Ibuot 90

Idotenyịn Ediset ke N̄kpa

JESUS ke akpatre edisịm adan̄a Bethany, kpa ekpri obio-in̄wan̄ oyomde usụn̄ ọkpọn̄ Jerusalem ke n̄kpọ nte itiat iba. Ekedi n̄kpasịp usen ifan̄ tọn̄ọ nte Lazarus akakpa ẹkenyụn̄ ẹbụk enye. Nditọeka esie iban, Mary ye Martha ke ẹsụk ẹtatuan̄a, ndien ekese owo ẹdi ufọk mmọ ndidọn̄ mmọ esịt.

Nte mmọ ẹsụk ẹtuan̄ade, owo kiet editịn̄ ọnọ Martha ete ke Jesus ke edi. Ntem enye ọsọp adaha aka ndisobo ye Jesus, nte an̄wan̄ade ye unana editịn̄ nnọ eyeneka esie. Ke osịmde Jesus, Martha afiak etịn̄ se anade edi enye ye eyeneka esie ẹma ẹtetịn̄ ediwak ini ke usen inan̄ ẹmi ẹkebede: “Edieke Afo okpodude mi, eyeneka mi ikpakpaha.”

Nte ededi, Martha owụt idotenyịn, ọfọide owụt ete ke Jesus kpa ye oro ekeme ndinam n̄kpọ nnọ eyeneka esie. Enye ọdọhọ ete, “Mmọfiọk nte Abasi eyenọ Fi n̄kpọ ekededi eke Afo ediben̄ede Enye.”

Jesus ọn̄wọn̄ọ ete, “Eyeneka fo eyeset ke n̄kpa.”

Martha ada ete ke Jesus etịn̄ aban̄a ediset ke n̄kpa eke isọn̄ ke ini iso, emi Abraham ye mme asan̄autom Abasi eken n̄ko ẹkedoride enyịn ẹban̄a. Ntre enye ọbọrọ ete: “Mmọfiọk nte enye eyeset ke ediset ke n̄kpa ke akpatre usen.”

Nte ededi, Jesus ọnọ idotenyịn aban̄a usọp usọp nsụkesịt, ọbọrọde ete: “Ami ndi ediset ye uwem.” Enye eti Martha ete ke Abasi ọmọnọ imọ odudu ndikan n̄kpa, ọdọhọde ete: “Owo eke ọbuọtde idem ye Ami, okposụkedi nte enye ama akpa, enye eyedu uwem: ndien owo ekededi eke odude uwem onyụn̄ ọbuọtde idem ye Ami idikpaha ke nsinsi.”

Jesus inọhọ Martha ekikere ite ke mme anam-akpanikọ ẹmi ẹdude uwem ini oro idikpaha tutu amama. Baba, edi akpan n̄kpọ oro enye anamde an̄wan̄a edi nte ke ndinyene mbuọtidem ke enye ekeme ndida n̄kosịm nsinsi uwem. Ediwak owo ẹyedara utọ uwem oro nte utịp ke mmọ ndiset ke n̄kpa ke akpatre usen. Edi mme anam-akpanikọ mmọ eken ẹyebọhọ utịt akani editịm n̄kpọ emi odude ke isọn̄, ndien ye mmọemi ikọ Jesus ẹyesu ke ata ata usụn̄. Mmọ idikpaha tutu amama! Ke okụrede akpan utịn̄ikọ emi, Jesus obụp Martha ete, “Nte omonịm emi ke akpanikọ?”

Enye ọbọrọ ete, “Edi ntre, Ọbọn̄, mmonịm ke akpanikọ nte Afo edi Christ Eyen Abasi, kpa Enyeemi odụkde edi ke ererimbot.”

Martha ndien ọsọp afiak aka ndikot eyeneka esie, etịn̄de ọnọ enye ke ndịbe ete: “Andikpep mmọmi, Enye ke onyụn̄ okot fi edi.” Iwiwa Mary ọkpọn̄ ufọk. Ke ini mmọ eken ẹkụtde nte enye adahade ọwọrọ, mmọ ẹtiene, ẹse ẹte enye aka itieudi.

Ke osịmde Jesus, Mary ọduọ enye ke ukot atua eyet. “Ọbọn̄, edieke Afo okpodude mi, eyeneka mi ikpakpaha,” ntre ke enye ọdọhọ. Jesus enen̄ede okop mbọm ke ini enye okụtde nte Mary ye otuowo emi ẹsan̄ade ye enye ẹtuan̄ade. Enye obụp ete, “Mbufo ẹkenịm okpo ke m̀mọ̀n̄?”

Mmọ ẹbọrọ ẹte, “Ọbọn̄, di dise.”

Jesus n̄ko atua eyet, anamde mme Jew ẹdọhọ ẹte: “Sese, adan̄a nte enye amade owo oro.”

Ndusụk owo ẹti ẹte ke Jesus, ke ini Usọrọ Mme Ataya ọfiọn̄ ifan̄ mbemiso, ama atat uyen kiet edide eren oro akamanade nnan, enyịn, ndien mmọ ẹbụp ẹte: “Nte owo emi akatatde nnan enyịn ikpekemeke ndinam owo emi okûkpa?” John 5:21; 6:40; 9:​1-⁠7; 11:​17-⁠37.

▪ Ini ewe ke Jesus ke akpatre edisịm ebiet ekperede Bethany, ndien n̄kpọ etie didie do?

▪ Nso isọn̄ ke Martha enyene ke ndinịm ediset ke n̄kpa ke akpanikọ?

▪ Didie ke n̄kpa Lazarus otụk Jesus?