enye eketiede ebet ọbiọn̄ọde.

Ekpri ini mbemiso Passover eke 32 C.E., Herod odiomi akwa usọrọ usen emana esie. Mbọn̄ ye mme etubom ekọn̄ Herod, ọkọrọ ye ikpọ owo Galilee, ẹsop idem ndidia usọrọ emi. Nte ini akade ke mbubịteyo oro, ẹdọn̄ Salome, ekpri eyen-an̄wan Herodias emi enye akamande ọnọ akpa ebe esie Philip, edinek unek ọnọ isenowo oro. Irenowo ẹmi ẹbonode do ẹma unek esie etieti.

Herod enem esịt etieti ye Salome. Enye ọdọhọ ete, “Ben̄e mi n̄kpọ ekededi eke amade, ndien nyenọ fi.” Enye akam ọn̄wọn̄ọ ete: “N̄kpọ ekededi eke ediben̄ede ke nyenọ fi, ekpedi idem ubak edem kiet ubọn̄.”

Mbemiso ọbọrọde, Salome ọwọrọ ọkọbọ ifiọk oto eka esie. Enye obụp ete: “Nso ke n̄kpeben̄e?”

Ifet oro emeberede ke akpatre! Herodias ọbọrọ ye unana edimen̄e ete, “Ibuot John Baptist.”

Iwiwa Salome afiak edi onyụn̄ ediben̄e Herod ete: “Nyom afo ọnọ mi ibuot John Baptist idahaemi ke usan.”

Herod ofụhọ etieti. Edi sia isenowo esie ẹkekopde un̄wọn̄ọ esie, enye ikemeke ndisịn eben̄e eyen-an̄wan emi, idem okposụkedi emi ọwọrọde ndiwot eren eke mîduehe. Ndondo oro ẹsio owotowo ẹdọn̄ aka ufọk-n̄kpọkọbị ye enyene-ndịk ntọt esie. Ibịghịke enye afiak edi ye ibuot John ke usan, onyụn̄ ayak enye ọnọ Salome. Enye, n̄ko-n̄ko, ada emi ọsọk eka esie. Ke ini mme mbet John ẹkopde se itịbede, mmọ ẹdi ẹdimen okpo esie ẹkebụk, ndien ekem ẹtịn̄ n̄kpọ emi ẹnọ Jesus.

Edikem, ke ini Herod okopde aban̄a nte Jesus ọkọkde mme owo udọn̄ọ onyụn̄ ebịnde mme demon ọduọn̄ọ, idem enyek enye, sia enye okopde ndịk nte ke Jesus enen̄ede edi John emi ẹnamde eset ke n̄kpa. Ke oro ebede, enye enen̄ede oyom ndikụt Jesus, idịghe man okop ukwọrọikọ esie, edi man ọsọn̄ọ m̀mê se enye okopde ndịk aban̄a enen̄ede edi akpanikọ m̀mê nsu. Matthew 10:​1-⁠5; 11:⁠1; 14:​1-12; Mark 6:​14-29; Luke 9:​7-⁠9.

▪ Ntak emi John odude ke ufọk-n̄kpọkọbi, ndien ntak emi Herod mîyomke ndiwot enye?

▪ Didie ke Herodias ekeme ke akpatre ndinam ẹwot John?

▪ Ke John ama akakpa, ntak emi Herod oyomde ndikụt Jesus?