Ibuot 61
Eyeneren Emi Enyenede Demon Okop Nsọn̄idem
KE ADAN̄AEMI Jesus, Peter, James, ye John ẹdahade, eyedi ẹdọk Obot Hermon, mme mbet eken ẹdụk mfịna. Ke ọnyọn̄de edi, Jesus ọsọsọp okụt ete ke n̄kpọ akwan̄a. Otuowo ẹda ẹkanade mme mbet esie ẹkụk, ndien mme scribe ke ẹneni eneni ye mmọ. Ke ẹkụtde Jesus, idem akpa mme owo etieti ndien mmọ ẹfehe ẹka ẹkekọm enye. Enye obụp ete, “Mbufo ẹneni nso ye mmọ.”
Ke ọwọrọde ke otuowo oro edi, eren kiet editọn̄ọ edọn̄ ke iso Jesus onyụn̄ ọdọhọ ete: “Andikpep, n̄kada eyeneren mi, emi enyenede spirit imụm, nsọk Fi; ndien ọtọ nte spirit oro omụmde enye, osio enye ọduọk ke isọn̄, enye onyụn̄ osio efot, onyụn̄ ata edet, idem onyụn̄ ọdọdiọn̄ ọdiọk enye: mmonyụn̄ ndọhọ mbet Fo nte ẹbịn enye ẹduọk, edi mmọ ikemeke.”
Nte an̄wan̄ade, mme scribe ẹnen̄ede ẹda ifet edikpu oro mme mbet ẹkpude ndikọk eyeneren emi ẹsak mmọ nsahi. Kpa ke idiọk idaha emi, ke Jesus edibehe. Enye ọdọhọ ete, “O emana emi ananade mbuọtidem, adan̄a didie ke ndidu ye mbufo? Adan̄a didie ke ndime ime ye mbufo?”
Etie nte Jesus etịn̄ ikọ emi ọnọ kpukpru owo oro ẹdude do, edi nte eyịghe mîdụhe, enye etịn̄ ikọ oro akpan akpan ọnọ mme scribe, ẹmi ẹsịnde ntịme ye mme mbet esie. Ekem, Jesus etịn̄ aban̄a eyeneren oro ete: “Da enye sọk Mi.” Edi nte eyen emi asan̄ade ebịne Jesus, demon oro odude enye ke idem onụk enye ọduọk ke isọn̄ onyụn̄ esịn̄ede enye ọkpọsọn̄ ọkpọsọn̄. Eyen oro ewere ke isọn̄ onyụn̄ osio efot ke inua.
Jesus obụp ete, “Ebịghi adan̄a didie nte n̄kpọ emi ọkọtọn̄ọ ndinam enye?”
Ete esie ọbọrọ ete, “Toto ke uyen. [Demon] onyụn̄ awawak ndisio enye nduọk ke ikan̄ ye ke mmọn̄, ete iwot enye.” Ndien ete oro ekpe ubọk ete: “Edieke Afo ekemede ndinam n̄kpọ, tua nnyịn mbọm, nyụn̄ n̄wam nnyịn.”
Ekeme ndidi ke ediwak isua, ete ke okoyom un̄wam. Ndien idahaemi, ye edikpu oro mme mbet Jesus ẹkpụde, idotenyịn esie ototịm akpa mfụhọ. Ke okụtde okpọsọn̄ n̄kpeubọk itie nnanenyịn eren oro, Jesus etịn̄ ikọ nsịnudọn̄ ete: “Edieke ekemede! Kpukpru n̄kpọ ẹkeme ndiwọrọ nnọ enyeemi ọbuọtde idem.”
Ndondo oro ete eyen oro ofiori ete, “Mmọbuọt idem,” edi enye eben̄e ete: “N̄wam unana mbuọtidem mi.”
Ke okụtde nte otuowo ẹfehede ẹdi, Jesus asua ọnọ demon oro ete: “Afo spirit imụm ye inan, mmowụk fi, wọrọ enye ke idem, kûnyụn̄ udụk enye ke idem aba.” Nte demon oro ọwọrọde, enye afiak anam eyen oro ofiori onyụn̄ esịn̄ede enye etieti. Ndien eyen oro ọsụhọ, tutu ediwak owo ẹtọn̄ọ ndidọhọ ẹte: “Enye amakpa.” Edi Jesus omụm eyen emi ke ubọk, enye onyụn̄ adaha ada.
Ke mbemiso, ke ini ẹkesiode mme mbet ẹdọn̄ ndikwọrọ ikọ, mmọ ẹma ẹbịn mme demon ẹduọn̄ọ. Ntre idahaemi, ke ini mmọ ẹdụkde ke ufọk, mmọ ẹbụp Jesus ke ndịbe ẹte: “Nsinam nnyịn mîkekemeke ndibịn enye nduọk?”
Ke owụtde ete ke ekedi ntak unana mbuọtidem mmọ, Jesus ọbọrọ ete: “Orụk emi ikemeke ndiwọrọ, ibọhọke ke akam.” Nte an̄wan̄ade, ama oyom ata ntịmidem man ẹbịn san̄asan̄a okopodudu demon emi akabuanade ke isan̄ enyeemi. Ama oyom ọkpọsọn̄ mbuọtidem ye akam oro ẹbọn̄de ẹben̄e ọkpọsọn̄ odudu Abasi ndin̄wam.
Ndien ekem Jesus adian do ete: “Ke akpanikọ ke ndọhọ mbufo, edieke mbufo ẹkpenyenede mbuọtidem nte n̄kpasịp mustard, mbufo ẹkpedọhọ obot emi ẹte, daha kpọn̄ ọtọ emi, kọwụhọ ko, ndien enye eyedaha: baba n̄kpọ kiet idinyụn̄ isọn̄ke ikan mbufo.” Didie ke mbuọtidem ekeme ndikop odudu ntem!
Mme n̄kpọ ubiọn̄ọ ye nsọn̄ọn̄kpọ oro ẹbiọn̄ọde n̄kọri ke utom Jehovah ẹkeme nditi nte se owo mîkemeke ndikan m̀mê ndimen mfep nte ata akamba obot. Kpa ye oro, Jesus owụt ete ke edieke nnyịn ikọride mbuọtidem ke esịt nnyịn, ibọkde inyụn̄ in̄wamde enye ndikọri, enye eyekpon osịm ọyọhọ idaha eyenyụn̄ an̄wam nnyịn ndikan mme utọ n̄kpọ ubiọn̄ọ ye mme nsọn̄ọn̄kpọ oro ẹkponide nte akamaba obot mi. Mark 9:14-29; Matthew 17:19, 20; Luke 9:37-43.
▪ Nso idaha ke Jesus osobo ke ini otode Obot Hermon edi?
▪ Nso nsịnudọn̄ ke Jesus ọnọ ete eyen oro demon okodụn̄de ke idem?
▪ Ntak emi mme mbet mîkemeke ndibịn demon oro nduọk-ọ?
▪ Jesus owụt ke mbuọtidem ekeme ndikabade nnyene odudu didie?