Ibuot 55

Ediwak Mbet Ẹkpọn̄ Jesus

JESUS ke ekpep n̄kpọ ke synagogue emi odude ke Capernaum aban̄a utom esie nte ata uyo emi otode heaven. Nte an̄wan̄ade, utịn̄ikọ esie edi n̄kaiso nneme oro enye ọkọtọn̄ọde ye mme owo ke ini mmọ ẹkekụtde enye ke usụn̄ unyọn̄ oro ẹketode edem usiahautịn n̄kan̄ Inyan̄ Galilee ẹdi, ke ebiet mmọ ẹkediade uyo ye iyak oro ẹkenọde ke utịbe usụn̄.

Jesus akaiso ke utịn̄ikọ esie, ete: “Uyo emi ndinọde edi obụkidem Mi, man ererimbot odu uwem.” N̄kpasịp isua iba ẹmi ẹkebede, ke ini-utọ eke 30 C.E., Jesus ama etịn̄ ọnọ Nicodemus ete ke Abasi akamama ererimbot ntem tutu enye ọnọ Eyen esie nte Andinyan̄a. Ntem, Jesus owụt kemi ete ke owo ekededi ke ererimbot ubonowo emi adiade obụkidem imọ ke ndamban̄a usụn̄, oto ke ndibuọt idem ke uwa ufak emi imọ idiwarade ndiwa, ekeme ndibọ nsinsi uwem.

Nte ededi, mme owo oro ẹtuak ukot ẹduọn̄ọ ke mme ikọ Jesus. Mmọ ẹbụp ẹte, “Owo emi ekeme didie ndinọ nnyịn obụkidem Esie idia?” Jesus oyom mme andikop ikọ esie ẹdiọn̄ọ ẹte ke edita obụkidem imọ edidi ke ndamban̄a usụn̄. Ntre, man ọsọn̄ọ owụt emi, enye etịn̄ n̄kpọ oro owo mîsụk imaha-ma edieke ẹdade ikọ emi ke ata idem n̄kpọ.

Jesus ọdọhọ ete, “Edieke mbufo mîdiaha obụkidem Eyen owo, mînyụn̄ in̄wọn̄ke iyịp Esie, mbufo inyeneke uwem ke esịt mbufo. Owo eke adiade obụkidem Mi, onyụn̄ ọn̄wọn̄de iyịp Mi enyene nsinsi uwem; Ami nyenyụn̄ nnam enye eset ke akpatre usen. Koro obụkidem Mi edi ata udia, iyịp Mi onyụn̄ edi ata edin̄wọn̄ n̄kpọ. Owo eke adiade obụkidem Mi, onyụn̄ ọn̄wọn̄de iyịp Mi, osụk odụn̄ Mi ke idem, Ami nnyụn̄ ndụn̄ enye ke idem.”

Ke akpanikọ, ukpepn̄kpọ Jesus ekpetek owo esịt etieti ke ekpedide enye ọkọnọ ekikere aban̄a uta-owo. Edi, ke akpanikọ, Jesus itịn̄ke iban̄a edita ata obụkidem owo m̀mê edin̄wọn̄ ata iyịp owo. Enye n̄kukụre ọsọn̄ọ owụt ete ke ana kpukpru owo ẹmi ẹbọde nsinsi uwem ẹnyene mbuọtidem ke uwa oro enye oyomde ndiwa ke ini enye awade mfọnmma idemesie eke owo onyụn̄ ọduọkde iyịp uwem esie. Kpa ye oro, idem ediwak mbet esie idomoke ndifiọk se ukpepn̄kpọ esie ọwọrọde, ndien ke ntre ẹfan̄a ẹte: “Ikọ emi ọsọn̄ ebe: anie ekeme ndikop utọ n̄kpọ oro?”

Ke ọfiọkde ete ke ediwak mbet esie ke ẹkụni ẹban̄a ikọ emi, Jesus ọdọhọ ete: “Nte ikọ ẹmi ẹsịn mbufo ẹduọ? Ekpetie ndien didie edieke mbufo ẹkpekụtde nte Eyen Owo ọdọkde aka ke ọtọ nte Enye ekebemde iso odu? . . . Mme ikọ oro n̄ketin̄de nnọ mbufo ẹdi spirit ẹnyụn̄ ẹdi uwem. Edi ndusụk owo ẹdu ke otu mbufo ẹmi mînịmke ke akpanikọ.”

Jesus akaiso etịn̄ ete: “Emi esịn Mi ndọhọ mbufo nte, baba owo kiet ikemeke nditiene Mi, ibọhọke Ete ọnọ enye ukeme.” Ye mme ikọ oro, ediwak mbet esie ẹdianade ẹkpọn̄ enye inyụn̄ itieneke enye aba. Ntre Jesus ọwọn̄ọde ese mme apostle esie 12 onyụn̄ obụp ete: “Nte ke ọdọn̄ mbufo n̄ko ndidianade nnyọn̄?”

Peter ọbọrọ ete: “Ọbọn̄, nnyịn iditiene anie? Afo enyene ikọ uwem nsinsi. Nnyịn imonyụn̄ inịm ke akpanikọ inyụn̄ ifiọk ite, Afo edi Edisana Eyen Abasi.” Nso ediye usụn̄ ndiwụt edinam akpanikọ, idem okposụkedi ekemede ndidi Peter ye mme apostle eken ikọfiọkke ọyọhọ ọyọhọ se ukpepn̄kpọ Jesus ọkọwọrọde ke n̄kpọ emi!

Okposụkedi okokopde inemesịt ke ibọrọ Peter, Jesus etịn̄ ete: “Nte n̄kemekke mbufo owo duopeba? Ndien owo kiet ke otu mbufo edi demon [“ọdọk edidọk,” NW ].” Enye etịn̄ aban̄a Judas Iscariot. Eyedi ke itie emi ke Jesus okụt nte ekikere edidụk ukwan̄ usụn̄ ‘ọtọn̄ọde,’ m̀mê otịbede ke esịt Judas.

Ibịghike Jesus akanam idotenyịn mme owo akpa mfụhọ ke ndibiọn̄ọ ukeme mmọ ndinam enye edi edidem, ndien mmọ ẹkeme ndikere ẹte, ‘didie ke emi ekeme ndidi Messiah edieke enye mînyịmeke ndibọ nnennen itie oro enyenede Messiah?’ Emi, n̄ko, edi n̄kpọ oro osụk odude ke ekikere mme owo oro. John 6:​51-71; 3:⁠16.

▪ Mmanie ke Jesus ọnọ obụkidem esie, ndien didie ke mmọemi ‘ẹdia obụkidem esie’?

▪ Nso ikọ Jesus efen akpa mme owo idem, edi nso ke oro ọsọn̄ọ etịn̄ aban̄a?

▪ Ke ini ediwak owo ẹkpọn̄de Jesus, nso idi ibọrọ Peter?