Ibuot 76

Ndidia Udia ye Owo Pharisee

KE JESUS ama ọkọnọ mbon nsụkuyo ibọrọ ke mbụme oro mmọ ẹkebụpde enye ẹban̄a itie oro enye adade odudu esie ndikọk eren oro mîkekemeke nditịn̄ ikọ, owo Pharisee kiet okot enye udia. Mbemiso mmọ ẹdiade udia, mme Pharisee ẹtọn̄ọ ido uyet ubọk mmọ n̄kosịm ekụn̄ubọk. Mmọ ẹsinam emi mbemiso ye ke ẹma ẹkedia udia ẹkụre ye idem ke ẹsụk ẹkade iso ke udia. Kpa ye oro ido edinam emi mîbiatke ibet Abasi oro ẹwetde-wet, enye aka anyan ọkpọn̄ se Abasi oyomde ke n̄kpọ aban̄ade edinam usanaidem.

Ke ini Jesus mînịmke ido edinam emi, enyeneufọk odu ke n̄kpaidem. Idem okposụkedi nte mîsioho se ikpade enye idem itịn̄, Jesus ọdiọn̄ọ onyụn̄ ọdọhọ ete: “Kemi ke mbufo mme Pharisee ẹnanam edem cup ye usan asana; edi esịt mbufo ọyọhọ ye n̄wo ye udu. Mbufo mme anana-ibuot, nte idịghe Enyeemi akanamde edem mmọ anam esịt mmọ n̄ko?”

Jesus ke ntem ayarade mbubịk ido mme Pharisee, emi ke ido edinam ẹyetde ubọk mmọ edi ẹkpude ndiyet esịt mmọ nsio se idiọkde mfep. Enye ọnọ item ete: “Ẹkam ẹda mme n̄kpọ eke ẹdude ke esịt mmọ ẹnọ mme ubuene, ndien sese, kpukpru n̄kpọ ẹsana ẹnọ mbufo.” Esịt ima ekpenyene ndidemede enọ oro mmọ ẹnọde, idịghe udọn̄ ndinam mmọ en̄wen ẹkụt abian̄a abian̄a uwụt edinen ido mmọ.

Jesus akaiso ete, “Eyedọdiọk ọnọ mbufo mme Pharisee, koro mbufo ẹsiode ubak ikọn̄ ye etidot ye kpukpru orụk ikọn̄ udia kiet ke itie duop ẹnọ Abasi, ẹnyụn̄ ẹkan̄ade edinen ikpe ye ima Abasi: mbufo ẹkpenam n̄kpọ emi, ikponyụn̄ itreke ndinam mmọ eken.” Ibet oro Abasi ọkọnọde Israel oyom ẹkpe ọyọhọ ubak duop m̀mê ubak kiet ke itie duop, ke mbun̄wụm in̄wan̄. Ubak ikọn̄ ye etidot ẹdi n̄kpri ikọn̄ m̀mê ibọk oro ẹdade ẹnam udia enyene inem. Mme Pharisee ke ntịn̄enyịn ẹnọ idem ọyọhọ ubak duop eke ata n̄kpri ikọn̄ ẹmi, edi Jesus obiom mmọ ikpe ke mmọ ndifụmi se ikam idide akpan n̄kpọ ikan, ediwụt ima, edinyene mfọnido, ye ediwụt nsụhọdeidem.

Ke akade iso obiom mmọ ikpe, Jesus ọdọhọ ete: “Eyedọdiọk ọnọ mbufo mme Pharisee! koro mbufo ẹmade ikpọ itie ke synagogue, ye ekọm ke an̄waurua. Eyedọdiọk ọnọ mbufo! koro mbufo ẹbietde udi eke ẹdịbede, eke owo ẹmi ẹsan̄ade ke enyọn̄ mmọ mîdiọn̄ọke.” Mbubiam mmọ inaha in̄wan̄în̄wan̄. Ido ukpono mme Pharisee owụt idem enyọn̄ enyọn̄ edi iwọrọke usiene ke esịt esịt! Enye ọkọn̄ọ ke mbubịk ido.

Ke okopde utọ ubiomikpe oro, ọfiọkibet kiet, kpa kiet ke otu mme ọfiọk Ibet Abasi, okụni ete: “Andikpep, ke edidọhọ n̄kpọ emi ntem, emesuene nnyịn n̄ko.”

Jesus omụm mme ọfiọk Ibet ẹmi nte ẹnyenede nduduọhọ n̄ko, ọdọhọde ete: “Eyedọdiọk ọnọ mbufo, mme ọfiọkibet n̄ko! koro mbufo ẹbọpde edidobi mbiomo ẹbiom owo ke idem, edi mbufo ke idem mbufo idaha nnuenubọk kiet itụk mbiomo oro. Eyedọdiọk ọnọ mbufo! koro mbufo ẹbotde mme udi mme prọfet, ndien mme ete mbufo ẹkewot mmọ.”

Mbiomo oro Jesus etịn̄de aban̄a mi edi mme ido edinam oro ẹtịn̄de-tịn̄, edi mme ọfiọkibet ẹmi idimaha ndiwụhọde ekpri esisịt ewụhọ kiet mfep man edi mmemmem n̄kpọ ọnọ mme owo. Jesus ayarade ete ke mmọ ẹkam ẹnyenyịme ye ediwot oro ẹkewotde mme prọfet, enye onyụn̄ ọnọ ntọt ete: “[Ẹyekpak] iyịp kpukpru mme prọfet, eke ẹkeduọkde toto ke editọn̄ọ ererimbot, ke ubọk emana emi; ọtọn̄ọde ke iyịp Abel tutu osịm iyịp Zechariah, emi ẹkewotde ke ufọt itieuwa ye esịt esịt Ufọk Abasi: ke akpanikọ ke ndọhọ mbufo, ẹyekpak iyịp mmọ ke ubọk emana emi.”

Ererimbot ubonowo oro ẹkemede ndifak ọkọtọn̄ọ ke emana nditọ oro ẹmanade ẹnọ Adam ye Eve; ntem, Abel okodu uwem ke “editọn̄ọ ererimbot.” Ke afai afai ediwot Zechariah oro ama ekebe, mbonekọn̄ Syria ẹma ẹsobo Judah. Edi Jesus etịn̄ prọfesi aban̄a ndiọk n̄kan nsobo oro edidude ke emana imọ ke ntak n̄kpon n̄kan idiọkn̄kpọ eke emana oro. Nsobo emi ada itie ke n̄kpọ nte isua 38 ke ukperedem, ke 70 C.E.

Ke ndikaiso nnọ ubiomikpe esie, Jesus ọdọhọ ete: “Eyedọdiọk ọnọ mbufo mme ọfiọkibet! koro mbufo ẹmemen ukpọhọde ifiọk ẹfep: mbufo ikodụkke ke idem mbufo, mbufo ẹnyụn̄ ẹbiọn̄ọ mmọ eke ẹyomde ndidụk.” Mme ọfiọk Ibet oro ẹnyene mbiomo ndinam Ikọ Abasi an̄wan̄a mme owo, ẹyararede se enye ọwọrọde. Edi mmọ ẹkpu ndinam emi ndien ẹkam ẹbọbọ mme owo ifet ndifiọk n̄kpọ.

Mme Pharisee ye mme ọfiọkibet ẹyat esịt ye Jesus ke ndiyarade mmọ. Ke ini enye ọkpọn̄de ufọk oro, mmọ ẹtọn̄ọ ndibiọn̄ọ enye ikan̄ ikan̄ ẹnyụn̄ ẹfịna enye ye mme mbụme. Mmọ ẹdomo ndinam enye etịn̄ se mmọ ẹkemede ndida nnam ẹmụm enye. Luke 11:​37-54; Deuteronomy 14:22; Micah 6:⁠8; 2 Chronicles 24:​20-⁠25.

▪ Ntak emi Jesus obiomde mme Pharisee ye mme ọfiọk Ibet oro ikpe?

▪ Nso mbiomo ke mme ọfiọkibet oro ẹdori mme owo ke ibuot?

▪ Ini ewe ikedi “editọn̄ọ ererimbot”?