Ibuot 83

Owo Pharisee Akama Jesus Esen

JESUS ke osụk odu ke ufọk ọwọrọiso owo Pharisee kiet ndien enye osụk okụre ndikọk eren emi ọdọn̄ọde mfụri ndondo oro. Nte enye esede isenowo eken ẹmekde ikpọ itie ke itie udia, enye ekpep ukpepn̄kpọ ke nsụhọdeidem.

Jesus ndien anam an̄wan̄a ete, “Ke ini owo okotde fi edi udia-ndọ, kûsụhọde utie ke akamba itie: mbak ndusụk ẹma ẹkot owo eke okponde akan fi, ndien andikot fi ye enye edidọhọ fi ete, Nọ owo emi itie; ndien adan̄aoro afo eyetọn̄ọ ye bụt ndisụhọde n̄ka ke itie eke ekpride akan.”

Ntre Jesus ọnọ item ete: “Ke ini ẹkotde fi, ka ketie ke itie eke ekpride akan; man ke ini andikot fi ama edi, enye ekpekeme ndidọhọ fi ete, Ufan, dọk di: adan̄aoro afo eyenyene ukpono ke iso kpukpru mmọemi ẹtiede ke itie udia ye afo.” Ke ndiberi, Jesus ọdọhọ ete: “Koro kpukpru owo eke ẹmenerede idemesie, ẹyesụhọde enye ẹnịm; ndien owo eke osụhọrede idemesie, ẹyemenede enye.”

Ekem, Jesus enyene nneme ye owo Pharisee oro okokotde enye onyụn̄ etịn̄ aban̄a nte ẹkpenọde udia oro enyenede ata unyịme ke enyịn Abasi. “Ke adan̄aemi afo anamde udia uwemeyo m̀mê udia mbubịteyo, kûkot mme ufan fo m̀mê nditọ usọ, m̀mê iman fo, m̀mê mbọhọidụn̄ fo ẹmi ẹdide mme enyene-n̄kpọ; mbak ndusụk mmọ ẹdikot fi n̄ko, ẹnyụn̄ ẹsio usiene ẹnọ fi. Edi ke ini afo anamde udia, kot mme ubuene, ye mmọemi ẹdade unan, ye mbụn̄ọ, ye nnan; ndien eyefọn ye afo: koro mmọ mînyeneke se ẹdidade ẹsio fi usiene.”

Ndinọ mbon n̄kpọnnam utọ udia oro eyeda inemesịt ọsọk andinọ udia oro koro, nte Jesus anamde an̄wan̄a enyeneufọk esie, “Ẹyenọ fi usiene ke ini ediset nti owo.” Jesus nditịn̄ mban̄a odot-itoro udia emi anam ekemmọ esenowo eti orụk udia en̄wen. Esenowo emi ọdọhọ ete, “Ọfọfọn ọnọ owo emi edidiade n̄kpọ ke Obio Ubọn̄ Abasi.” Edi, idịghe kpukpru owo ẹtịm ẹda inem inem idotenyịn oro ke akpan n̄kpọ, nte Jesus akade iso ndiwụt ke n̄ke.

“Owo kiet akanam akamba udia, onyụn̄ okot ediwak owo: ndien . . . enye ọdọn̄ isụn̄utom ọkọdọhọ mmọemi ẹkekotde ete, Ẹdi, koro ẹma ẹnam kpukpru n̄kpọ ẹma. Edi kpukpru mmọ ẹtọn̄ọ ye esịt kiet ndiyom ikọ ndibọrọ. Akpa owo ete enye, Mmedep in̄wan̄, ndien nnyene ndika n̄kese; mbọk, n̄kwe nte ndide. Owo efen ete, Mmedep enan̄ duop, ndien n̄ka n̄kodomo mmọ nse; mbọk, n̄kwe nte ndide. Efen ete, Mmọdọ ndọ; ­oro esịn n̄kemeke ndidi.”

Nso ikpîkpu eben̄e! Nte ido edide, ẹsika ẹkese in̄wan̄ m̀mê ufene mbemiso ẹdepde mmọ, ntre ata n̄kpọ anamde ẹdu itọk itọk ke ndika n̄kese mmọ ke ẹma ẹkedep mmọ ẹma idụhe. Ukem ntre, ndọ oro owo ọdọde ikpọbiọn̄ọke enye ndiyere utọ akpan ikot oro. Ntre ke okopde aban̄a mme eben̄e ẹmi, eteufọk okop iyatesịt onyụn̄ ọnọ ofụn esie uyo ete:

“Wawara wọrọ ka ke mme efak, ye n̄kpri efak obio, nyụn̄ da mme ubuene, ye mmọemi ẹdade unan ye nnan ye mbụn̄ọ, dụk di. Ndien isụn̄utom oro edidọhọ ete, Ọbọn̄, ẹma ẹnam nte ọkọdọhọde, edi itie ke ososụhọ kan̄a. Ọbọn̄ oro ọdọhọ isụn̄utom esie ete, Wọrọ ke mme ọkpọusụn̄ ye ke mme mben-ọkọ, nyụn̄ yịre mmọ ẹdụk ẹdi, man ufọk mi ọyọhọ. . . . Baba owo kiet ke otu mmọemi ẹkekotde iditabike udia mi.”

Nso n̄kpọ ke ẹnam an̄wan̄a ke n̄ke emi? Ọfọn, “Ọbọn̄” oro ọnọde udia emi ada aban̄a Jehovah Abasi; “isụn̄utom” oro ọnọde ikot oro, ada aban̄a Jesus Christ; ndien “akamba udia” oro, ada aban̄a mme ifet ndidu ke udịm otu oro ẹdidade Obio Ubọn̄ eke heaven inyene.

Akpa mbon oro ẹkebọde ikot ndidu ke udịm oro ẹnyenede Obio Ubọn̄ oro ẹkedi, ke akande kpukpru owo en̄wen, mme adaiso ido ukpono mme Jew eke usen Jesus. Nte ededi, mmọ ẹma ẹsịn ikot oro. Ntem, ọtọn̄ọde akpan akpan ke Pentecost eke 33 C.E., ẹma ẹnọ ikot ọyọhọ ikaba osịm mbon oro ẹkesede ke ndek ye ke usụhọde ke idụt mme Jew. Edi owo ikeyereke ikot oro ikem ndiyọhọ itie 144,000 ke Obio Ubọn̄ Abasi eke heaven. Ntre ke 36 C.E., isua ita ye ubak ke ukperedem, ẹma ẹnọ mbon oro mîkanaha mbobi oro mîdịghe mme Jew ikot ọyọhọ ikata emi onyụn̄ edide akpatre ikot, ndien editan̄ oro ẹtan̄de mme utọ owo oro ẹbok ọtọkiet mi amakaiso edisịm eyo nnyịn. Luke 14:​1-⁠24.

▪ Nso ukpepn̄kpọ nsụhọdeidem ke Jesus ekpep?

▪ Didie ke enyeneufọk ekeme ndinọ udia oro enyenede unyịme Abasi, ndien ntak emi edinam ntem edidade inemesịt ọsọk enye?

▪ Ntak emi mme eben̄e eke isenowo oro ẹkekotde ẹdide ikpîkpu eben̄e?

▪ Nso ke “akamba udia” ke n̄ke Jesus ada aban̄a?