Ibuot 59
Anie ke Jesus Enen̄ede Edi?
KE INI ubom emi emende Jesus ye mme mbet esie ebehede ke Bethsaida, mme owo ẹda owo nnan ẹsọk enye ẹnyụn̄ ẹkpe enye ubọk ẹte otụk owo emi onyụn̄ anam idem ọsọn̄ enye. Jesus omụm owo oro ke ubọk ọwọrọ ke obio-in̄wan̄ oro ndien, ke ama akafiari enye etap ke enyịn, obụp ete: “Nte omokụt n̄kpọ?”
Eren oro ọbọrọ ete, “Mmokụt owo; koro n̄kụt mmọ ẹsan̄ade nte ẹdide eto.” Ke odoride eren oro ubọk ke enyịn, Jesus anam enyịn esie ẹkabade ẹfọn, ke ntem anamde enye okụt n̄kpọ mfọn mfọn. Ekem Jesus ọnọ eren oro ọnyọn̄ ufọk, onyụn̄ ọnọ enye item ete okûdụk obio.
Kemi Jesus ye mme mbet esie ẹwọn̄ọ ẹka mme obio-in̄wan̄ Caesarea Philippi, emi odude ke ata utịt utịt edem edere Palestine. Enye edi anyan obot emi ọniọn̄de ke n̄kpọ nte itiat 30, osịm ediye ebiet emi Caesarea Philippi odude, kpa obio emi adade n̄kpọ nte ikpat 1,150 okon̄ akan udomo inyan̄. Eyedi isan̄ emi ada usen ifan̄ kpọt.
Ke usụn̄, Jesus ọwọrọ aka ndibọn̄ akam ikpọn̄. N̄kpọ nte ọfiọn̄ usụkkiet m̀mê duop kpọt ẹsụhọ mbemiso n̄kpa esie, ndien enye emekere aban̄a mme mbet esie. Ediwak mmọ ẹma ẹdianade ẹkpọn̄ enye. Nte an̄wan̄ade, esịt otịmede mmọ eken ndien idotenyịn mmọ akpa mfụhọ koro enye mîkenyịmeke mme owo ẹnam enye edidem n̄ko koro enye mîkowụtke idiọn̄ọ otode heaven ndisọn̄ọ itie edidem esie, ke ini mme asua esie ẹkedọhọde enye anam ntre. Nso ke mme apostle esie ẹnịm ke akpanikọ ẹban̄a owo emi enye edide? Ke ini mmọ ẹsịmde ebiet oro enye ọbọn̄de akam, Jesus obụp ete: “Mme otuowo ẹdọhọ ẹte Ami ndi anie?”
Mmọ ẹbọrọ ẹte, “Ndusụk owo ẹte, John Baptist; ndusụk ẹte, Elijah; mmọ efen ẹte, Jeremiah; mîdịghe, owo kiet ke otu mme prọfet.” Ih, mme owo ẹkere ke Jesus edi kiet ke otu mme owo ẹmi ẹnamde eset ke n̄kpa!
Jesus obụp ete, “Edi mbufo ẹdọhọ ẹte Ami ndi anie?”
Peter ọbọrọ usọp usọp ete: “Afo edi Christ, Eyen Abasi uwem.”
Ke ama okonyịme ibọrọ Peter, Jesus ọdọhọ ete: “Ami mmonyụn̄ ndọhọ fi nte, Afo edi Peter, ndien nyebọp ufọk [“esop,” NW ] Mi ke enyọn̄ itiat emi, mme inuaotop Hades idienyụn̄ ikanke enye.” Emi edi akpa itie oro Jesus ọtọtde ete ke imọ iyebọp esop ndien nte ke idem n̄kpa idimụmke mme andibuana ke enye inịm nte ifụn ke mmọ ẹma ẹkụre utom mmọ ke isọn̄ ke edinam akpanikọ. Ekem enye asian Peter ete: “Nyeda mme ukpọhọde Obio Ubọn̄ Heaven nsịn fi ke ubọk.”
Ntem ke Jesus ayarade ete ke Peter eyebọ mme akpan ifetutom. Baba, owo imekke Peter nte etubom ke otu mme apostle, m̀mê ndinam enye edi itiat idakisọn̄ esop oro. Jesus ke idemesie edi Itiat oro ẹdibọpde esop esie ẹdori. Edi ẹyenọ Peter ukpọhọde ita ẹmi enye edidade atat usụn̄, yak idọhọ, eberede ifet ọnọ mme otuowo ndidụk Obio Ubọn̄ heaven.
Peter edida akpa ukpọhọde esịn ke edinam ke Pentecost eke 33 C.E., man owụt mme Jew oro ẹkabarede esịt se anade mmọ ẹnam man ẹkụt edinyan̄a. Ekpri ini ke oro ebede, enye eyeda ọyọhọ ukpọhọde iba esịn ke edinam ke ini enye ediberede ifet ọnọ mbon Samaria oro ẹnịmde ke akpanikọ ndidụk Obio Ubọn̄ Abasi. Ekem, ke 36 C.E. enye eyeda ọyọhọ ukpọhọde ita esịn ke edinam ke ndiberede ukem ifet oro nnọ mme Gentile ẹmi mînaha mbobi, kpa Cornelius ye mme ufan esie.
Jesus akaiso ke nneme esie ye mme apostle esie. Enye anam mmọ ẹkop mfụhọ ke ndisian mmọ mban̄a ndutụhọ ye n̄kpa emi enye edisọpde ndisobo ke Jerusalem. Ke mîfiọkke ite ke ẹyenam Jesus eset ekenyene uwem eke heaven, Peter omụm Jesus ọwọn̄ọde ada. Enye ọdọhọ ete, “Idiọkn̄kpọ aka nsannsan ye Afo, Ọbọn̄; utọ n̄kpọ emi idiwọrọke Fi.” Ke ọwọn̄ọrede ada, Jesus ọbọrọ ete: “Da ke edem Mi, Satan. Afo edi n̄kpọ iduọ ọnọ Mi; koro afo ukereke n̄kpọ Abasi, edi ekere n̄kpọ owo.”
Nte an̄wan̄ade, mmọ eken, ke adianade ye mme apostle, ẹtiene Jesus ẹka isan̄ emi, ntre enye kemi okot mmọ ẹdi onyụn̄ anam an̄wan̄a ete ke ididịghe mmemmem n̄kpọ owo ndidi mbet imọ. Enye ọdọhọ ete: “Owo ekededi ama oyom nditiene Mi, yak Enye otụk idemesie, onyụn̄ emen [“eto ndutụhọ,” NW ] esie etiene Mi. Koro owo ekededi eke oyomde ndinyan̄a uwem esie eyeduọk enye; edi owo ekededi eke ọduọkde uwem esie kaban̄a Mi ye gospel, ẹyenyan̄a enye.”
Ih, edieke mmọ ẹdidotde ndibọ ufọn esie, ana mme mbet Jesus ẹnyene uko ẹnyụn̄ ẹwa idem. Enye etịn̄ ete: “Koro owo ekededi eke okopde bụt ye Ami ye ikọ Mi ke idiọk emana use emi, Eyen owo eyekop bụt ye enye, ke ini Enye edide ke ubọn̄ Ete Esie ye ndisana angel Esie.” Mark 8:22-38; Matthew 16:13-28; Luke 9:18-27.
▪ Ntak emi Jesus ekerede aban̄a mme mbet esie?
▪ Nso ekikere ke mme owo ẹnyene ẹban̄a owo emi Jesus edide?
▪ Mme ukpọhọde ewe ke ẹnọ Peter, ndien didie ke ẹdida mmọ ẹsịn ke edinam?
▪ Nso edinen̄ede ke Peter ọbọ, ndien ntak-a?