Ibuot 57
Nditua Mbon N̄kpọnnam Mbọm
KE AMA okobiom mme Pharisee ikpe kaban̄a ibụk ibụk item idemmọ, Jesus ọkpọn̄ ye mme mbet esie. Afo emekeme nditi, ete ke ikebịghike, otuowo ẹma ẹyom enye ẹkụt ke edidomo oro enye okodomode ndikpọn̄ mmọ n̄kọbọ esisịt nduọkodudu. Idahaemi, ye mme mbet esie, enye osio aka ikpehe obio Tyre ye Sidon, ediwak itiat ke n̄kan̄ edere edere. Nte an̄wan̄ade, enye edi n̄kukụre isan̄ oro Jesus anamde ye mme mbet esie ebe adan̄a obio Israel.
Ke ama okokụt ufọk emi ẹdidude, Jesus anam ẹfiọk ẹte ke imọ iyomke owo ndomokiet ọfiọk ebiet eke mmimọ idude. Kpa ye oro, idem ke ebiet emi mîdịghe ikpehe obio Israel mi, enye ikemeke ndidịbe. N̄wan Greek kiet emi amanade mi ke Phoenicia eke Syria, okụt enye onyụn̄ ọtọn̄ọ ndikpe ubọk ete: “Tua mi mbọm, O Ọbọn̄, Afo Eyen David; demon ke otụhọde eyen mi an̄wan etieti.” Nte ededi, Jesus ibọrọke ndomo ikọ kiet.
Ke akpatre, mme mbet esie ẹdọhọ Jesus ẹte: “Sio n̄wan emi unyọn̄; koro enye ke ofiori etiene nnyịn ke edem.” Ke ndinam an̄wan̄a ntak emi enye mîdọn̄ke n̄wan emi enyịn, Jesus ọdọhọ ete: “Ikọdọn̄ke Mi ntiene mmọ efen, ke mîbọhọke nsomo erọn̄ ufọk Israel.”
Nte ededi, n̄wan emi ikpaha mba. Enye asan̄a ekpere Jesus onyụn̄ ọduọ enye ke ukot. Enye ekpe ubọk ete, “Ọbọn̄, n̄wam mi.”
Didie ke n̄kpeubọk esịt-akpanikọ an̄wan emi otụk Jesus ntem ke esịt! Kpa ye oro, enye afiak osio akpa mbiomo esie owụt, oro edi ndinam n̄kpọ nnọ ikọt Abasi ẹdide Israel. Ke ukem ini oro, nte an̄wan̄ade, ke ndidomo mbuọtidem an̄wan emi nse, enye ada ekikere esịt usua oro mme Jew ẹnyenede ẹban̄a mbon idụt efen, afan̄ade ete: “Idịghe se ikemde, ndimen uyo nditọ nduọk nnọ mme ebua [“n̄kpri ebua,” NW ].”
Ebede ke mbọm mbọm uyoikọ ye iso mfụhọ esie, Jesus ke akpanikọ ayarade esịtmbọm oro enye enyenede aban̄a mbon oro mîdịghe mme Jew. Enye akam osụhọde udomo edimen oro ẹsimende mme Gentile ẹdomo ye mme ebua ke nditịn̄ mban̄a mmọ nte “n̄kpri ebua,” m̀mê nditọ ebua. Utu ke ọbọ ke iyatesịt, n̄wan emi ọbọrọ etiene ikọ Jesus oro etịn̄de otụk esịt usua mme Jew onyụn̄ etịn̄ ikọ nsụhọdeidem ete: “Emekeme, Ọbọn̄; koro mme ebua ẹnyụn̄ ẹdiade n̄ken̄e udia eke ẹtode ke okpokoro mme andinyene mmọ ẹduọn̄ọ.”
Jesus ọbọrọ ete: “O n̄wan, mbuọtidem fo omokpon; yak ọwọrọ ọnọ fi nte oyomde.” Ndien enye ọwọrọ kpasụk ntre! Ke ini n̄wan emi ọnyọn̄de osịm ufọk esie, enye okụt eyen esie an̄wan anade ke n̄kpana, ye ọyọhọ nsọn̄idem.
Otode ke ikpehe mbenesụk Sidon, Jesus ye mme mbet esie ẹsio ẹbe idụt oro, ẹka n̄kan̄ iso Akpa Jordan. Nte an̄wan̄ade mmọ ẹsan̄a ke ukot ẹbe Jordan ke n̄kan̄ obot obot Inyan̄ Galilee ẹdụk ikpehe obio Decapolis n̄kan̄ edem usiahautịn inyan̄ oro. Do ke mmọ ẹdọk obot, edi otuowo ẹkụt mmọ ẹnyụn̄ ẹda mme mbụn̄ọ, mme obiomo-ndo, nnan, ye imụm mmọ ẹsọk Jesus, ye ediwak mmọ eken ẹkedọn̄ọde udọn̄ọ efen ye mbon n̄kpọnnam. Ẹda mmọ ẹdinịm ke ukot Jesus, ndien enye ọkọk mmọ. Idem akpa mme owo, ndikụt nte imụm etịn̄de ikọ, mbụn̄ọ adahade isan̄, ye nte nnan okụtde usụn̄; mmọ ẹnyụn̄ ẹtoro Abasi Israel.
Jesus ọnọ akpan ntịn̄enyịn ke eren kiet emi edide inan mînyụn̄ ikemeke nditịn̄ ikọ. Mbon inan ẹsisọp ndikop bụt, akpan akpan ke otuowo. Ekeme ndidi Jesus okụt nte eren emi okopde nyekidem. Ntre Jesus ke esịtmbọm ada enye ke ndịbe ọwọrọ ọkpọn̄ otuowo. Ke ini mmọ ẹdude ikpọn̄, Jesus owụt se imọ idinamde inọ enye. Jesus ada nnuenubọk esịn eren emi ke utọn̄ mbiba, ndien ke ama ọkọkọk etap, otụk enye ke edeme. Ndien, ke emenerede enyịn ese enyọn̄, Jesus omụm mmụm onyụn̄ ọdọhọ ete: “Yak esịrede.” Ndondo oro, utọn̄ eren emi esịrede, ndien enye ekeme nditịn̄ ikọ mfọn mfọn.
Ke ini Jesus ọkọkde ediwak udọn̄ọ ẹmi ama, otuowo ẹnyụn̄ ẹbọrọ ye esịtekọm. Mmọ ẹdọhọ ẹte: “Enye ototịm anam kpukpru n̄kpọ; Enye anam kpa mme inan ẹkop ikọ, mme imụm ẹnyụn̄ ẹtịn̄ ikọ.” Matthew 15:21-31; Mark 7:24-37.
▪ Ntak emi Jesus mînamke idem ọsọn̄ eyen n̄wan a-Greek oro iwiwa-a?
▪ Ke oro ebede, m̀mọ̀n̄ ke Jesus ada mme mbet esie aka?
▪ Didie ke Jesus ke esịtmbọm anam n̄kpọ ye eren inan oro mîkemeke nditịn̄ ikọ?