Ibuot 82

Jesus Afiak Anam Isan̄ aka Jerusalem

IBỊGHIKE Jesus afiak odu ke usụn̄, ekpepde n̄kpọ to ke ikpọ obio sịm ikpọ obio ye ke obio-in̄wan̄ sịm obio-in̄wan̄. Nte an̄wan̄ade, enye odu ke ikpehe obio ukara Perea, ke ube-inyan̄ n̄kan̄ Akpa Jordan ke ẹtode Judea ẹdụk. Edi ebiet oro enye akade edi Jerusalem.

Iso-ọfọn edi ekikere akwaifiọk mme Jew oro nte ke edi ibat ibat owo kpọt ẹdidot ndibọ edinyan̄a anam eren kiet obụp ete: “Ọbọn̄, nte mmọemi ẹnyan̄ade iwakke?” Ye ibọrọ esie, Jesus enyịk mme owo ndikere mban̄a se ẹyomde man owo enyene edinyan̄a: “Mbufo ẹn̄wana etieti [oro edi, ẹsịn̄ede idem, m̀mê ẹbọ ndutụhọ] ndibe ke mfafaha inuaotop ndụk.”

Utọ usịn̄ede idem oro edi usọp usọp n̄kpọ koro “ediwak owo” Jesus akaiso, “ẹyeyom ndidụk, ndien idikemeke.” Ntak emi mmọ mîdikemeke? Enye anam an̄wan̄a ete, ‘Ke adan̄aemi eteufọk adahade ke enyọn̄ eberi usụn̄, ndien mme owo ẹtọn̄ọ ndida ke an̄wa ntuak usụn̄, ẹte, “Ọbọn̄, sio usụn̄ nọ nnyịn,” enye eye­bọrọ ete: “Mfiọkke ebiet eke mbufo ẹtode; ẹdianade Mi, kpu­kpru mbufo mme anam ukwan̄n̄kpọ.”

Nte an̄wan̄ade, mbon oro ẹberide usụn̄ ẹbaha ke an̄wa ẹdi ke ini oro ọfọnde mmọ ke idem kpọt. Edi etisịm ini oro ẹma ẹberi usụn̄ ifetutom ẹnyụn̄ ẹkpaha usụn̄ oro. Man ẹbe ẹdụk, mmọ ẹkpekenyene ndibak ndi, idem okposụkedi mîkpefereke mmọ ke idem ndinam ntre. Ke akpanikọ, utịp oro asan̄ade ye mfụhọ ana ebet mbon oro ẹkedorode edinam utuakibuot Jehovah edi akpan uduak mmọ ke uwem ẹfep!

Mme Jew oro ẹkedọn̄de Jesus ndikanam utom nnọ mmọ ẹma ẹkpu ofụri ofụri ndida utịbe utịbe ifet oro mmọ ẹkenyenede nnyịme enọ Abasi kaban̄a edinyan̄a. Ntre Jesus ọdọhọ ke mmọ ẹyetua eyet ẹnyụn̄ ẹta edet ke ini ẹdisiode mmọ ẹduọn̄ọ ke an̄wa. Ke n̄kan̄ eken, mme owo ẹyeto ke “edem usiahautịn ye edem usoputịn, ye edere ye usụk,” ih, ẹto ke kpukpru idụt, “ẹdisụhọde ẹtetie ke Obio Ubọn̄ Abasi.”

Jesus akaiso ete: “Mme ekperedem [mbon oro mîdịghe mme Jew oro ẹkesịnde ke ndek, ọkọrọ ye mme Jew oro ẹkefịkde] ẹdu eke ẹdibemde iso, mme ebeiso [kpa mme Jew oro ẹnyenede inyene ẹnyụn̄ ẹdide mbon ido ukpono] ẹnyụn̄ ẹdu eke ẹdikperede edem.” Mmọ ndidi mme ekperedem ọwọrọ ke utọ mbon ifu oro, kpa mbon unana esịtekọm ididụhe ndomokiet ke Obio Ubọn̄ Abasi.

Mme Pharisee ẹdi idahaemi ẹbịne Jesus ẹnyụn̄ ẹdọhọ ẹte: “Wọrọ, daha, kpọn̄ edem emi; koro Herod [Antipas] oyomde Fi ndiwot.” Ekeme ndidi Herod ke idemesie ọkọtọn̄ọ ikọ emi ndinam Jesus efehe ọkpọn̄ efak n̄kan̄ oro. Ekeme ndidi Herod ama okop ndịk ndifiak nnyene ubọk ke ndiwot prọfet Abasi efen nte enye ekenyenede ubọk ke ediwot oro ẹkewotde John Andinịm owo baptism. Edi Jesus ọdọhọ mme Pharisee oro ete: “Ẹka ẹkedọhọ ebua-ikọt oro ẹte, Sese, mmebịn demon nduọk, nnyụn̄ nnam udọn̄ọ ẹkụre mfịn ye n̄kpọn̄, ndien ke ọyọhọ usen ita ẹyenam Mi mfọn mma.”

Ke okụrede utom esie do, Jesus akaiso ke isan̄ esie oro enye akade Jerusalem koro, nte enye anamde an̄wan̄a, “ikemeke ndidi ete prọfet eyekpa ke mîdịghe ke Jerusalem.” Ntak emi ẹkpedoride enyịn ẹte ke ẹdiwot Jesus ke Jerusalem? Koro Jerusalem edi ibuot obio ukara, emi akwa esop enyọn̄ Sanhedrin oro enyenede mme andibuana 71 owụhọde ye ebiet oro ẹsifọpde mme unam uwa. Ke ntre, ikpedịghe se ẹnyịmede edieke ẹkpewotde “Eyenerọn̄ Abasi” ke ebiet en̄wen ekededi akan Jerusalem.

Jesus eseme ete: “O Jerusalem, Jerusalem, emi owotde mme prọfet, onyụn̄ ọtọ­n̄ọde mmọemi ẹdọn̄de ẹtiene fi ke itiat! Adan̄a ediwak ini didie ke n̄koyom nditan̄ nditọ fo mbon ọtọkiet, kpa nte unen obonde nditọ esie ke idak mba esie, ndien mbufo ikonyịmeke! Sese, ẹyak ufọk mbufo ẹkpọn̄ ẹnọ mbufo.” Sia ẹsịnde Eyen Abasi, idụt oro ọbọ ubiomikpe!

Nte Jesus anamde isan̄ esie ekpere Jerusalem, ẹnọ enye ikot ke ufọk ọbọn̄ mme Pharisee kiet. Usen oro edi usen Sabbath, ndien mme owo ke ẹtịn̄ enyịn ẹkpeme enye, sia eren kiet emi ọdọn̄ọde mfụri odude do, ekeme ndidi udọn̄ọ oro mmọn̄ obohode owo oro ke ubọk mbiba ye ke ukot esie mbiba. Jesus etịn̄ ikọ ye mme Pharisee ye mme ọfiọk Ibet oro ẹdude do, obụpde ete: “Nte enen ndinam udọn̄ọ okụre ke sabbath, m̀mê inenke?”

Owo ndomokiet isioroke uyo. Ntre Jesus anam udọn̄ọ okụre eren oro onyụn̄ ọdọhọ enye ọnyọn̄. Ekem enye obụp ete: “Anie ke otu mbufo edinyene ass m̀mê enan̄, eke ọduọde ke obube mmọn̄, idinyụn̄ idụrike enye isio ini kiet ke sabbath?” Inikiet efen, owo ndomokiet itịn̄ke ndomo ikọ kiet ke ibọrọ. Luke 13:⁠22–14:⁠6; John 1:⁠29.

▪ Nso ke Jesus owụt nte edide se ẹyomde kaban̄a edinyan̄a, ndien ntak emi ẹberide usụn̄ ẹbaha ediwak owo ke an̄wa-⁠a?

▪ Mmanie ẹdi “mme ekperedem” oro ẹkabarede ẹdi mme ebeiso, ye “mme ebeiso” oro ẹkabarede ẹdi mme ekperedem?

▪ Nso ikeme ndidi ntak ẹkedọhọde ẹte ke Herod okoyom ndiwot Jesus?

▪ Ntak mîdịghe se ẹkemede ndinyịme nte ke ẹkpewot prọfet ke ebiet oro ọwọrọde ọkpọn̄ Jerusalem?